Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iperentahken Jusup man suruh-suruhen si ngurus rumahna, "Asak guni kalak enda alu pangan asa terbabasa, janah tamaken senna e i bas gunina sekalak-sekalak.
2 Tamaken calung ingan minemku, calung pirak e, i bas guni agina si nguda radu ras sen penukur gandum e." Ilakoken suruh-suruhen bagi si iperentahken Jusup.
3 Pagina lampas erpagi-pagi ipeberkat me kalak enda ras kaldena kerina.
4 Langa ndauhsa kalak enda nadingken kota e nina Jusup man suruh-suruhenna, "Pedasken ayaki kalak ndai. Kenca nggo tundukndu kalak e sungkun ia, 'Ngkai maka ibalasndu perbahanen si mehuli alu perbahanen si jahat?
5 Ngkai maka itangkondu calung pirak tuanku? E kap ingan minemna, si ipakena guna meteh kejadin si reh alu ertendung. Jahat kal perbahanenndu e!'"
6 Kenca itunduksa kalak e iulihina ka ngatakenca bagi si ndai man kalak e.
7 Nina kalak enda njabap suruh-suruhen e, "Kai tujunna cakapndu e, Tuan? Ersumpah kami maka la lit ibahan kami si bage.
8 Ietehndu ibaba kami mulih i taneh Kanaan nari duit si idat kami i bas guni kami. I ja nge kami nggit nangko pirak tah emas i bas rumah tuanndu nari?
9 Tuan, adi lit sekalak i bas kami terdat i bassa, ukum mate ia, janah kami kerina jadi budakndu."
10 Nina suruh-suruhen e, "Payo kuakap; tapi kalak si muniken calung e saja ngenca jadi budakku, si debanna banci mulih alu bebas."
11 Emaka pedas ipesusur kalak enda gunina, janah tep-tep kalak nalangi karungna.
12 Alu megermet ipepayo suruh-suruhen ndai guni kalak e, menaken i bas sintua nari seh ku si nguda; dungna terdat calung e i bas karung Benyamin.
13 Emaka iamparkenna barang-barangna ku das kaldena, mulihken ia kerina ku kota e.
14 Kenca Juda ras senina-seninana seh i rumah Jusup, idapetina Jusup i je. Erjimpuh kalak enda i lebe-lebena.
15 Nina Jusup, "Uga nge perbahanenndu e? La kin ietehndu maka kalak si erkuasa bagi aku enda banci meteh ukur alu ertendung?"
16 Nina Juda njabapsa, "Uga denga nge ningkami man bandu Tuan? Uga nari ningkami pebujur diri kami? Nggo icidahken Dibata kesalahen kami. Genduari kerina kami jadi budakndu, la saja kalak si i bas ia terdat calung e."
17 Nina Jusup, "E, lang! La aku nggit erban bage. Kalak si muat calung e saja nge ngenca jadi budakku. Si debanna banci mulih alu mejuah-juah ndahi bapandu."
18 Reh Juda ndeheri Jusup nina, "Sentabi, Tuan, ngarap aku maka iberendu min aku ngerana man bandu alu bebas. Ula kam nembeh; sabap iakap kami bali nge kam ras raja negeri enda.
19 O, Tuan, isungkunndu kami, 'Lit denga nge bapandu tah seninandu si deban?'
20 Ngaloi kami, 'Lit denga bapa kami si nggo metua, bage pe agi kami si nguda; ia tubuh kenca bapa kami nggo metua. Seninana sada nande sada bapa nggo mate, emaka ia naring tading anak nandena. Lanai kal lang-lang kelengna ate bapana man bana.'
21 Tuan, isuruhndu kami maba ia ku jenda, gelah banci idahndu ia.
22 Ningkami njabap kam, 'La banci itadingken anak e bapana; adi itadingkenna, mate me bapana.'
23 Emaka nindu, 'La banci kam reh ngadap man bangku adi la ras agindu si nguda.'
24 Sanga kami mulih ku bapa kami ituriken kami man bana kai si nggo ikatakenndu.
25 Asum isuruhna ka kami mulihken ku jenda nukur pangan man kami,
26 ningkami njabapsa, 'La banci kami lawes; labo kami ibere ngadap wakil raja e pala ikut agi kami si nguda. Banci kami lawes adi agi kami si nguda pe ikut ras kami.'
27 Nina bapa man kami, 'Tehndu nge maka ndeharangku si Rahel dua ngenca anakna.
28 Sekalak i bas ia nggo nadingken aku. Ugapa pe nggo me ia icaing-caing rubia-rubia si merawa, sabap lanai pernah ia kuidah kenca ia lawes.
29 Adi si sada enda pe ibuatndu ka genduari i bas aku nari, janah kune kenca kai-kai jadi man bana, ugapa pe mate naring aku erkiteken ceda ate si ibahanndu e, sabap aku nggo metua.'"
30 "Emaka genduari Tuan," nina Juda nerusken cakapna, "adi mulihken aku ndahi bapa la ras anak e, kenca idahna anak e la ras aku, mate me ia. Kesahna tergantung man kesah anak enda, janah erkiteken nggo bage ia tuana, ugapa pe mate naring ia erkiteken ceda-ate si ibahan kami man bana.
31 (Kej 44:30)
32 Lang pe, nggo aku erpadan man bana maka kuasamken kesahku guna keselamaten anak e. Kukataken man bana, adi la kubaba anak e mulihken man bana, kupersan kesalahen e kidekah geluhku.
33 Emaka genduari Tuan, aku me tading i jenda jadi budakndu gancih anak e; pelepas ia mulih ras senina-seninana.
34 Uga nge ningku mulih njumpai bapangku adi anak e la ras aku? La aku ngasup ngidah mara si bage jadi man bapangku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA