Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN man Abram, "Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi.
2 Nterem Kubahan sinursurndu, janah eme pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.
3 Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa."
4 Kenca umur Abram 75 tahun, berkat me ia i Haran nari bagi si isuruh TUHAN. Si Lut pe berkat ras ia.
5 Abram maba ndeharana Sarai, Lut anak seninana, kerina erta-ertana, ras budak-budakna si idatsa sanga ia i Haran, jenari berkat ia ku Kanaan. Kenca seh i Kanaan,
6 isiar-siarna kerina daerah e, janah dungna seh ia ku batang kayu Moreh, eme ingan ersembah i Sikem. (Paksa e kalak Kanaan ngianisa taneh e.)
7 Icidahken TUHAN BaNa man Abram, janah nina, "Enda me negeri si Kubereken man si nursurndu pagi." Jenari, ibahan Abram sada batar-batar ingan persembahen man TUHAN si nggo teridah bana.
8 Kenca bage miser Abram ku Selatan, ku taneh uruk-uruk si lit arah Timur Betel, janah ipajekken Abram kemahna kelang-kelang Betel ras Ai. Betel arah matawari ben, Ai arah matawari pultak. I je pe ibahanna ka batar-batar ingan persembahen, janah isembahna TUHAN.
9 Jenari pindah-pindah ka ia i bas sada ingan ku ingan si deban. Kenca si e lawes ia ku taneh Kanaan bagin Selatan.
10 Tapi jadi me kelihen si mesangat i taneh Kanaan, janah erkiteken si e erdauhna Abram lawes ku Selatan, ku negeri Mesir, guna ringan i je kentisik.
11 Nandangi seh i Mesir nina Abram man ndeharana Sarai, "Situhuna seh kal kam jilena.
12 Adi iidah kalak Mesir kam, tentu ikatakenna kam ndeharangku; erkiteken si e ibunuhna aku tapi kam ipelepasna nggeluh.
13 Emaka katakenlah man kalak Mesir, maka turangku nge kam, gelah erkiteken kam, la ibunuhna aku, tapi mehuli perbahanna man bangku."
14 Kenca Abram seh i Mesir iidah kalak Mesir maka ndehara Abram seh kal jilena.
15 Piga-piga kalak si ngidahsa, eme pegawai istana; emaka ituriken pegawai ndai man raja uga jilena rupa Sarai; erkiteken si e Sarai ibaba ku istana raja.
16 Erkiteken Sarai, emaka mehuli kal perbahanen raja man Abram, seh maka iberekenna man Abram melala biri-biri, kambing, lembu, kalde, suruh-suruhen, ras unta.
17 Tapi erkiteken ibuat raja si Sarai iukum TUHAN ia ras kalak si ringan i bas istanana alu penakit si ngeri.
18 Emaka idilo raja si Abram, isungkunna ia, "Uga kin perbahanenndu e! Ngkai maka la ikatakenndu maka ndeharandu nge si Sarai?
19 Ngkai maka ikatakenndu ia turangndu janah ipelepasndu ia kubuat jadi ndeharangku? Enda ndeharandu ndai, baba, lawes kam jenda nari!"
20 Emaka iperentahken raja piga-piga kalak pegawaina, jenari ipelawesna Abram ras ndeharana ras kerina sikerajangenna i bas negeri e nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA