Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jakup megi anak Laban si dilaki ngerana, "Nggo ibuat Jakup kerina sikerajangen bapanta. Kerina kebayakenna rehna i bas sikerajangen bapanta nari."
2 Idah Jakup pe maka Laban lanai bagi si gelgel e ulina.
3 Emaka nina TUHAN bana, "Mulihlah kam ku taneh bapandu, ku keluargandu. Aku ras kam."
4 Erkiteken si e itenahken Jakup si Rahel ras Lea njumpai ia i mbalmbal ingan asuh-asuhen e.
5 Nina man bana enda duana, "Nggo kuperdiateken maka bapandu lanai bagi si gelgel e ulina man bangku; tapi Dibata bapangku tetap ras aku.
6 Itehndu duana, aku nggo erdahin ras bapandu asa gegehku.
7 E pe i tebu-tebuna kang aku. Nggo sepuluh kali iubah-ubahna upahku. Tapi la ipelepas Dibata aku bene iban kejahatenna.
8 Adi ikataken Laban kenca, 'Kasa kai kambing si meruntik jadi upahndu,' emaka kerina ka asuh-asuhen e meruntik anakna. Kenca ikataken Laban, 'Kasa kai si mekambing jadi upahndu,' emaka kerina ka asuh-asuhen e mekambing anakna.
9 Nggo ibuat Dibata asuh-asuhen bapandu janah IberekenNa man bangku.
10 Sanga asuh-asuhen paksa gutul, ernipi aku maka kuidah kerina kambing bajarna si ngampe beruna e ergaris-garis, mekambing ras meruntik rupana.
11 Ngerana malekat Dibata man bangku i bas nipi e nina, 'O Jakup!' 'Kai,' ningku.
12 'Nen,' nina, 'Bajar si ngampe beruna e, kerina ergaris-garis, mekambing, ras meruntik rupana. Enda Kubahan erkiteken nggo Kuidah kerina perbahanen Laban man bandu.
13 Aku kap Dibata si teridah bandu i Betel, sanga ipersembahkenndu sada batu jadi peringet-ingeten, alu ngamburken minak saitun i babona, janah i je nggo kam ersumpah man bangku. Genduari ersikaplah kam mulih ku taneh inganndu tubuh ndube!'"
14 Nina Rahel ras Lea njabap Jakup, "Lanai kap lit kai pe tading-tadingen man kami i bas bapa kami nari.
15 Nggo seri akapna kami ras kalak tandang-tandang. Idayakenna kami, janah genduari nggo ikerikenna kerina tukur kami e.
16 Kerina kebayaken enda si nggo ibuat Dibata i bas bapa kami nari eme ajang kami ras ajang anak-anak kami. Ban lah kai si nggo ikataken Dibata man bandu."
17 Emaka ersikap Jakup mulih ndahi bapana i taneh Kanaan. Itamakenna anak-anakna ras duana ndeharana ku das unta, jenari igerana kerina asuh-asuhenna leben asa ia ras kasa si idatna i Mesopotami.
18 (Kej 31:17)
19 Sanga si e Laban nggo lawes nggunting mbulu biri-birina. Tupung eme itangko Rahel sembah-sembahen keluarga bapana.
20 Iakali Jakup si Laban, emaka la ikatakenna perberkatna.
21 Ibuatna kerina sikerajangenna, pedas-pedas ia lawes. Ikeparina Lau Eprat, jenari erdalan ia kempak deleng Gileat.
22 Kenca telu wari maka tereteh man Laban maka Jakup nggo kiam.
23 Emaka ibuatna anak buahna, ras ia lawes ngayaki Jakup. Kenca pitu wari, itundukna Jakup i deleng Gileat.
24 Berngi e reh Dibata ndahi Laban i bas nipina nina, "Awas, ula sitik pe kam merawa man Jakup."
25 Jakup nggo ibanna kemahna i datas sada deleng, janah Laban ras anak buahna ibanna ka kemahna i datas deleng-deleng Gileat.
26 Nina Laban man Jakup, "Ngkai maka itipundu aku, janah ibabakenndu anakku ena duana bali ras tahanen perang?
27 Ngkai maka itipundu aku, janah kiam kam alu erbuni-buni dingen la ngata bangku? Adi ngata min kam ndai, tentu kutaruhken kam alu meriah ukur, rende, ralep-alep, alu gendang ras kulcapi.
28 La ipelepasndu pe kuema kempungku ras anakku ena duana lako ngataken mejuah-juah i bas dalan. Bodoh perbahanenndu.
29 Lit kuasangku erban atendu mesui, tapi berngi rebinai Dibata bapandu ngataken man bangku gelah ula kam sitik pe kurawai.
30 Kueteh ngemaka kam lawes perban tedeh atendu mulih, tapi ngkai ka maka itangkondu sembah-sembahen keluargangku?"
31 Nina Jakup njabapsa, "La aku ngata lawes erkiteken mbiar aku ibuatndu mulihi anakndu e duana.
32 Tapi adi i bas ise kari i jenda datndu sembah-sembahenndu e ia ibunuh. Kalak enda kerina jadi saksi i jenda, daramilah kai i je barangndu, janah buat kai sikerajangenndu." La ieteh Jakup maka Rahel nge si nangko sembah-sembahen Laban e.
33 Lawes Laban nggargari kemah Jakup. Kenca e lawes ia ku kemah Lea, terus ku kemah budak diberu e duana, tapi la datsa sembah-sembahenna e. Emaka lawes ia ku kemah Rahel.
34 Sanga si e ibuat Rahel sembah-sembahen keluarga e, jenari itamakenna i bas tas pelana untana, janah kundul ia i babona. Igargari Laban kerina kemah e, tapi la idatsa.
35 Nina Rahel man bapana, "Ula kam nembeh man bangku bapa; la aku banci tedis i lebe-lebendu erkiteken sangana reh bulanku." Igargari Laban kerina tapi la idatsa sembah-sembahen keluargana e.
36 Kenca bage nggo bene kesabaren Jakup, "Kejahaten kai kin si nggo kuban?" nina nungkun alu merawa. "Undang-undang kai kin nge nggo kulanggar, maka iayakindu aku?
37 Genduari nggo igargarindu kerina barang-barang; lit dage i je dat kam sikerajangenndu? Amparken i jenda gelah banci idah anak buahndu ras anak buahku. Kalak enda kari metehsa ise kita si bujur.
38 Nggo dua puluh tahun aku ras kam. Biri-biri ras kambingndu la pernah molas. La pernah kupan sada pe bajar biri-biri asuh-asuhenndu.
39 Adi lit kenca biri-biri si mate ipan rubia-rubia si merawa aku saja ngenca rusur nggengkenca. La kukataken pe man bandu maka labo e salahku. Ipindondu maka kuganti kerina si bene subuk suari ntah pe berngi.
40 Megati mesui ateku iparpari las suari, ras bergehen sanga berngi. Megati pe aku la banci tunduh.
41 Bagem rusur kecibalku kidekah dua puluh tahun aku erdahin ras kam. Sepulu empat tahun dekahna aku erdahin ras kam lako ndatken duana anakndu; enem tahun aku erdahin ngasuhi asuh-asuhenndu. Amin bage pe isambarindu kang upahku sepuluh kali.
42 Adi la kin erkiteken iarak-arak Dibata bapangku aku, eme Dibata si isembah Abraham ras Isak, nggo me aku ipelawesndu pe ngambe-ngambe. Tapi iidah Dibata kiniseranku ras kelatihenku, emaka IberekenNa KeputusenNa."
43 Ijabap Laban Jakup nina, "Diberundu enda duana anakku; anakna pe sikerajangenku, asuh-asuhen enda pe aku empuna. Situhuna kal, kerina siidahndu i jenda ajangku kerina. Tapi erkiteken la tertagangi aku anakku enda duana, bage pe ras anak-anak e,
44 nggit aku erbahan perpadanen ras kam. Mari sipegun-gun batu lako ngingetken kita kerna perpadanenta."
45 Emaka ibuat Jakup sada batu, ipajekkenna jadi batu peringet-ingeten.
46 Isuruhna anak buahna pepulung batu, jenari ipegun-gunna. Emaka man kalak enda i deher pinugun batu e.
47 Iban Laban gelar pinugun batu ndai, "Jegar Sahaduta," tapi Jakup nggelarisa "Galet".
48 Nina Laban man Jakup, "Pinugun batu jadi peringet-ingeten man banta duana." Em sabapna maka iban gelar ingan e Galet.
49 Nina ka Laban tole, "Dibatalah singarak-ngarak kita amin gia kita sirang pedauh." Enda ka pe sabapna maka ingan e igelari Mispa.
50 Iterusken Laban cakapna nina, "Adi igasgasindu anakku enda duana, ntah empo ka kam ras diberu si deban, aminna pe la kueteh, ingetlah maka Dibata si mperdiateken kita.
51 Enda me batu si nggo kupegun-gun jadi baleng i bas kita duana, janah enda me batu peringet-ingeten e.
52 Duana pinugun batu e jadi tanda persinget man banta. Ndigan pe la kulewati pinugun batu enda nerang kam, janah kam pe la banci ngelewati batu peringet-ingeten enda ngelawan aku.
53 Dibata si Abraham ras Dibata Nahor pagi singadili kita." Emaka i bas gelar Dibata sinisembah bapana Isak, ersumpah Jakup matuhi perarihen e.
54 Igelehna sada rubia-rubia, ipersembahkenna jadi kurban persembahen i das deleng ndai. Jenari idilona anak buahna gelah man ras-ras. Kenca elah man, i das deleng e kalak enda erberngi.
55 Pepagina erpagi-pagi iema Laban kempuna ras duana anakna ngataken mejuah-juah i bas perdalanen, emaka lawes ia mulih ku kutana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA