Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ijombahon si Josep ma dirini hubani bohi ni bapani ai, itangisi anjaha isummahi ma ia.
2 Ihatahon si Josep ma juakjuakni, ai ma doktor-doktor, mangkapuri bapani ai; jadi ihapuri doktor-doktor ai ma si Israel.
3 Ompat puluh ari do ai ihorjahon sidea, ai nasai do dokahni porlu mangkapuri. Jadi itangisi halak Masir ma ia pitu puluh ari dokahni.
4 Dob salpu panorang na manangisi ai, nini si Josep ma dompak isi ni rumah ni Parao. Anggo na idop do uhur nasiam mangidah ahu, hatahon nasiam ma hubani Parao, sonon,
5 “Domma ipabija bapa ahu, nini, ʻTonggor ma, na laho matei mando ahu; maningon i tanoman, na huhurak bangku i tanoh Kanaan, ijai do ahu tanomonmu. On pe, lopas nasiam ma ahu tangkog ase hutanom bapa, dob ai pe ase mulak ahu.ʼ”
6 Dob ai nini Parao ma, “Laho ma ho, tanom ma bapanta in, songon na dob ibijahon ho.”
7 Jadi tangkog ma si Josep laho mananom bapani ai; tangkog ma rap pakonsi ganup juakjuak ni Parao, pangintuai-pangintuaini, rumahni pakon ganup pangintuai ni tanoh Masir,
8 ronsi ganup isi ni rumah ni si Josep pakon saninani ampa isi ni rumah ni bapani ai; pitah anak, biribiri pakon lombu ni sidea do tading itanoh Gosen.
9 Tangkog do homa rap pakonsi gareta pakon siajak huda, gabe ganjang tumang do odoran ai.
10 Dob das sidea hu pardogeian Atad, na i dipar ni Jordan igogohi sidea ma ijai tangis-tangis; iadongkon si Josep ma partangison bolon pitu ari dokahni hubani bapani ai.
11 Jadi dob iidah isi ni tanoh ai, ai ma halak Kanaan, partangison na i pardogeian Atad ai, nini sidea ma: Partangison bolon do on bani halak Masir. Halani ai do ase ibahen halak goran ni ianan ai Abel-Masir, ai ma na i dipar ni Jordan.
12 Dob ai ibahen anak ni si Jakob ma hu bani, songon na tinonahkonni hubani sidea.
13 Iusung anakni ai ma ia hu tanoh Kanaan, itanom ma ia i liang ni juma Makpela, tontang ni Mamre, na binoli ni si Abraham rap pakon juma ai humbani si Epron, halak Het ai, bahen tanoman parsandirian.
14 Ase dob itanom sidea bapani sidea ia, mulak ma si Josep hu tanoh Masir, ia pakon saninani, pakon ganup na rap tangkog pakonsi mananom bapani ai.
15 Dob iidah sanina ni si Josep ai na dob matei bapani sidea ai, nini sidea ma: Atap na sogam do uhur ni si Josep mangidah hita, anjaha balaskononni do banta sagala na masambor na binahenta bani sanggah lape matei ia.
16 Jadi martonah ma sidea hubani si Josep, mangkatahon: Nini bapanta sanggah lape matei ia:
17 Sonon ma hatahon hanima hubani si Josep, “Marpangulaki ma uhurmu mardingat hajahaton ni saninamu pakon dousa ni sidea, ai na sambor do na binahen ni sidea bam. On pe, sasap ma hajahaton ni jabolon ni Naibata ni bapanta ai!” Jadi tangis ma si Josep, dob ihatahon sidea sonai hu bani.
18 Roh ma homa saninani ai, manrogop ma sidea i lobeini, anjaha nini ma, “Tonggor ma, jabolonmu ma hanami.”
19 Tapi nini si Josep ma dompak sidea, “Ulang ma nasiam mabiar, ai lang tunduk bani Naibata do age ahu?
20 Na sambor do tongon tahi ni uhur nasiam hu bangku, tapi na madear do hadobanni ibahen Naibata, laho pasaudkon songon na niidah nasiam sadari on, ai ma pagoluhkon sada bangsa na bolon.
21 On pe ulang ma mabiar nasiam. Ahu pe na marmudu-muduhon nasiam pakon anak nasiam.” Dob ai iapoh ma sidea pasabouhon uhur ni sidea.
22 Jadi marianan i tanoh Masir ma si Josep, ia pakon isi ni rumah ni bapani; anjaha saratus sapuluh tahun do si Josep manggoluh.
23 Sompat do iidah si Josep ginompar ni si Efraim ronsi sundut patoluhon, niombah ni si Makir pe, anak ni si Manase, tubuh i abingan ni si Josep do.
24 Dob ai nini si Josep ma dompak saninani ai, “Na matei mando ahu, tapi sai tatapon ni Naibata do nasiam magira, anjaha arahkonon-Ni do nasiam luar hun tanoh on hu tanoh na dob binulawankon-Ni hubani si Abraham, si Isak pakon si Jakob.”
25 Dob ai ipabija si Josep ma anak ni si Israel, nini ma, “Sai tatapon ni Naibata do nasiam magira, jadi maningon boanon nasiam do holi-holingku hunjon.”
26 Jadi matei ma si Josep, marumur saratus sapuluh tahun; ihapuri sidea ma bangkeini anjaha ipamasuk hubagas batang i tanoh Masir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA