Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Yusak seda, ommat Isra’il atanya ka PANGERAN, "Guste, suku se ka’dhimma se kodu alorok oreng Kana’an dha’-adha’ kadibi’?"
2 Dhabuna PANGERAN, "Suku Yehuda. Suku jareya bi’ Sengko’ la eberri’i kakobasa’an kaangguy arebbu’ nagara jareya."
3 Suku Yehuda pas ngoca’ ka suku Simeyon, "Tore suku kaula tolonge ngaloroga oreng Kana’an sareng arebbu’a nagara se sareng Pangeran ampon eparengngagi ka suku kaula. Dhaggi’ mon sampeyan arebbu’a nagara se eparengngagi Pangeran ka sukuna sampeyan, bi’ suku kaula etolongana jugan." Daddi suku Simeyon
4 ban Yehuda mangkat aperrang abareng. Bi’ PANGERAN reng-oreng jareya epamennang ka oreng Kana’an ban oreng Feris. Tantarana moso se mate e Bezek badha sapolo ebu oreng.
5 Reng-oreng jareya tatemmo ban Adoni-Bezek, rato nagara jareya, se pas laju eperrange.
6 Rato jareya buru, tape eserser bi’ reng-oreng jareya, saellana ekenneng pega’ pol-empolanna astana ban pol-empolanna padana eketthok.
7 Dhabuna Adoni-Bezek, "Lamba’ badha rato pettong polo oreng bannya’na se bi’ sengko’ eketthok pol-empolanna tanangnga ban pol-empolanna sokona sarta epangakan re-karena kakanan se gaggar dhari tang meja. Sateya sengko’ bi’ Allah epakantha jareya keya." Adoni-Bezek laju egiba ka Yerusalim, pas seda e jadhiya.
8 Oreng Yehuda alorok Yerusalim, kottha jareya laju erebbu’ ban eobbar, reng-orengnga epate’e.
9 Saellana jareya reng-oreng buru laju entar alorok oreng Kana’an se badha e dhaera pagunongan, ban e reng-erengnga gumo’; bariya keya se neng e dhaera se kerreng e bagiyan lao’,
10 ban e kottha Hebron, iya areya kottha se lamba’na enyamae Kiryat-Arba. E jadhiya oreng Yehuda makala kaom Sesai, Ahiman ban Talmai.
11 Dhari Hebron, oreng Yehuda terros alorok kottha Debir, se e bakto jareya anyama Kiryat-Sefer.
12 Sala settong dhari oreng suku Yehuda jareya, se anyama Kaleb, adhabu, "Pa’-sapa’a se bisa arebbu’ Kiryat-Sefer, olle abine tang ana’ se anyama Akhsa."
13 Otniyel, ana’na ale’na Kaleb se anyama Kenas, arebbu’ kottha jareya. Daddi bi’ Kaleb pottrana se anyama Akhsa epakabin ban Otniyel.
14 Teppa’ pangantanna, Otniyel ce’ maksana nyoro Akhsa menta tana ka eppa’na. Daddi Akhsa toron dhari hemarra, Kaleb laju mareksane apa se ekaterro pottrana jareya.
15 Saodda Akhsa, "Kaula terro gadhuwana ber-somberra aeng, sabab tana paparengnga sampeyan ka’issa’ badha e kennengngan se kerreng." Daddi bi’ Kaleb jareya Akhsa laju eparenge somberra aeng e bagiyan olo ban somberra aeng e bagiyan onjur.
16 Toronanna mattowa lake’na Mosa, iya areya reng-oreng Keni, noro’ oreng Yehuda kalowar dhari Yerikho, kottha Korma, entar ka dhaera se kerreng e lao’na Arad e Yehuda. E jadhiya reng-oreng buru neptep apolong ban bangsa Amalek.
17 Saellana jareya suku Yehuda abareng ban suku Simeyon entar alorok ban makala oreng Kana’an se ngennengnge kottha Zefat. Kottha buru bi’ ku-suku jareya ebasto, pas epamosna sarta laju enyamae Horma.
18 Oreng Yehuda etolonge PANGERAN sampe’ bisa arebbu’ dhaera pagunongan. Tape Gaza ta’ ekenneng rebbu’, bariya keya Askelon otabana Ekron ban dhaera e sabingkerra, sabab sa-bangsa se badha e salanjangnga paseser andhi’ ta-kareta perrang dhari besse; daddi bi’ suku Yehuda ta’ ekenneng ojuk.
19 (1:18)
20 Menorot se edhabuwagi Mosa, Hebron ebagi ka Kaleb, sabab lamba’ Kaleb ngojuk tello golongan kaom toronanna Enak dhari kottha jareya.
21 Suku Benyamin ta’ bisa ngojuk oreng Yebus dhari kottha Yerusalim. Daddi oreng Yebus gi’ paggun neng e jadhiya apolong ban oreng Benyamin.
22 Suku Efraim ban Manasye toronanna Yusup, entar alorok kottha Betel, se e bakto jareya anyama Lus. Ku-suku jareya etolonge bi’ PANGERAN. E bakto ta-mata eotos ka kottha jareya,
23 (1:22)
24 ta-mata jareya atemmo ban oreng lake’ se dhateng dhari kottha jareya. Ca’na ta-mata jareya ka lalake’ buru, "Mon sampeyan nolonge kaula sakanca paneka sopaja bisa’a maso’ ka dhalem kottha paneka, kaula padha becce’a ka sampeyan."
25 Daddi lalake’ buru noduwagi ka reng-oreng jareya jalan mon maso’a ka kottha jareya. Reng-oreng Efraim ban Manasye maso’ ka kottha jareya, pas mate’e sakabbinna pandhudhu’na kajabana oreng se nolong ta-mata gella’ sabalana.
26 Oreng jareya laju ngalle ka nagarana oreng Het, pas maddek kottha e jadhiya se pas enyamae Lus. Nyamana kottha jareya gi’ paggun kantha jareya.
27 Suku Manasye ta’ ngojuk pandhudhu’na kottha Bet-Seyan, Ta’anakh, Dor, Yibleyam ban Megido ban pong-kampong e ma’-semma’na. Daddi oreng Kana’an gi’ paggun neng e jadhiya.
28 Saellana oreng Isra’il atamba kowat, reng-oreng Kana’an epaksa daddi dunorra, tape ta’ eojuk dhari nagara jareya.
29 E kottha Gezer, oreng Kana’an, pandhudhu’na kottha jareya, ta’ eojuk bi’ suku Efraim; daddi oreng Kana’an jareya gi’ paggun neng e jadhiya apolong ban suku Efraim.
30 Pandhudhu’na kottha Kitron ban Nahalol ta’ eojuk keya bi’ suku Zebulon. Daddi bangsa Kana’an gi’ teptep neng e jadhiya apolong ban suku Zebulon jareya, tape suku Kana’an jareya epaksa daddi dunorra.
31 Bariya keya pandhudhu’na kottha Ako, Sidon, Ahlab, Akhzib, Helba, Afek ban Rehob ta’ eojuk bi’ suku Asyer.
32 Daddi oreng Kana’an, pandhudhu’na nagara jareya paggun neng e jadhiya apolong ban suku Asyer.
33 Bariya keya pandhudhu’na kottha Bet-Semes ban Bet-Anat ta’ eojuk bi’ suku Naftali. Daddi oreng Kana’an, pandhudhu’ aslina nagara jareya, teptep neng e jadhiya apolong ban oreng Naftali, tape epaksa daddi dunorra suku Naftali jareya.
34 Bangsa Amori gi’ paggun neng e Ayalon, Sa’albim ban Gunong Heres, sabab suku Dan bi’ bangsa jareya esellek ka dhaera pagunongan sarta ta’ ebagi toron ka dhaera tana maba. Tape bangsa Amori jareya dibi’ bi’ suku Efraim sarta Manasye epaksa epadaddi dunorra.
35 (1:34)
36 E bagiyan dhajana Sela, batessa dhaerana reng-oreng Amori ngalebadi Ga’-ongga’an Akrabim.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA