Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idampesken Jusup bana ku babo bapana, itangisina, iemaina.
2 Kenca bage iperentahken Jusup gelah itamaken rempah-rempah ku mait bapana.
3 Bagi biasana empat puluh wari dekahna adi ngerempahi mait. Itangisi kalak Mesir Jakup pitu puluh wari dekahna.
4 Kenca nggo lepas paksa erceda ate nina Jusup man pegawai-pegawai raja, "Peseh lah berita enda man raja,
5 'Nandangi bapa mate, isuruhna aku erpadan man bana gelah kukuburken ia i kuburen si nggo isediaken i Kanaan. Erkiteken si e lawes aku lebe ngkuburken bapangku, janah kenca dung mulih ka aku.'"
6 Nina raja njabapsa, "To kuburken lah bapandu bagi si nggo ipadankenndu."
7 Emaka lawes me Jusup ngkuburken bapana. Kerina pegawai raja, kalak si erpangkat, ras kalak si mbelin i Mesir ngikut ras Jusup.
8 Keluargana, senina-seninana, kerina keluarga bapana ngikut ras ia. Si tading i daerah Gosen eme danak-danak si kitik denga, biri-biri, kambingna, lembuna.
9 Ikut pe kalak si ergereta perang ras si ngersak kuda. Lanai tanggung teremna kalak enda naruhkenca.
10 Kenca kalak enda seh i ingan ngerik i kuta Atat, arah matawari pultak Lau Jordan, ndekah ia i je tangis ngandung alu sora megang. Iban Jusup adat perngandungen pitu wari dekahna.
11 Kenca iidah rayat Kanaan kalak si erceda ate e i Atat nina, "Megogo kal ate ngidah adat perngandungen kalak Mesir e." Eme sabapna maka iban gelar ingan e Abel Misraim. Cibalna arah Timur Lau Jordan.
12 Dage ilakoken anak-anak Jakup me bagi si iperentahken bapana man bana.
13 Ibabana ia ku Kanaan, ikuburkenna i gua Mahpela, arah Timur Mamre i juma si itukur Abraham i bas Epron kalak Heti e man taneh kuburen.
14 Kenca nggo ikuburken Jusup bapana, mulih ia ku Mesir radu ras senina-seninana ras kerina kalak si ngikut i bas penguburan e.
15 Kenca bapana nggo mate nina senina-senina Jusup sapih-sapih ia, "Uga pagi jadina adi segat denga ate Jusup man banta, jenari erbalas ia man banta erdandanken kerina kejahaten si ibahan kita man bana?"
16 Emaka ipesehna sada tenah man Jusup nina, "Ope denga bapanta mate,
17 isuruhna kami mindo man bandu bagenda, 'Alemilah salah senina-seninandu asum ibahanna nai si la mehuli man bandu.' Erdandanken si e, mindo kami gelah ialemindu salah si nggo ibahan kami man bandu. Kami enda kap suruh-suruhen Dibata si isembah bapandu." Tangis Jusup tupung ialokenna tenah enda.
18 Dungna senina-seninana e jine reh, erjimpuh i adep-adepen Jusup nina, "Kami enda reh jadi budakndu."
19 Tapi nina Jusup man kalak enda, "Ula mbiar labo banci aku jadi gancih Dibata ngukum kalak.
20 Jahat sura-surandu man bangku, tapi nggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari.
21 Emaka ula pada sitik pe kam mbiar. Aku pekena-kena kam ras anak-anakndu." Dage alu kata si melias e, ipetetap Jusup mulihi ukur senina-seninana seh maka malem atena kerina.
22 Jusup ras keluarga bapana tetap denga tading i Mesir; sanga ia mate umurna seratus sepuluh tahun.
23 Tapi sempat denga iidahna anak-anak ras kempu-kempu si Eperaim. Sempat denga pe ialokenna anak-anak si Mahir kempu Manase jadi keluargana.
24 Nina man senina-seninana, "Aku lanai ndekah mate, tapi uga pe ipekena-kena Dibata nge kam. ItaruhkenNa kam ndarat i jenda nari ku taneh si nggo IpadankenNa man Abraham, Isak ras Jakup."
25 Emaka isuruh Jusup kerina kesusuren Jakup ersumpah nina, "Erpadanlah man bangku, maka adi itaruhken Dibata kam ku taneh si IpadankenNa e, tulanku pe ibabandu ku jah."
26 Dungna mate me Jusup i Mesir i bas umur seratus sepuluh tahun. Itama rempah-rempah ku badanna, jenari itamaken maitna ku bas peti.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA