Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Napappicinikangi KalenNa Batara mae ri Abraham ri ampi’na poko’-poko’ kayu karama’ ri ampi’na tampa’ passambayanganga ri Mamre. Anjo alloa teai sipato’ bambanna alloa, nasitabangi ammempo-mempo Abraham ri pakke’bu’ kemana.

² Accini’ nai’na, nia’mo nacini’ tallu tau ammenteng ri dallekanna. Akkaro-karomi Abraham ero’ mange anruppai ke’nanga. Assu’ju’mi

³ na nakana, "O Karaeng-karaeng, teaki’ lalloi anne kemaku punna tena nakissengka rolong. Kipa’biang laloa’ allayaniki’.

⁴ Boli’mi kamma nakungngalle je’ne’ untu’ anbissai bangkenta ngaseng. Mae maki’ ammari-mari poso irawanganna anne poko’ kayua.

⁵ Lakupappatalangki’ sike’de’ kanre, sollanta anggappa kagassingang untu’ ampatulusuki pa’jappanta. Kipakalompoma’ lanri erotta assengka ri balla’na anne atanta." Appialimi ke’nanga angkana, "Tarima kasi ri anjo kabajikang pa’mai’nu. Lassengkai ikambe."

⁶ Akkaro-karomi Abraham antama’ ri kemana nampa nakana ri Sara, "Akkaro-karoko angngalle labu’ kaminang bajika, nunampa appare’ linta’ roti a’bundala’."

⁷ Nampa lari Abraham mange ri pa’rappungang olo’-olo’ piarana, na napilei ana’ sapi kaminang co’moka siagang lu’muka dagenna. Nampa napassareang anjo sapia mae ri palayanna, nanasuro pasadia linta’.

⁸ Le’baki anjo angngallemi Abraham dadi’, cappa’ susu sapi siagang anjo dageng le’baka nipallu, nampa napatala mae ri anjo toananna ngaseng. Lalang angnganrena ke’nanga, kalenna Abraham allayani ke’nanga irawanganna anjo poko’ kayua.

⁹ Nampa akkuta’nammi ke’nanga angkana, "Kemae bainennu Sara?" Appialimi Abraham angkana, "Anjorengi, lalangi ri kemaya."

¹⁰ Nakanamo kalase’renna ke’nanga, "Salapang bulang sallang sallona nakulammotere’ pole mae anrinni. Na anjo wattua, anjo bainennu Sara langgappami sitau ana’ bura’ne." Anjo wattua niaki Sara ampilangngeri bicaranna ke’nanga ri pakke’bu’ kemaya, ri bokona anjo toanaya.

¹¹ Na anjo Abraham siagang Sara sanna’ sikalimi toana ke’nanga, siagang tenamo nabattu bulanna Sara.

¹² Lanri kammana minjo nammakkala’mo Sara lalang ri pa’mai’na na nakana, "Maka inakke anne tau toa kammaya siagang kalumeng kammaya, lakkulle ija sikatinroang siagang bura’nengku? Nampa pole bura’nengku toa tommi."

¹³ Nampa akkuta’nang Batara ri Abraham angkana, "Angngapa nammakkala’ Sara siagang ranggasela angkanaya maka lakkulle iji allassukang ana’ ri wattu toanamo?

¹⁴ Maka niakka apa tantamaya ri akkala’ untu’ Batara? Sangkamma Kupakkanaya sumpaeng, salapang bulang sallang labattua’ pole mae anrinni. Na anjo wattua lamana’mi Sara sitau ana’ bura’ne."

¹⁵ Lanri malla’na Sara, assassala’mi na nakana, "Tena kummakkala’." Mingka appialimi Batara angkana, "Ammakkala’ memangko sumpaeng."

¹⁶ Le’baki anjo a’lampami anjo tallua toana na niantara’ ri Abraham. Nabattumo ke’nanga ri se’reang tampa’ akkullea nacini’ ke’nanga kota Sodom.

¹⁷ Nakanamo Batara lalang ri pa’mai’na, "Tena Kuero’ anrahasiakangi mae ri Abraham apa eroka Kugaukang.

¹⁸ Sai turunganna la’jari bansa lompoi siagang lakoasai? Sai lanri ia nalaKubarakkaki sikontu bansaya ri lino?

¹⁹ Ia le’ba’mi Kupile sollanna naparentakang mae ri sikamma ana’-ana’na siagang turunganna untu’ amminawang turu’ ri Nakke kammayatompa nagaukang panggaukang bajika siagang adeleka. Punna nagaukangi ke’nanga anjo passalaka, sikontu janjingKu mae ri Abraham laKurupai ngasengi."

²⁰ Nampa Nakana pole Batara mae ri Abraham, "Nia’ tuduhang lompo mae ri kota Sodom siagang Gomora, siagang anjo ke’nanga memang teai sipato’ lompona dosana.

²¹ Iaminjo saba’na Kulanaung mange anjoreng untu’ amparessai, apaka ma’nassa kammatojengi yareka tena anjo tuduhang Kulangngereka."

²² Jari nia’mo rua tau battu ri anjo toanaya a’lampa mange ri kota Sodom, mingka Batara ammantang iji siagang Abraham.

²³ A’reppese’mi Abraham mae ri Batara nampa akkuta’nang angkana, "Maka kammatojengi angkanaya eroki Kipanraki tau tenaya salana assama-sama siagang tau salaya?

²⁴ Ebara’ angkana nia’ limampulo tau tena salana lalang ri anjo kotaya, maka tena taKipanrakina anjo kotaya Karaeng? Maka takkulleai Kipammopporang sollanna akkulle salama’ anjo tau limampuloa?

²⁵ Tea laloi nanibunoi anjo tau tenaya salana assama-sama siagang tau salaya. TeaKi’ Batara! Nasaba’ punna kamma anjo laKigaukang, ma’nassa anjo tau tenaya salana lanipasihukkungi siagang tau niaka salana. Maka akkullei hakinna sikontu linoa la’gau’ tena adele’!"

²⁶ Nakanamo Batara, "Ebara’ angkana nia’ limampulo tau tenaya salana ri kota Sodom, laKupammopporang ngasengi sikontu bonena anjo kotaya, lanri ke’nanga anjo limampuloa tau."

²⁷ Nakanamo pole Abraham, "Kipammopporanga’ lanri baraniku ansambungi anne apa nibicaraya, Batara. Inakke anne poro tulinoja’ bawang, siagang tena hakku untu’ appau.

²⁸ Mingka barang nia’ patampulo allima tau bawang tena salana, jari tanggannakkai limampulo. Maka laKipanrakki sikontu anjo kotaya lanri sisala limana bawang anjo tau tenaya salana?" Nakanamo Batara, "TalaKupanrakiai anjo kotaya ebara’ angkana nia’ Kugappa anjoreng patampulo allima tau tena salana."

²⁹ Nakanamo pole Abraham, "Antekamma punna patampuloji bawang jaina tau tena salana?" Appialimi Batara angkana, "Lanri anjo patampuloa tau talaKupa’jariai niakKu."

³⁰ Nakanamo pole Abraham, "TeaKi’ larroi Batara, pungku a’bicara ija. Antekamma punna tallumpuloji bawang tau?" Nakanamo Batara, "Punna nia’ Kugappa tallumpulo tau talaKupa’jariai niakKu."

³¹ Nakanamo Abraham, "Kipammopporanga’ lanri barani kupannarrusu’na anne bicaraya, Batara. Ebara’ angkana ruampuloji bawang tau?" Appialimi Batara angkana, "Punna nia’ Kugappa ruampulo tau, talaKupanrakiai anjo kotaya."

³² Kala’busanna nakanamo pole Abraham, "TeaKi’ larroi Batara, sikali mama’ la’bicara. Antekamma punna sampuloji bawang tau anjoreng?" Nakanamo Batara, "Punna nia’ sampulo tau tena salana, talaKupanrakiai anjo kotaya."

³³ Le’baki a’bicara Batara siagang Abraham, a’lampami Batara, nampa ammotere’ tommo Abraham mae ri balla’na.

Kejadian

Video Kejadian 18

Ikuti Kami:

KONTAK | PARTISIPASI | DONASI