Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E tanggal salekor bulan petto’ e taon jareya keya, PANGERAN adhabu pole kalaban parantara’anna Nabbi Hagai.
2 PANGERAN ngotos Hagai ka Gubennor Zerubabil, Imam Agung Yusak, sarta ra’yat kaangguy notorragi pessen reya,
3 "Ba’ badha’a e antarana ba’na se gi’ enga’ saapa bagussa Tang Padalemman reya lamba’? Sateya baramma kabadha’anna noro’ panemmona ba’na? Ta’ lebur sakale!
4 Tape ba’na kabbi ja’ sampe’ ta’ andhi’ pangarep! Terrossagi lalakon jareya, sabab Sengko’ teptebba abanto ba’na.
5 E bakto ba’na kalowar dhari Messer, Sengko’ la ajanji ngaobana ba’na. Ban sateya Sengko’ gi’ ngaobi ba’na. Daddi ba’na ta’ parlo kene’ ate.
6 Sakejja’ aggi’ Sengko’ magundhegga langnge’ ban bume, tenggangan ban tase’.
7 Sakabbinna bangsa bi’ Sengko’ epabaridhuwa ban dhi’-andhi’na bi’ Sengko’ egiba’a dha’ enna’, sampe’ Tang Padalemman reya possa’ bi’ artana sa-bangsa jareya.
8 Emmas ban salaka e dunnya reya Tang andhi’ kabbi.
9 Tang Padalemman se anyar bakal lebbiya bagus dhari se lamba’, ban e jadhiya Sengko’ madhatengnga kataremtemman ban kama’moran ka Tang bangsa." PANGERAN Se Mahakobasa la adhabu.
10 E tanggal pa’ lekor bulan sanga’ taon se kapeng dhuwa’ pamarenta’anna Rato Darius, PANGERAN Se Mahakobasa adhabu pole ka Nabbi Hagai.
11 Dhabuna, "Menta potosan ka para imam parkara reya:
12 Saompamana badha oreng ngala’ daging sakerra’ dhari kurban se eatorragi ka PANGERAN, pas egiba mole esaba’ e dhalem leppedanna jubana, saellana jareya jubana nyedding ka roti otaba kakanan se la eola, otabana anggur, otabana mennya’ jaitun, otabana kakanan apa’a bai, apa jareya bakal daddiya socce kabbi keya?" E bakto Hagai atanya parkara jareya, para imam nyaot, "Bunten."
13 Saellana jareya Hagai atanya pole, "Saompamana badha oreng se daddi najjis lantaran nyedding mayyit, saamponna ganeka laju nyedding sala settong dhari teddha’an gapaneka, ponapa teddha’an gapaneka daddi najjis jugan?" Para imam nyaot, "Enggi, tanto saos!"
14 Hagai pas adhabu pole, "PANGERAN adhabu ja’ atoran paneka eteptebbagi jugan kaangguy ka ommat Isra’il e nagara paneka sareng ka sadajana se ehasellagi bangsa Isra’il. Daddi, sadaja se eatorragi bangsa Isra’il e mezba paneka, najjis sadaja."
15 PANGERAN adhabu, "Kodda’ tetene, badha kadaddiyan apa sabellunna are teya, iya reya sabellunna Tang Padalemman reya epateppa’! Baramma kabadha’anna ba’na e bakto jareya?
16 Ba’na entar nenggu tombuganna gandum se bi’ ba’na esanggu dhu ratos kilo bannya’na, tape se etemmo ba’na nyatana coma badha saratos kilo. Ba’na entar nyello’a anggur saratos liter dhari ettongnga anggur, tape se badha coma pa’ polo liter.
17 Sengko’ la madhateng angen panas ban ojan bato maancor hasella teggalla ba’na, tape ba’na ta’ endha’ abali ka Sengko’ keya.
18 E are teya, tanggal pa’ lekor bulan sanga’, dhasarra Tang Padalemman la mare epasang. Tetene badha kadaddiyana apa saellana sateya.
19 Maske gandumma la tadha’ karena, ban bungkana anggur, bungkana ara, bungkana dalima ban bungkana jaitun gi’ ta’ abuwa, tape molae sateya Sengko’ aberkadana ba’na!"
20 E are jareya keya, iya reya e tanggal pa’ lekor bulan sanga’, PANGERAN adhabuwagi pessen se nomer dhuwa’ ka Hagai,
21 se epakon panapa’ ka Gubennor Zerubabil. Dhabuna PANGERAN, "Sakejja’ aggi’ Sengko’ magundhegga langnge’ ban bume;
22 karaja’an-karaja’an bi’ Sengko’ epagulu’a ban kobasana epaancora. Ta-kareta perrang ban kusirra epajungkelanga; ran-jaranna bakal mateya kabbi ban reng-oreng se nompa’ ran-jaran jareya bakal salenga pate’e.
23 E are jareya, ba’na, Zerubabil, Tang abdi, bi’ Sengko’ eangkada epamarenta’a bit Tang nyama. Sabab ba’na se la epele bi’ Sengko’." PANGERAN Se Mahakobasa la adhabu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA