¹ Ahaksa anakarekam: Walasna, bi zik de tinkim, dekam bi zik mo bi gwibin kire-kirena zen sa kitak bi gwibiri. Hwena walasna in de nama betek nik gwenkam, zen iye zik mo tana iltikinnik sa gwe gwera– san de babu gwen zini kiye.
² Kim de hataꞌak yaklana mensa bi swe zem dam tasiki, tahunna kim de sowe henkam altilsibliꞌak, zen dekam sa bi swe zik mo kire-kire hli tan danna zen hwena bi gweblan dala. Nama de betek nik gwennak, dekam aha zi sa mam dal.
³ Nen hen ki kirekame egwek. Nen menkam walas betek mo kime lowehe gwek. Nen dekam namae auhu-kama en hap de enlala naban lowehe gwek, hen dowal-dowal nesa bi neibirida gwek. Zep nen dekam namae titi tabin olkam de nesa walas betek mo kim akan-akan gwibirida gwen hap edwam gwe-gwek.
⁴ Hwena yaklana mensa Bian Alap dam tasiki, zao kim hatak, dekam zep Tane zemka zer soneka. Desa dekam zep Yahudi we jaha gwek. Hendep beteknak Zen hen Musa mo titi tabin ol san ang gwe zaheka.
⁵ Zen kitak Alap mo dwam gwibin sin ki lwak– dekam de nesa Musa mo titi tabin ola kon hil ti sonebin hip, nen dikim Alap mo hanan tabin walas hap ejowen hapye.
⁶ Eiwa, nen an Alap mo hanan tabin walas. In zep Tane zik mo Enhona zer soneka– neno mae mo enhonak de ing gwehen hapye. Zen in zebe enho nakon anakan en sone gweblanan, “Bian, ano Bian.”
⁷ Zep nen angkam walas beteksa de aha zi hanan tan mo kim home lowe heꞌan. Nen an hwena angkam Alap onak de zise gwen walas. Zen zep esa eiwa heꞌho gwibinni insa hla kul– mensa Zena anakan gu-gubirida gwekaye, “Ëe asa kiresa ere mo walas hap golzim.”
⁸ Galatiak de zi, ee ama emsa ngalap gwibiridaꞌan. Em ba habe Alapsa nabakam hli laꞌan? Em kime Alapsa tame la srem gweꞌak, em dekam totore yang tasibin dowal-dowalsae betek eibirida gwek– san de zebon mae de ebabu gwenna kiye.
⁹ Hwena em sap mese ner hom eiwa de Alapsa tame lak. Ahaksa sap diki Alap mes ebe mae hap golzimki– dekam de Zenaka tame tan hap denaye. Zep em ba habe angkam etan auhu-kama enlala san dep lwanda haꞌan? – dowal-dowal dikim etan emsa bi gwibiridan hapye. Em san ema edwam gweꞌan? – zi mo yasik tabin sin de ang tankam de etan emsa totore titi tabin olkam tahalebin hipye.
¹⁰ Zep hendep angkam ema Hari Sabat san, sap yakla yawal, hen ben yawal mae hap de syal san ang ta gweꞌan.
¹¹ Ki san ha ee waba habe ebe mae hap de dawem hap danna sin gwe-gwek?!
¹² Aya-wal oso-wal, ee ama emsa gubiridaꞌan: Ano kim emki lowehe gwen. Ëe kime eban mae golelowehe gwek, ee home Yahudi zi mo kirekam de lowehen san gwe gwek. Zep angkam em bahem desan ang ta gwen. Em sap nonol dawemkame asa kwang la gwek, hen home mae asa husus e gweblak. Emki etan kirekam asa gweblan. Em dwan tawa nakake: Ëe dekam ama sang-sang gwek. In zebe nonol ebon mae gwe gwek. Hendep dekam zebe ol dawemkam emsa tonbirida gwek. Ano sang-sang habe ehir-hir gwe-gwek, hen eno mae mo syala dekon zep mam gwe-gwek. Hwena em dekam home asa husus e gweblak, hen home asa ulop e gweblak. Em hwena gola kon dawemkame asa kwang la gwek– men kiye, Alap mo dam taha nakore zisi de kwang tanna. Hen ema asa blikip eisik gweblak– san de Kristus Zen de zini gwe zanna kiye.
¹³ (4:12)
¹⁴ (4:12)
¹⁵ Em dekam dawemkame asa isrip-sri e gweblak. Hwena angkam home! Ëe tawana: Menkam em sap ema edwam gwe-gwek– ere mae mo nwesa de abe hap teisyablan hap, ee dikim etan dawemkam kara gwe-gwen hap!
¹⁶ Hwena angkam sap ola an eiwa de tangan nakae ale gulzimꞌin, zep em ema yap asa enlala eblaꞌan, “Zen ano mae mo jal zi.”
¹⁷ Angkam aha zi dan syal-syala ban emsa haen-haen neibirida gweꞌan, “Nen ki Musa mo titi tabin ola an san ang ta gwen.” Hwena zen enlala karek naban! Zen man em dikim abon onakon wet so gwen hap edwam gwe-gweꞌan– dekam de zebon mae en osan enlala syal-syala ban ang ta gwen hapye.
¹⁸ Banakare enlala dawem san de ang tan hap, em sap esa dan syal-syala ban ang ta gwer– sap ee de iwe gwennak, hen sap ee de iwe gwen sremnak. Hwena karek san dep bahem!
¹⁹ Ano walas, ee ama emsa dawemkam ngalap gwibiridaꞌan. Ëe ama emsa anakan kil tibik, “Zen mes-am Kristussu de taibliblannak etatete gwek.” Hwena angkam ema etan walas betek san dep lwanda haꞌan.
²⁰ Diki angkam aen de eban mae etan golegwenkam bap. Ki amaka samkam emsa anakan goletonꞌan, “Ba nakone ki egweꞌan?” Hwena angkam ee ama anakare jakal enlala naban emsa topse gwibiridaꞌan, “Zen bawalkam sa tame nul?”
²¹ Asa sane lak! – em in zene Musa mo titi tabin olsa de nihin dohon-hon makan wei yulsuk gwen hap edwam gweꞌanye. Em san home aisili ansa dam ulsuk– mensa Musa hen ale gulkuye?
²² Zen a kirekam mo: Abraham zen walasna dan we soka. Ahana mas wenya Hagar hon we taka. Zen tana iltikinnik de babu gwe-gwen we. Ahana nonol we zem Sara hon we taka. Zen tana iltikinnik de babu gwe-gwen naka hom.
²³ Tana iltikinnik de wenyik mo walasna, Ismael, desa totoresa jaha gwek. Hwena Sara mo dena kip, Alap man Abrahamsa gu-guk gweblaka, “Sara sa walassa we tal.” Hendep dekam zep ki bogolak owas hap Isaksa jaha gwek.
²⁴ We darena in ama ki gulk sun de ol blaoran hap guzimnin. We darena in, zen Alap mo zi niban de ol ziaha-en gun dare naban de apde son. Tana iltikinnik de wenya Hagar mo walasna, Ismael, zeno auyan-tane walya zen hen tana iltikinnik sa lowehe gwer. Zen men kiye– men zen titi tabin ol san ang ta gwenan, mensa Alap kwatapna Sinaik Musa hap golblakake. Zen desa nihin dohon makan wei nulsuk tine gwenan– tana iltikinnik de zi mo kim.
²⁵ Zep Hagar Bak, zen kwatapna Sinaisa de enlala gweblan– Arab mo langnak de kwatapna insa. Zen tana iltikinnik de we, hendep auyan-tane wal zem hen kirekam sa lowehe gwer. Hagar Baksa hen Yahudi mo e yawala Yerusalem han de apde son. Sap Musa mo titi tabin ola in mes zewe de zini hulek.
²⁶ Hwena neno mae mo anena, zen ngatan zi mo langnak de Yerusalem. Zen zena wenya, Sarasa de enlala gwibin. Zen tana iltikinnik de gwen wesya hom. Zep nen hen kirekam de egwen– banakare titi tabin ol mae de nesa tahalebin sremkam.
²⁷ In zep Alap mo olak Sara Bak hap dena anakan ale nuk, “Em sap walassa de we tan srem we, hwena angkam esa isrip-sri gwe-gwera! Em eisbir anen sremkam gwe gweka, hwena angkam esa Alap hap de terya ta gwera! Sap eno walasna menkam hom, hwena angkam eno walas mo beyana man tangan taman kiniꞌan. Tingare ahakore we wal mo walasna man lwala heꞌan.”
²⁸ Zep aya-wal oso-wal, nen kitak Sara mo walasna Isak mo kime lowe heꞌan. Zen Alap mo gu-gublun naka Sara jaha gwek. Nen hen kirekam zebe Alap mo gu-gubiridan nakon zere mo hanan tabin walas hap ejoweꞌan.
²⁹ Hwena zao zep lwak: Mas wenya insa totoresa Ismaelsa we tak, zen zep hwena Alap mo Enhokam de we tan zini Isaksa karek ta gweka. Zen in zep ki hendep angkam kirekam lwa gweꞌan: Men zen totore enlala san ang ta gwenan, zen zep karek da gwibirin– men zen Alap mo Enho san de ang tankam zere mo walas hap ejowe gwenanye.
³⁰ Zen zep Alap mo olak Abraham hap dena anakan lwak, “Tana iltikinnik de mas wenya insa tane zeban emki zialsa sonen. Ki hwena em de tinkim, Ismael sa eno kire-kire hli tan danna Isak han bi eblan dala. Sap zena wenya in mo walasna, Ishak, zen diki zen sa kitak bi gwibiri.”
³¹ Zep aya-wal oso-wal, nen an tana iltikinnik de we mo walassa hom. Zep home Musa mo titi tabin ola nihin dohon-hon makan wei kulsuk gwenan. Nen an hwena tana iltikinnik de gwen srem we mo walas, sap nen Alap mo Enhosae ang eblaꞌan.