Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca si e ndai nggo dung kerina, reh piga-piga kalak pengulu bangsa Israel ndahi aku, janah ikatakenna maka bangsa e, bage pe imam-imam ras kalak Lewi, la iserapkenna bana i bas anak negeri si pedeher ras ia, eme kalak Amon, Moap, ras Mesir, ntah pe i bas kalak Kanaan, Heti, Peris, ras Amori nari. Perbahanenna bali melketna ras perbahanen bangsa-bangsa e.
2 Dilaki bangsa Jahudi ngempoi singuda-nguda bangsa si deban, janah erkiteken si e bangsa Dibata nggo ilangketi bangsa si deban. Pengulu ras pegawai-pegawai me si melalana erbahan salah.
3 Kenca kubegi si enda, kucaingken pakenku, kuruah buk takalku ras janggutku, jenari kundul aku alu dem ate ceda.
4 Kundul aku i je alu ate ceda ngayak seh paksana mpersembahken persembahen si karaben. Erkiteken si e mulai me kalak pulung i sekelewetku, eme kalak si mbiar erkiteken kai si ikataken Dibata Israel kerna dosa-dosa kalak si nggo mulih i bas pembuangen e nari.
5 Kenca nggo seh paksa persembahen karaben, keke aku i bas inganku erceda ate e nari, jenari alu ruisken paken si merigat-rigat e, erjimpuh aku, kuangkat duana tanku ertoto man TUHAN Dibatangku.
6 Ningku ertoto, "O, Dibatangku, lanai kal aku pang nare kempak Kam perban mela kal kuakap. Sabap dosa-dosa kami nggo ergun-gun janah ganjangen asa takal kami. Salah kami nggo asa langit ganjangna.
7 Mulai i bas paksa nini-nini kami nari seh genduari kami BangsaNdu, nggo mbelin kal dosa kami. Erkiteken dosa-dosa kami, raja-raja kami ras imam-imam kami nggo ndabuh ku bas tan raja-raja si deban, janah kami nggo itampul, irampuk, janah ibuang ku negeri si deban. Lanai tanggung penggombangi kalak man kami, janah seh genduari pe bage denga.
8 Tuhu genduari, i bas paksa si kentisik, O TUHAN Dibata kami, nggo melias AteNdu kempak kami janah piga-piga kalak i bas kami nari nggo IbereNdu pulah i bas perbudaken nari janah nggeluh alu teneng i bas ingan si badia enda. Nggo IberekenNdu man kami kegeluhen si mbaru aminna gia kami iperkawanken.
9 Gelgel nari kami nggo jadi budak, tapi la ItadingkenNdu kami. Ngena ate raja-raja Persia man kami IbahanNdu, emaka ipelepasna kami tetap nggeluh ras majekken Rumah Pertoton mulihi, si gelgel nari nggo runtuh, janah banci ndatken ketenengen i Juda ras Jerusalem enda.
10 Tapi genduari, o Dibata uga nari ningkami ngerana man BaNdu kenca kerina kejadin enda? Nggo ka kami mulihken ngelanggar perentah-PerentahNdu
11 si IberekenNdu arah suruh-SuruhenNdu, nabi-nabi. Ituriken nabi-nabi e man kami maka negeri si nandangi iingani kami e negeri si melket, sabap kalak si ngianisa ndemi negeri e kenjahe nari seh ku kenjulu alu perbahanen si pantang dingen melket.
12 Ikataken nabi-nabi e man kami maka la banci ndigan pe kami siempon ras bangsa e janah la banci isampati kami i bas ia ndarami kebayaken ntah pe nehken sura-surana, adi kin ate kami tetap man ulih taneh e dingen ngendeskenca man kesusuren kami.
13 Tuhu nggo IukumNdu kami erkiteken salah dosa kami. Tapi arah ukumen e pe ieteh kami maka ukumen si IsehkenNdu man kami nahangen asa si patut ialoken kami sabap nggo IpelepasNdu kami tetap nggeluh.
14 Adi bage banci kin mulihi kami la mperdiateken perentah-PerentahNdu janah siempon ras bangsa si jahat enda? Adi bage perbahan kami, la banci la merawa Kam kempak kami seh maka IkernepkenNdu kami seh keri janah la lit sada pe si tading.
15 TUHAN Dibata Israel, bujur kap Kam, tapi nggo IpelepasNdu kami tetap nggeluh. Iakuken kami kesalahen kami man BaNdu. Si tuhuna la lit hak kami reh ku adep-AdepenNdu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA