Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Oreng Isra’il agabay dusa pole ka PANGERAN, daddi bi’ PANGERAN bangsa jareya epanneng ekobasae bangsa Filistin sampe’ pa’ polo taon abidda.

² E bakto jareya badha oreng lalake’ e kottha Zora. Nyamana Mano’ah, dhari suku Dan. Binena jubeng.

³ Tape e settong are malaekadda PANGERAN ngaton ka binena Mano’ah, adhabu kantha reya, "Sampe’ sateya ba’na ta’ bisa andhi’ ana’, tape ta’ abit pole ba’na bakal ngandhunga sarta rembi’a lalake’.

⁴ Daddi ba’na jaga pateppa’ ja’ sampe’ ngenom anggur otaba nom-enoman kerras, ja’ sampe’ ngakan kakanan se haram;

⁵ mon ana’na ba’na lahir, obu’na ja’ ketthok saterrossa, sabab molae dhari gi’ badha e dhalem tabu’ kana’ jareya la etantowagi kaangguy daddi oreng nazir. Kana’ jareya se mabebasa bangsa Isra’il dhari bangsa Filistin."

⁶ Samarena jareya binena Mano’ah entar ka se lake’ pas ngoca’, "Ka’ badha otosanna Allah rabu ka sengko’; akantha malaekadda Allah, sampe’ sengko’ tako’. Sengko’ ta’ atanya dhari dhimma asalla, ban otosan jareya ta’ ngabala nyamana ka sengko’.

⁷ Tape otosan jareya adhabu ja’ sengko’ bakal ngandhunga sarta rembi’a lalake’. Sengko’ esoro ja’ ngenom anggur otaba nom-enoman kerras, esoro ja’ ngakan kakanan se haram, sabab kana’ jareya kodu eatorragi ka Allah kaangguy daddi oreng nazir saomorra."

⁸ Mano’ah pas nyo’on ka PANGERAN, "Adhu, Guste, abdidalem nyo’ona sopaja otosanna Junandalem ka’dhissa’ eotosa pole ka abdidalem sarta apareng oneng ka abdidalem, epakadiponapa’a kana’ gapaneka manabi ampon lahir."

⁹ Parnyo’onna Mano’ah ekabbuli. Malaekat gella’ rabu pole ka binena e bakto ju’-toju’ e teggal. E bakto jareya lakena tadha’ e jadhiya,

¹⁰ daddi, binena Mano’ah jareya berka’ entar ka lakena, pas ngoca’ kantha reya, "Mara tenggu ka’, oreng se sabbanna entar ka sengko’ rowa sateya rabu pole!"

¹¹ Mano’ah jaga pas duli noro’ se bine’, nyemma’e oreng jareya, pas atanya, "Ponapa panjennengngan se apareng kabar ka’issa’ ka bine abdidalem?" "Iya, bendher," saodda.

¹² Mano’ah pas atanya, "Manabi se edhabuwagi junandalem gapaneka ampon kalakon dhaggi’, ponapa se kodu elakone kana’ gapaneka? Kadi ponapa odhi’epon dhaggi’?"

¹³ Saodda malaekadda PANGERAN jareya, "Binena ba’na ta’ olle ngenom anggur otabana nom-enoman kerras, bariya keya ta’ olle ngakan pa-apa se asalla dhari bungkana anggur, otabana pa-apa se haram. Binena ba’na jareya kodu ajalannagi sabarang se ekoca’agi sengko’ ka aba’na, ban ajaga ja’ sampe’ badha se ta’ ejalannagi."

¹⁴ (13:13)

¹⁵ Mano’ah pas mator, "Mangken nante’ dhimen. Junandalem eola’agiya embi’ se gi’ ngodha dhimen."

¹⁶ Tape malaekadda PANGERAN jareya adhabu, "Maske sengko’ anante’ e dhinna’, sengko’ ta’ ngakana se eangka’agi ba’na dhaggi’. Tape, mon ba’na maksa’a ngangka’ana sengko’, kakanan jareya gabay kurban obbaran bai, gabay tor-ator ka PANGERAN." Mano’ah gi’ ta’ apangrasa ja’ se abu-dhabu jareya malaekadda PANGERAN. Daddi Mano’ah ngoca’, "Manabi saka’dhinto, abdidalem terro onenga pasera asmaepon junandalem, sopaja manabi se edhabuwagi junandalem ampon kalakon dhaggi’, abdidalem sareng robiya ka’dhinto bisa ngatore panghormadan ka junandalem."

¹⁷ (13:16)

¹⁸ Dhabuna malaekadda PANGERAN jareya, "Arapa ba’na me’ terro taowa tang nyama? Tang nyama ajib."

¹⁹ Mano’ah laju ngala’ embi’ se gi’ ngodha ban gandum sakone’, pas esaba’ e attassa bato, eatorragi ka PANGERAN, iya areya PANGERAN se alampa’agi sabarang se ajib.

²⁰ Sabatara apoy rabbang ka attas dhari mezba jareya, Mano’ah ban binena nangale’e malaekadda PANGERAN jareya nae’ ka attas e dhalem apoy se rabbang jareya, ongga’a ka langnge’. Mano’ah buru apangrasa ja’ jareya malaekadda PANGERAN; daddi laju asojud ban binena. Se kadhuwa jareya ta’ tao nangale’e malaekat jareya pole.

²¹ (13:20)

²² Ca’na Mano’ah ka binena, "Tanto sengko’ ban ba’na reya mateya, sabab la nangale’e Allah!"

²³ Saodda binena, "Mon PANGERAN pajat mateyana sengko’ ban ba’na, tanto ta’ kera kasokan narema kurban tor-atorra sengko’ ban ba’na gella’; bariya keya ta’ kera Salerana noduwagi reya kabbi ka sengko’ ban ba’na, otabana marenge oneng sabarang se la edhabuwagi gella’ rowa."

²⁴ Ella’ pan-barampan bulan saellana jareya binena Mano’ah rembi’ lalake’, pas enyamae Simson. Kana’ jareya pas raja, sarta eberkadi bi’ PANGERAN;

²⁵ ban e bakto kana’ jareya badha e parkemahanna suku Dan, se badha e antarana Zora ban Esyta’ol, Errohna PANGERAN molae apareng kakowadan ka aba’na.

Hakim-hakim

Video Hakim-hakim 13

Ikuti Kami:

KONTAK | PARTISIPASI | DONASI