Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas paksa si e, lit dua kalak nabi, Hagai ras Sakaria anak Iddo, mulai ngerana i bas gelar Dibata Israel man kalak Jahudi si ringan i Juda ras Jerusalem.
2 Kenca Serubabel anak Sealtiel ras Josua anak Josadak megi katana, ibenakenna me mulihi majekken Rumah Pertoton si i Jerusalem e. Nabi Hagai ras Sakaria nampati.
3 Tupung si e pe minter reh ku Jerusalem Tattenai gubernur Eprat Barat, bage pe Setar Bosenai, ras teman-temanna ngoratisa nina, "Ise nuruhsa kam majekken Rumah Pertoton enda ras ndungisa?"
4 Ipindo kalak ndai pe gelar-gelar kerina si nampati majekken Rumah Pertoton e.
5 Tapi iperdiateken Dibata peminpin kalak Jahudi, emaka iputusken pegawai-pegawai Persia e la erbahan tindaken kai-kai pe seh banci ibahanna surat man Darius ras ngaloken balasenna.
6 Enda me laporen si ikiremkenna man raja:
7 "Man si mehamat: Raja Darius. Dame lah pemerentahenndu.
8 Ietehndu min o raja, maka nggo kami ku propinsi Juda janah idapeti kami maka Rumah Pertoton man Dibata si mbelin, sangana ipajekken ka mulihi. Ipakena batu si galang janah dingdingna ilapisi alu papan. Dahin e alu tutus kal idahiken janah terus erdalan alu mehuli.
9 Emaka isungkun kami peminpin bangsa e ise nuruhsa majekken Rumah Pertoton e mulihi ras ndungisa.
10 Gelar-gelarna pe isungkun kami gelah banci ipebetehken man bandu ise peminpin i bas dahin enda.
11 Ngaloi kalak e, 'Kami enda suruh-suruhen Dibata langit ras doni. Ipajekken kami ka mulihken Rumah Pertoton enda, si gelgel e nggo ipanteki dingen idungi sekalak raja Israel si mbelin.
12 Tapi erkiteken merawa Dibata Surga ibahan nini-nini kami, IpelepasNa nini-nini kami e italuken Raja Nebukadnesar, bangsa Kaldea i Babilon nari. Icedakenna Rumah Pertoton e, janah ibabana bangsa e ku pembuangen i Babilon.
13 Kenca bage i bas tahun si pemena pemerentahen Raja Kores jadi raja Babilon, iperentahkenna gelah Rumah Pertoton e ipajekken ka mulihi.
14 Iulihkenna perkekas emas ras pirak si gelgel e ibuat Nebukadnesar i bas Rumah Pertoton nari i Jerusalem si nggo nai itamakenna i bas rumah sembah-sembahen i Babil. Perkekas-perkekas e iendesken Sirus man sekalak jelma, Sesbasar gelarna, si iangkatna jadi gubernur Juda.
15 Raja Sirus nuruh ia maba perkekas-perkekas e dingen ngulihkenca ku Rumah Pertoton i Jerusalem. Tambah si e isuruhna ka pe gelah Rumah Pertoton e ipajekken ka mulihi i bas tapakna si gelgel.
16 Emaka reh me Sesbasar jenari ipajekkenna palasna. Mulai i bas paksa e nari seh genduari dahin e erdalan terus, tapi Rumah Pertoton e langa dung.'
17 Dage o, raja, adi mehuli iakapndu, selidiki min i bas arsip surat-surat kerajan i Babil, metehsa payo tah lang nai iperentahken Kores majekken mulihi Rumah Pertoton i Jerusalem enda. Janah kenca bage turiken man kami uga sura-surandu i bas perkara enda."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA