Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai misir ma si Jakob hunjai, laho ma ia hu tanoh ni halak parhapoltakan.
2 Sanggah na manatap-natap ia, iidah ma sada parigi i sampalan, anjaha dong do tolu hulanan biribiri manggompang i lambungni; ai humbani parigi ai do ipasobur halak biribiri ai. Batu bolon do tutup ni parigi ai,
3 anjaha anggo martumpu ma biribiri ijai, igulangkon parmahan ai ma batu ai humbani babah ni parigi ai, ipasibur sidea ma biribiri ai, anjaha inahkon ma use batu ai bani iananni, hu atas ni babah ni parigi ai.
4 Nini si Jakob ma hubani sidea, “Nasiam hasoman, hunja do nasiam?” Nini sidea ma, “Hun Haran do hanami.”
5 Nini ma hubani sidea, “Itandai nasiam do si Laban anak ni si Nahor?” Balos ni sidea, “Itandai hanami do ia.”
6 Nini ma hubani sidea, “Jorgit-jorgit do ia?” Balos ni sidea, “Jorgit-jorgit do; anjaha tonggor ma, si Rahel, boruni ai, roh mangalai biribirini.”
7 Nini si Jakob ma, “Tonggor ma, gijang ope ari, seng jumpah ope panorang patumpuhon pinahan; pasibur nasiam ma biribiri in, dob ai laho ma nasiam pagagatkonsi.”
8 Tapi nini sidea ma, “Seng tarbahen hanami anggo seng ope martumpu haganup biribiri; dob ai pe ase igulingkon hanami batu in hun babah ni parigi in, anjaha ipasibur hanami biribiri in.”
9 Sanggah na marsahap ai ope ia pakon sidea, roh ma si Rahel rap pakon biribiri ni bapani; ai ia do na marmahan ai.
10 Jadi dob iidah si Jakob si Rahel, boru ni si Laban, botou ni inangni ai pakon biribiri ni si Laban tulangni ai, ipadohor si Jakob ma anjaha igulingkon ma batu ai hun babah ni parigi ai, anjaha ipasibur ma biribiri ni si Laban, botou ni inangni ai.
11 Dob ai isummah si Jakob ma si Rahel, anjaha tangis gogoh-gogoh.
12 Ipatugah si Jakob ma hubani si Rahel, panogolan ni bapani do ia, anak ni si Rebekka; jadi marlintun ma si Rahel patugahkon hubani bapani.
13 Ase dob ibogei si Laban barita ni si Jakob, anak ni botouni ai, marlintun ma ia manjumpahkonsi, idahop ma ia anjaha isummah, anjaha iboan hu rumahni. Jadi ipatugah si Jakob ma hubani si Laban ganup na masa ai.
14 Nini si Laban ma hu bani, “Tongon, holi-holingku ampa dagingku do ho hape!” Jadi i lambungni ma ia sabulan dokahni.
15 Dob ai nini si Laban ma hubani si Jakob, “Halani panogolanku do ho, ra do ho horja raja i lambungku? Patugah ma bangku, aha upahmu!”
16 Dua do boru ni si Laban; goran ni sikahanan si Lea, goran ni si anggian si Rahel.
17 Biri-birion do mata ni si Lea, tapi jenges do rupa pakon bohi ni si Rahel.
18 Holong do uhur ni si Jakob mangidah si Rahel, jadi nini ma, “Marhorja raja ma ahu bamu pitu tahun laho mambuat si Rahel, borumu sianggian ai.”
19 Nini si Laban ma, “Rahanan ma hubam ia hubere, ase hubani halak na legan; i lambungku ma ho.”
20 Ase marhorja raja ma si Jakob pitu tahun laho mambuat si Rahel, anjaha hira piga-piga ari do bani uhurni ai, halani holong ni uhurni mangidahsi.
21 Dob ai nini si Jakob ma hubani si Laban, “Bere ham ma hu bangku parinangonkai ase huparayak ia, ai domma jumpah padanta.”
22 Jadi ipatumpu si Laban ma ganup halak na bani ianan ai, anjaha ibahen ma sada pesta.
23 Tapi dob bodari, ibuat ma boruni si Lea, iboan ma ia hubani si Jakob; jadi ia ma iparayak.
24 Ibere si Laban ma si Silpa, jabolonni naboru ai, hubani si Lea, boruni ai, bahen jabolonni.
25 Tapi patarni ai, tonggor ma, si Lea do hape; jadi nini si Jakob ma hubani si Laban, “Aha do na binahenmu on bangku? Ai lang si Rahel do na sihol buatonku ase marhorja raja ahu bamu? Mase ma ioto-otoi ham ahu?”
26 Nini si Laban ma, “Seng sonin adat i tanohnami on, parlobei palahoon sianggian humbani sikahanan.
27 Iankon ma ia pitu borngin on, ase hubere bam pakon sianggian ai, anggo marhorja raja ho bangku pitu tahun nari.”
28 Jadi ibahen si Jakob ma sonai, iiankon ma ia pitu borngin. Dob ai ibere si Laban ma hubani boruni si Rahel ai bahen parinangonni.
29 Ibere si Laban ma si Bilha, jabolonni naboru ai, hubani si Rahel boruni ai, bahen jabolonni.
30 Jadi iparayak si Jakob ma homa si Rahel, anjaha holongan do uhurni mangidah si Rahel ase si Lea; marhorja raja ma ia pitu tahun nari bani si Laban.
31 Tapi dob iidah Jahowa na so ihargahon si Lea, jumpahan tuah ma ia ibahen, tapi lambang do anggo si Rahel.
32 Jadi boratan rumah ma si Lea, itubuhkon ma sada anak, anjaha ibahen ma goranni si Ruben, ai nini do, “Tongon, itatap Jahowa do hasombuhonku; tontu holong ma uhur ni paramangonku bangku.”
33 Boratan rumah ma ia use anjaha tubuhan anak, jadi nini ma, “Halani itangar Naibata na so hinaholongan ahu, gabe ibere do hu bangku pakon anak on,” jadi ibahen ma goranni si Simeon.
34 Boratan rumah ma ia use, anjaha tubuhan anak, jadi nini ma, “Parapaton ni paramangonku ma dirini hu bangku sahali on, halani domma hutubuhkon tolu anak bani.” Halani ai do ase ibahen goranni si Levi.
35 Boratan rumah ma ia use anjaha tubuhan anak, jadi nini ma, “Pujionku ma Jahowa sahali on.” Halani ai ibahen ma goranni si Juda. Dob ai maronti ma ia tubuhan tuah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA