Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas kerina rubia-rubia daraten si ijadiken Dibata, nipe me si cerdikna. Nungkun nipe man diberu ndai nina, "Tuhu kin ikataken Dibata man bandu maka la banci ipanndu sada pe buah batang kayu si i bas peken enda?"
2 Erjabab diberu e nina, "Kerina buah batang kayu si lit ibas peken enda banci nge ipan kami,"
3 "seakatan buah kayu si i tengah peken. Ikataken Dibata man kami maka la banci pan buahna, jemak pe ula. Adi ipan tah ijemak kami, mate kami."
4 Ngaloi ka nipe nina, "Labo tuhu e, labo kam mate.
5 Bage nina Dibata, perban IetehNa kenca ipanndu, bali kam ras Dibata, meteh si bujur ras si jahat."
6 Itatap diberu e batang kayu ndai, tuhu seh kal akapna jilena, janah buahna pe ntabeh nari nge man pangan. Iukurina ka, uga senangna adi arah man buah batang kayu e ndat pemeteh ia. Emaka iputikkenna buah kayu e, ipanna, jenari iberekenna man perbulangenna, janah ipan perbulangenna ka.
7 Nggo kenca ipan kalak ndai buah batang kayu e, minter idatca pengertin janah igejapna maka manjang-anjang ia. Emaka isemitna bulung ara jadi gonjena.
8 Karabenna, ibegi kalak ndai TUHAN Dibata erdalan-dalan i bas peken ndai. Emaka cebuni ia duana i ligen-ligen batang kayu.
9 Ilebuh TUHAN Dibata si dilaki nina, "I ja kam?"
10 Ngaloi ia nina, "Kubegi ndai Kam erdalan i bas peken; mbiar aku, emaka cebuni aku, erkiteken aku manjang-anjang."
11 "Ise ngatakenca maka kam manjang-anjang?" nina Dibata nungkun. "Ipanndu kin buah batang kayu si Kularang e?"
12 Erjabap dilaki e nina, "Diberu si ItamakenNdu ras aku i jenda kap merekenca man bangku, emaka kupan."
13 Isungkun TUHAN Dibata ka si diberu nina, "Ngkai maka bage perbahanenndu?" Erjabap diberu ndai, "Nipe si ngajar-ngajari aku maka kupan."
14 Kenca bage nina TUHAN Dibata man nipe, "Erkiteken perbahanenndu e, kena ukumen kam; i bas kerina rubia-rubia nari kam ngenca kena sumpah enda: Mulai genduari nari njoler kam alu beltekndu, janah kidekah kam nggeluh abu taneh panganndu.
15 Kuperimbangken kam ras diberu enda, bage pe kesusurenndu ras kesusurenna. Kesusurenna merperken takalndu, janah kam nagut tukul-tukul sinursurna."
16 Nina Dibata man diberu e, "Kutambahi kiniseranndu sanga mehuli kulandu. Mesui akapndu sanga mupus. Aminna bage pe metedeh atendu rusur man perbulangenndu, tapi perbulangenndu ngkuasai kam."
17 Nina Dibata kempak dilaki, "Perban ibegikenndu ndeharandu, janah ipanndu buah batang kayu si Kularang e, emaka kena sumpah taneh enda erkiteken kam. Terpaksa kam latih erdahin ngusahaisa kidekah geluhndu, gelah banci iberekenna cukup nakanndu.
18 Dukut-dukut ras sinuan-sinuan si erduri, eme turah i bas taneh enda nari, janah terpaksa ipanndu sinuan-sinuan i juma.
19 Terpaksa igegehindu erdahin alu curcur panasndu, gelah taneh enda banci mereken asil man bandu, seh mulih ka kam ku taneh, sabap i bas taneh nari kam ijadiken. I bas taneh nari kam ijadiken, janah jadi taneh ka kam mulihken."
20 Ibahan Adam gelar ndeharana Hawa erkiteken ia me nande kerina jelma manusia.
21 Kenca bage ibahan TUHAN Dibata uis i bas kulit rubia-rubia nari man Adam ras Hawa, jenari IpakekenNa e man bana duana.
22 Nina TUHAN Dibata, "Genduari manusia e nggo seri ras sekalak i bas Kita, erpemeteh kerna si bujur ras si jahat. Ula bere ibuatna buah batang kayu kegeluhen e, gelah ula ia nggeluh rasa lalap."
23 Emaka ipelawes TUHAN Dibata ia i bas Peken Eden nari gelah iperjumaina taneh, i ja nari ia ndube ijadiken.
24 Arah Timur kebun ndai itamaken TUHAN Dibata malekat kerubim, njemak pedang merara si mawat-awat, njagai batang kayu kegeluhen ndai gelah ise pe la banci ndeher ku je.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA