Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas wari dua pulu sada, bulan pepituken, i bas tahun e, reh kata TUHAN arah Nabi Hagai.
2 IsuruhNa Hagai ngataken man Serubabel gubernur Juda, Imam si Mbelin, bage pe man bangsa e bagenda,
3 "Lit kam si ngingetsa uga jilena nai Rumah Pertoton e? Uga iidahndu genduari? Ma lanai tempa kai-kai pe si genduari e?
4 Tapi ula sada pe tumpat ukurndu. Teruskenlah ndahiken dahin e, sabap Aku kap ras kam.
5 Tupung kam ndarat i Mesir nari, erpadan Aku maka Aku tetap ras kam. Genduari pe Aku tetap nge ras kam, emaka ula kam mbiar.
6 Lanai ndekahsa Kuugur me langit ras doni, lawit ras daraten.
7 Kuugur kerina bangsa-bangsa, erta-ertana ibaba ku jenda, maka Rumah Pertoton e dem alu kemulian.
8 Kerina emas ras pirak i doni enda Aku empuna.
9 Rumah Pertoton si mbaru e, jilen pagi asa si nai, janah i je Kubereken kesenangen ras dame man bangsangKu." Bagenda me nina TUHAN si Mada Kuasa.
10 I bas wari dua pulu empat, bulan pesiwahken tahun peduaken kenca Darius jadi raja, reh kata TUHAN arah Nabi Hagai.
11 Nina, "Sungkun imam-imam uga peraturenna enda:
12 Adi lit sekalak jelma maba tare jubahna sengkeret daging si badia, eme daging si nggo ipersembahken, jenari ipelepasna jubahna e engkenai roti, pangan si nggo tasak, anggur, minak saitun, tah pe erbage-bage pangan si debanna, nggo nge jadi badia ibahanna pangan ndai pe?" Erjabap imam-imam nina, "Lang."
13 Kenca bage nungkun ka Hagai nina, "Adi lit sekalak jelma keliamen erkite-kiteken terjemaksa mait, kenca bage terdegessa ka pangan si apai gia, keliamen nge ibahanna pangan ndai pe?" Ngaloi imam-imam e nina, "Keliamen."
14 Kenca bage nina Hagai, "Bage ka me kerna bangsa enda pe ras kerina bekas pendahinna; emaka kasa kai si ipersembahkenna i bas batar-batar e barang si keliamen nge."
15 Nina TUHAN, "Ma ipergermetkenndu nge kai si jadi man bandu? Ope denga ibenakenndu ngumban Rumah Pertoton e,
16 adi lawes kam ku pinugun gandum, ngarap kam ndatken dua puluh ayan, tapi kepeken sepuluh ayan ngenca idatndu. Atendu njaruk lima puluh tumba anggur i bas tong nari, tapi dua puluh tumba ngenca idatndu.
17 Kusuruh angin si melas bage pe udan baho, encedaken kerina sinuan-sinuanndu, tapi bage pe la ka bo kam jera-jera.
18 Sendah eme wari dua pulu empat, bulan pesiwahken, i ja palas Rumah Pertoton e nggo dung. Perdiatekenlah kai si nandangi jadi i jenda nari ku wari-wari si rehna.
19 Aminna lanai pe lit tading buah gandum janah batang anggur, batang ara, dingen galiman langa erbuah, tapi i jenda nari terus ku paksa-paksa si reh Kupasu-pasu me kam."
20 I bas wari e, eme wari dua pulu empat bulan e, reh ka kata TUHAN pedua kaliken arah Hagai,
21 si man sehenken man Serubabel, gubernur Juda Nina "Nandangi Kuugur me langit ras doni,
22 janah Kuruntuhken kerajan-kerajan ras kuasana. Kubenterken gereta perang ras kusirna; kuda e mate kerina bage pe si ngersaksa sibunuh-bunuhen sapih-sapih ia.
23 I bas wari e, o suruh-suruhenKu Serubabel, Kuangkat me kam jadi si erkuasa i bas gelarKu. Kam kap kalak si nggo Kupilih." Bagenda me nina TUHAN si Mada Kuasa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA