Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob salosei ganupan ondi, roh ma pangintuai-pangintuai marayak ahu, nini ma, “Ia bangsa Israel, malim-malim ampa halak Levi seng ipapulig sidea dirini humbani bangsa-bangsa na i nagori-nagori ai ampa humbani hasamboron na hinorjahon ni sidea; humbani halak Kanaan, Het, Peres, Jebusi, Amon, Moab, Masir pakon Amori.
2 Ai ibuat sidea do boru ni sidea bahen parinangon ni sidea ampa parinangon ni anak ni sidea, gabe agu bonih na mapansing ai rap pakon bangsa-bangsa sipajuh begu-begu na i nagori-nagori ai; anjaha kopala-kopala pakon sipambobai do na parlobei na mandalankon hajahaton ai.”
3 Jadi dob hutangar ai, hurigati ma pakeianku pakon mantelhu, hutariki jambulan ni ulungku ampa gumisku, anjaha jut uhurhu hundul.
4 Jadi marrohan ma hu lambungku haganup halak, na marhabiaran bani hata ni Naibata ni Israel, halani panlanggaron ni halak, na mulak hun habuangan ai; tapi anggo ahu jut do uhurhu hundul ronsi panorang panggalangon bodari.
5 Tapi bani panorang panggalangonkon bodarini ai jongjong ma ahu humbani parpuasaonkai, marpakeian ampa marmantel na marigat, manrogop ma ahu anjaha hupaherbang ma tanganku haduasi hubani Jahowa, Naibatangku,
6 dob ai ningku ma, “Ham Naibatangku, maila do ahu anjaha mabiar padirgak bohingku dompak Ham. Ham Naibatangku, ai domma isalpui hajahatonnami ulunami, anjaha salahnami sundol das hu nagori atas.
7 Humbani panorang ni ompungnami nari ronsi sadari on ibagas salah banggal do hanami, anjaha halani salahnami do, ase ipadas hanami, raja-rajanami, age malim-malimnami hubagas tangan ni raja-raja ni nagori-nagori ai, hubani podang, hu habuangan, bahen sitabanon pakon hubani habadoron na talar, songon na masa sadari on.
8 Tapi anggo nuan jumpahan idop ni uhur do hanami humbani Jahowa, Naibatanami, ai itebai ope manggoluh simasima bennami, anjaha ibere do bennami arihan ibagas ianan-Ni na mapansing in, ase ipalihar Naibatanami matanami, anjaha iapohi hanami otik ibagas parjabolonannami.
9 Ai jabolon do hanami tongon; age pe sonai seng itadingkon Naibatanami hanami ibagas parjabolonannami ai, tapi ijuljul do raja ni Persia maridop ni uhur bennami, gabe ibere hanami otik marhosah, laho pajongjong rumah ni Naibatanami anjaha paulihon na maseda ijai, anjaha ibere do bennami sada tembok paronding-ondingan i Juda pakon i Jerusalem.
10 Ai pe, aha ma hatahononnami, Ham Naibatanami dob on? Ai domma itadingkon hanami titah-Mu,
11 ai ma na tinonahkon-Mu marhitei humbani pamangan ni juakjuak-Mu, sagala nabi, Nimu, ʻIa tanoh, sisolukonnima ai, tanoh na butak do ai. Butak do ai ibahen bangsa-bangsa marhitei hasamboron ni sidea ai; gok do ai humbani ujung hu ujung ibahen habutakon ni sidea ai.ʼ
12 Halani ai ulang ma bere hanima borunima hubani anak ni sidea, anjaha ulang ma buat hanima boru ni sidea hubani anaknima. Antigan pe lang bulih tumpakonnima sidea mardamei-damei anjaha sonang, ase lambin margogoh hanima, anjaha ipangan hanima hadearon ni tanoh in, anjaha teanonnima in das hubani ginomparnima ronsi sadokah ni dokahni.
13 Anjaha mardingat haganup na dob sogop bennami, halani pambahenannami na bajan ai pakon halani salahnami na buei ai, anjaha mangidah na hurang ope panguhum-Mu bennami, ham Naibatanami, domu hubani hajahatonnami, anjaha sonai bueini ope simasima, na manggoluh ibere Ham bennami,
14 mintor patut ma namin ulakannami mangosei titah-Mu anjaha marsibuatan boru hanami pakon bangsa sihagigihononkon on? Ai lang patut ma manringis Ham bennami anjaha siap hanami bahenon-Mu, sada pe lang tading atap maluah?
15 Ham Jahowa, Naibata ni Israel, na bonar do Ham, ai tading do hun bennami simasima, na manggoluh songon na talar sadari on. Tonggor Ham ma, jongjong do hanami i lobei-Mu ibagas hasalahannami; ise pe lang na tahan jongjong i lobei-Mu ibagas pambahenan na sonon.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA