Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo wattua nia’ rua na’bi, iamintu Hagai siagang Zakharia ana’na Ido, appakkaramulami a’bicara ampabattui lalang arenNa Allata’alana Israel mae ri tu Yahudi ammantanga ri Yehuda siagang ri Yerusalem.
2 Nalangngere’na pappasanna anjo ruaya na’bi, appakkaramulami linta’ Zerubabel ana’na Sealtiel, siagang Yesua ana’na Yozadak, ambangungi ammotere’ Balla’Na Batara ri Yerusalem, nampa nibantui ri anjo ruaya na’bi.
3 Mingka linta’mi battu Tatnai, guburnur propinsi Efrat bageang ilau’, siagang Syetar-Boznai, kammayatompa agang-aganna ngaseng mange ri Yerusalem nampa akkuta’nang ri tu Yahudia, angkana, "Inai assuro ngasengko ambangungi siagang ampa’langkaki anne Balla’ Sambayanga?"
4 Napakkuta’nangngang tommi ke’nanga areng-arenna sikontu tau ambantuai tu Yahudia ambangungi anjo Balla’Na Batara.
5 Mingka niparhatikangi siagang nijagai ri Allata’ala anjo pamimping-pamimpinna tu Yahudia, sa’genna tenapa nangngalle tindakang sikamma pamarentana Persia ri anjo pa’rasanganga punna tenapa nale’ba’ akkiring sura’ ke’nanga siagang anggappa sura’ balasang battu ri Karaeng Darius.
6 Iaminne laporang nakiringa ke’nanga mange ri karaenga,
7 "Mae ri dallekang mala’biri’na Karaeng Darius. Poro salewangangki’ lalang ri pamarentahanta, karaeng!
8 Poro kiassengi karaeng, angkanaya le’baki ikambe a’lampa mange ri propinsi Yehuda. Nampa nacini’ ikambe angkanaya anjo Balla’Na Batara, Allata’ala malompoa ri Yerusalem, kamma-kamma anne nibangungi ammotere’. Batu-batu lompo nipake ambangungi nampa nilapisi kayu sikamma tembo’-tembo’na. Sanna’ tutuna batena nigaukang anjo jamanga, siagang bajiki jappana.
9 Nampa akkuta’nang ikambe ri sikamma pamimpinna anjo bansaya, angkana inai le’ba’ assarei ising ke’nanga untu’ ambangungi ammotere’ anjo Balla’ Sambayanga siagang ampa’langkaki.
10 Napakkuta’nangngang tommi ikambe sikamma areng-arenna ke’nanga sollanna akkulle nilaporo’ mae ri karaenga angkana inai-nai angkapalai anjo jama-jamanga.
11 Appialimi ke’nanga angkana, ‘Ikambe anne atannaki’ Allata’ala makoasaya ri sikontu linoa. Nabangungi ikambe ammotere’ Balla’Na Batara le’baka nibangung siagang nipa’langka’ appulo-pulo taung allaloa ri sitaua karaeng Israel malompo.
12 Mingka lanri anggappana pangngalarroi boe-boena ikambe battu ri Allata’ala makoasaya ri suruga, jari napassareammi ke’nanga mae ri kakoasanna Nebukadnezar, karaeng Babel battu ri turungang tu Kasdim. Naancuru’mi anjo Balla’ Sambayanga nampa naerang bansana ikambe mange ri Babel.
13 Nampa Kores a’jari karaeng Babel. Ri taung makase’re ri pamarentahanna, appasuluki sura’ parenta sollanna nibangung ammotere’ anjo Balla’Na Batara.
14 Ba’lalo napoterang ngaseng tommi sikamma pakkakasa’-pakkakasa’ bulaeng siagang pera’ parallua nipake lalang ri Balla’Na Batara, ia le’baka naalle Nebukadnezar battu ri Yerusalem nampa napantama’ ri balla’ rewataya ri Babel. Anjo sikamma pakkakasaka napassareangi Karaeng Kores mae ri tu niarenga Sesbazar, niangkaka a’jari guburnur Yehuda.
15 Nisuroi ri karaenga angngallei anjo sikamma pakkakasaka nampa napoterang mange ri Balla’Na Batara ri Yerusalem, kammayatompa na nabangung ammotere’ anjo Balla’Na Batara.
16 Jari battumi Sesbazar mange ri Yerusalem nampa napadongko’ batu pundasina anjo Balla’Na Batara. Appakkaramula anjo wattua sa’genna kamma-kamma anne a’jappa turusmi anjo pambangunanga, mingka tena tompa nale’ba’.’
17 Punna kikellai karaeng, napalaki ikambe sollanna niparessa lalang ri sura’-sura’ niaka niboli’ ri kakaraenganga ri Babel. Lanri kammana akkullei niasseng apaka kammatojengi angkana nia’ parentana Karaeng Kores untu’ ambangungi ammotere’ anjo Balla’Na Batara ri Yerusalem. Nampa natayang ikambe angkana antekamma kaputusanta karaeng, ri anne passalaka."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA