Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 TUHAN ncidahken BaNa man Abraham deher batang-batang kayu ingan ersembah i Mamre. Sanga e wari seh kal lasna, janah Abraham sangana kundul i lebe pintun kemahna.
2 Tupung ia jurgak idahna telu kalak tedis i lebena. Minter kenca iidah Abraham kalak ndai, kiam ia ngalo-ngalosa. Janahna erjimpuh, ayona seh ku taneh nina,
3 "O Tuan mari ngadi lebe janah singgah ku rumahku. Berelah maka aku ngidangi kam.
4 Banci kulegiken lau man pemurihi nahendu. I teruh batang kayu enda kam lebe ngadi-ngadi.
5 Kusikapken lebe pangan man bandu, gelah banci nambahi gegehndu guna nerusken perdalanenndu. Sabap nggo kam reh ku inganku enda, e sada kehamaten man bangku, emaka kuelai ateku kam asa bancina." Ngaloi kalak si telu ndai, "Bujur adi bage."
6 Minter kiam Abraham ku kemahna, janah nina man Sara, "Pedasken, buat tepung si mejilena sada guni, aduk, tasakken jadi roti asa biasna."
7 Kenca bage kiam Abraham muat sada lembu si mburna kal tapi nguda denga; paksa ntabeh man pangan. Emaka iberekenna man sekalak suruh-suruhenna. Minter igeleh suruh-suruhen ndai lembu si ibereken Abraham e, jenari itasakkenna.
8 Ibuat Abraham susu si mejilena, bage pe daging si nggo itasakken ndai. Kenca bage isikapkenna i lebe-lebe temuena ndai, janah Abraham jine ngelai kalak enda man i teruh batang kayu e.
9 Isungkun temue e Abraham nina, "I ja Sara ndeharandu?" "Ia i bas kemah," nina Abraham.
10 Sekalak i bas si telu kalak ndai ngerana nina, "Siwah bulan nari, reh ka Aku ku jenda, ije pagi Sara nggo mupus sada anak dilaki." Sara megi-megi arah pudina, i balik pintun kemahna nari.
11 Abraham ras Sara nggo seh kal tuana; emaka lanai bo reh bulanna.
12 Emaka tawa Sara nina i bas ukurna, "Banci denga kin merincuh aku man perbulangenku adi aku pe nggo melus, janah perbulangenku pe nggo seh tuana?"
13 Jenari isungkun TUHAN si Abraham nina, "Uga maka tawa Sara nina, 'Banci denga kin aku mupus adi bagenda tuangku?'
14 Lit kin si metahat i bas TUHAN? Bagi ningKu ndai siwah bulan nari Aku reh ka ku jenda; ije pagi Sara nggo mupus sada anak dilaki."
15 Erkiteken mbiar Sara, merso ia nina, "La kap aku tawa." "Kueteh nge kam tawa," nina TUHAN ngaloisa.
16 Kenca bage lawes kalak si telu ndai ku sada ingan, janah ije nari banci ia natap kempak Sodom. Abraham pe ikut naruhkenca.
17 Nina TUHAN i bas UkurNa, "Labo pada Kubuni-buniken man Abraham kerna kai ateKu si Kubahan tik nari.
18 Kesusurenna jadi sada bangsa si mbelin ras erkuasa pagi, janah arah ia, Kupasu-pasu kerina bangsa-bangsa.
19 Nggo Kupilih Abraham, gelah banci iperentahkenna anakna ras kesusurenna gelah patuh man bangKu, janah ilakokenna kai si benar ras bujur. Adi bage, Kusehken pagi man bana kasa kai si nggo Kupadanken."
20 Kenca bage nina TUHAN man Abraham, "Lit pengadun si mberat kerna perbahanen si melket i Sodom ras Gomora; dosana nggo seh belinna.
21 Emaka ngincuah ateKu ku jah, pepayosa tuhu tah lang pengadun perbahanen si melket e."
22 Kenca bage dua i bas temuena ndai nerusken perdalanenna kempak Sodom, tapi TUHAN tading ras Abraham.
23 Ideheri Abraham me TUHAN nina, "Tuhu kin ImasapkenNdu AteNdu kalak benar radu ras kalak jahat?
24 Adi lit 50 kalak ije kalak si benar, IcedakenNdu kang kerina kota e? La AteNdu IselamatkenNdu, erkiteken si lima puluh kalak e?
25 Tentu la AteNdu munuh kalak benar radu ras kalak jahat. E la banci jadi; la banci IlakokenNdu e. Adi IcedakenNdu kin kota e tentu bali IbahanNdu ukumen kalak benar ras kalak jahat. Enda la banci jadi. Adi bage la bujur perbahanen Hakim kerina doni."
26 Ngaloi TUHAN nina, "Adi lit 50 kalak Kujumpai si benar i Sodom, kerina kota e Kuampuni erkiteken si 50 kalak e."
27 Nina ka Abraham tole, "Ula AteNdu merawa adi kuterusken ngerana ras Kam TUHAN. Aku abu taneh kap ngenca; la lit hakku ngataken kai pe man BaNdu.
28 Tapi banci jadi 45 kalak ngenca lit si benar, labo 50 kalak. IcedakenNdu kang kerina kota e erkiteken kurang lima kalak?" Nina TUHAN, "La Kucedaken kota e adi lit dat aku 45 kalak si benar ije."
29 Ngerana ka tole Abraham, "Uga adi 40 kalak ngenca?" Ijabap TUHAN, "La Kucedaken adi lit 40 kalak."
30 Nina Abraham, "Ula Kam nembeh TUHAN, ngerana denga nge ateku. Uga adi 30 kalak ngenca lit?" Nina TUHAN, "Adi lit dat Aku 30 kalak, la Kulakoken e."
31 Nina Abraham, "Ampunilah aku TUHAN aminna pangsa pe aku ngumputi percakapen enda ras Kam. Uga adi lit 20 kalak lah gia?" Nina TUHAN, "La Kucedaken kota e adi lit dat Aku 20 kalak."
32 Nina Abraham, "Ula Kam merawa TUHAN, ateku ngerana sekali nari kal. Uga adi lit 10 kalak ngenca?" Nina TUHAN, "La Kucedakan kota e adi lit Aku jumpa 10 kalak si benar."
33 Kenca TUHAN nggo dung ngerana ras Abraham, lawes Ia janah Abraham pe mulih ku rumah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA