Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makarua pamarentahanna Karaeng Darius ri Persia, ri tanggala’ se’re bulang makaannang, a’bicarai Batara tete ri Na’bi Hagai. Anjo pasanNa Batara nipatujui mae ri Zerubabel ana’na Sealtiel, guburnur Yehuda, siagang mae ri Imang Lompoa Yosua ana’na Yozadak.
2 Nakana Batara Kaminang Koasaya mae ri Hagai, "Anne bansaya nakana teaipi wattunna untu’ ambangungi ammotere’ BallakKu."
3 Nampa tete ri Na’bi Hagai Nakanamo Batara mae ri umma’Na,
4 "He ummakKu, maka narapi’mi wattunnu untu’ ammantang lalang ri balla’ bajika siagang kassaka, nampa BallakKu tuli sangkammana tambungang loro?
5 Coba sai, parhatikangi pattallassannu!
6 Appakioro’ mako jai bine, mingka sike’de’ji alle polenu. Nia’ kanrenu, mingka tanggannakkai untu’ ambassori battannu. Nia’ anggoro’nu, mingka tanggannakkai untu’ ampassukkuki pakkasia’nu. Nia’ care-carenu, mingka tanggannakkai untu’ angkammuki kalennu. Siagang gaji nagappaya kuli’-kulika tanggannakkai untu’ ansambungi tallasa’na ke’nanga.
7 Tena nusadara’ ri kalennu angkanaya angngapai nakajariang anjo kammaya?
8 Kamma-kamma anne, nai’ mako ri bulu’-buluka untu’ angngalle kayu, nampa bangummi BallakKu; na lasannammi nusa’ring siagang lanisombaMa’ ammotere’ sangkamma siratannaya. Coba sai, parhatikangi pattallassannu!
9 Manrannuangko wassele’ jai, mingka kale’bakkanna sike’de’ duduji nugappa; nuerangi ammotere’, mingka Kutuiki anjo erang polenu, sa’genna cappu’ niri’bakang ri anging. Angngapa naKugaukang anjo kammaya? Saba’na iamintu: Lanri anjo BallakKu ammantanginji kamma tambungang loro, nampa a’gassingang ngasengko massing ambangungi balla’ kalennu.
10 Iaminjo saba’na natena naturung bosia sa’genna tena lamung-lamung akkulle attimbo.
11 Kupabattui kakalotoranga mae ri buttaya siagang bulu’-buluka, mae ri koko-koko gandunga, koko-koko anggoroka siagang koko-koko zaitunga, kammayatompa mae ri sikontu lamung-lamung niaka ri anne buttaya, ba’lalo mae ri rupataua siagang olo’-oloka, kammayatompa mae ri sikontu apa nuusahakanga."
12 Nampa Zerubabel siagang Yosua kammayatompa sikontu umma’ Israel niakamo ammotere’ battu ri pammelakkanga ri Babel, naturukimi kana-kananna Hagai, iamintu suroNa Batara. Nagaukammi ke’nanga apa Naparentakanga Batara mae ri ke’nanga, lanri malla’na ri Batara.
13 Nampa napabattu Hagai mae ri ra’yaka pasanNa Batara angkanaya a’janji Batara ero’ anjagai ke’nanga.
14 Kammami anjo bateNa Batara ampagioki atinna Guburnur Zerubabel, Imang Lompoa Yosua siagang sikontu tau niakamo ammotere’ battu ri pammelakkanga, sollanna anjama ngaseng ke’nanga ambangungi Balla’Na Batara Kaminang Koasaya, Allata’alana ke’nanga.
15 Appakkaramulami ke’nanga anjama ri tanggala’ ruampulo angngappa’ bulang annang, ri taung makarua ri wattu pamarentahanna Karaeng Darius.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA