Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Si Jakob pe itoruskon ma pardalananni, jadi ijumpahkon malekat ni Naibata ma ia.
2 Dob iidah si Jakob sidea, nini ma, “Bala ni Naibata do on!” Jadi ibahen ma goran ni ianan ai Mahanaim.
3 Dob ai isuruh si Jakob ma suruhanni parlobei marayak si Esau, abangni ai hu tanoh Seir, hu nagori Edom.
4 Ihatahon ma bani sidea, nini ma, “Sonon ma hatahon hanima hubani tuanku, hubani si Esau. Sonon do hata ni jabolonmu si Jakob, ʻNa manginsolat do ahu i lambung ni si Laban na saindokah.
5 Marlombu do ahu, marhalode, marbiribiri, marjabolon dalahi ampa naboru; husuruh do patugahkon ai hubani tuanku, ase idop uhurmu mangidah ahu.ʼ”
6 Mulak ma suruhan ai hubani si Jakob, nini ma, “Domma das hanami hubani abangmu, hubani si Esau, anjaha ia pe domma roh manjumpahkon ham rap ampa ompat ratus halak hasomanni.
7 Mabiar tumang ma ia anjaha sosak; ibagi ma hasomanni na rapkonsi, biribiri, lombu pakon untani gabe dua tumpuan.
8 Ai ninuhurni: Anggo roh si Esau hubani tumpuan na sada anjaha ibunuhi, ase maluah tumpuan na tading ai.”
9 Dob ai nini si Jakob ma, “Ham Naibata ni ompungku si Abraham, Naibata ni bapangku si Isak, Ham Jahowa, na mangkatahon hu bangku, ʻMulak ma ho hu tanoh ni hade-hademu, hubahen pe na madear bam.ʼ
10 Maetektu do namin ahu manjalo ganup idop ni uhur pakon habujuron na binahen-Mu hubani jabolon-Mu on, ai marhasoman tungkotkon hudipari Bah Jordan na ijia, hape nuan domma gabe dua tumpuan.
11 Sai paluah Ham ma ahu humbani tangan ni abang, humbani tangan ni si Esau, ai mabiar do ahu bani, atap na roh do ia laho mambogbog ahu ase matei, sonai homa inangnami in pakon dakdanakni.
12 Ai Ham do mangkatahon, ʻSai bahenon-Ku do na madear bam, anjaha bahenon-Ku do ginomparmu songon horsik na i laut, na so tarbilangi halani bueini.ʼ”
13 Lanjar ijai do ia marborngin bornginni ai. Dob ai ibuat ma humbani na adong bani, bahen siluah bani si Esau, abangni ai,
14 ai ma dua ratus hambing boru-boru ampa dua puluh hambing tunggal, dua ratus biribiri boru-boru ampa dua puluh biribiri tunggal,
15 tolu puluh unta na pabagodkon rap pakon anakni, ompat puluh lombu boru-boru ampa sapuluh lombu tunggal, dua puluh halode boru-boru ampa sapuluh halode tunggal.
16 Iondoskon ma ai hubani tangan ni jabolonni, pulig bei satumpuan, lanjar nini ma hubani jabolonni ai, “Parlobei ma hanima mandipar, anjaha marholangkolang ma bahen hanima tumpuan in.”
17 Ihatahon ma bani na parlobei ai, nini ma, “Anggo pajumpah ho ampa abang, si Esau anjaha isungkun ho, ʻJabolon ni ise do ho? Na laho huja do ho? Anjaha ise do simada on na i lobeimon?ʼ
18 Jadi balosi ma, ʻSi Jakob, jabolonmu in do simada in, sibere-bereni do in, na tinongosni hubani tuanku si Esau, anjaha irik do ia hun pudinami.ʼ”
19 Sonai do homa iparentahkon hubani na paduahon, na patoluhon ampa na mangihutkon tumpuan ni pinahan ai, nini ma, “Songon hatangku nongkan ma hatahon hanima hubani si Esau, anggo pajumpah hanima pakonsi,
20 anjaha hatahon hanima homa, ʻJabolonmu si Jakob hun pudinami ope.ʼ Halani ninuhurni, ʻPadearonku do lobei uhurni marhitei sibere-bere na pinaingkat parlobei, dob ai pe ase idahonku bohini, andohar ra ia manjalo ahu.ʼ”
21 Jadi ipaingkat ma sibere-bere ai parlobei, tapi ia sandiri marborngin do bornginni ai i parbarung-barunganni ai.
22 Puho ma ia bornginni ai, iarahkon ma parinangonni na dua ai, jabolonni naboru na dua ai pakon anakni na sapuluh sada ai, laho mandipari pandiparan Jabok.
23 Iarahkon ma sidea anjaha ipadipar bani bah ai, sonai homa sagala na dong bani.
24 Tading ma pitah si Jakob tumang; jadi roh ma sada dalahi margumpul pakonsi das bani na siang ari.
25 Tapi dob iidah lang tolap ia manaluhon si Jakob, ijamah ma popatni gabe ngendul ma popat ni si Jakob sanggah pargumpulanni ai.
26 Dob ai nini ma, “Paluah ma ahu, ai domma laho siang ari.” Tapi nini si Jakob ma, “Seng anjai paluahonku Ham, anggo lang lobei ipasu-pasu Ham ahu.”
27 Nini ma hu bani, “Ise do goranmu?” Ibalosi ma, Si Jakob.
28 Jadi nini ma, “Seng be si Jakob diloon goranmu, si Israel ma, ai iimbang ho do Naibata pakon jolma, anjaha monang do ho.”
29 Isungkun si Jakob ma, “Mahua patugah Ham ma goranmu.” Tapi nini ma, “Mase ma sungkunonmu goranku?” Dob ai ipasu-pasu ma ia ijai.
30 Jadi ibahen si Jakob ma goran ni ianan ai Peniel, ai nini, “Ai domma huidah Naibata padumpar bohi, anjaha ipaluah do hosahku.”
31 Sanggah na nilopusanni Peniel ai, poltak ma mata ni ari, tapi mengkat-engkat do ia halani popatni ai.
32 Halani ai do ase lang ipangan halak Israel urat na manutup popat ronsi nuan, halani na dob hona jamah ai pardomuan ni popat ni si Jakob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA