Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob jumpah bulan pitu, anjaha marianan ibagas hutani bei halak Israel, martumpu ma bangsa ai ris hu Jerusalem.
2 Jadi jongjong ma si Jesua, anak ni si Josadak, rap pakon saninani malim-malim ai, ampa si Serubabel, anak ni si Sealtiel, rap pakon saninani, anjaha ipauli sidea ma anjapanjap panggalangan bani Naibata ni Israel, laho manggalangkon i atas ni galangan situtungon, songon na tarsurat ibagas buku titah ni si Musa, halak ni Naibata.
3 Jadi ipajongjong sidea ma anjapanjap ai bani iananni hinan tapi marmunsuh-munsuh do sidea dompak bangsa-bangsa ni nagori ai, anjaha igalangkon sidea ma galangan situtungon i atas ni hubani Jahowa, galangan situtungon sogod pakon bodari.
4 Marpesta lampolampo do sidea homa, songon na tarsurat ai, anjaha igalangkon sidea do galangan situtungon siganup ari mangihutkon bilanganni, romban hubani aturan hinan bueini ganup ari,
5 ambahni ai galangan situtungon siganup ari, galangan bani poltak ni bulan ampa bani ganup pesta, na dob tinontuhon bani Jahowa, pakon galangan ni ganup halak, na binagahkonni humbani rosuh ni uhurni hubani Jahowa.
6 Olat ni ari sada bulan pitu ipungkah sidea ma manggalangkon galangan situtungon hubani Jahowa. Tapi seng ipajongjong ope anggo rumah ni Jahowa.
7 Halani ai ibere ma duit hubani tukang batu pakon tukang hayu ampa sipanganon, siinumon pakon minak hubani halak Sidon ampa Tirus, ase iboan sidea hayu ares hun Libanon hu laut, ai ma hu Joppe, romban hubani parentah ni si Kores, raja ni Persia, hubani sidea.
8 Tapi padua-tahunkon dob das sidea hu rumah ni Naibata i Jerusalem, bani bulan dua, ipungkah si Serubabel, anak ni si Sealtiel ma horja ai rap pakon si Jesua, anak ni si Josadak, ampa na tading humbani sanina ni sidea, ai ma malim pakon halak Levi ampa haganup na dob mulak hun habuangan hu Jerusalem. Ipabangkit sidea ma halak Levi olat ni na marumur dua puluh tahun hu atas mardimata horja ai i rumah ni Jahowa.
9 Jongjong do homa ijai si Jesua rap pakon anakni ampa saninani pakon si Kadmiel ampa anakni, ampa halak Juda, rap mardimata siparhorja i rumah ni Naibata, rap pakon anak ni si Henadad ampa halak Levi, anak ni sidea ampa sanina ni sidea.
10 Jadi dob itibalhon tukang batu onjolan ni rumah ni Jahowa, jongjong ma malim marpakeian bei pajolom-jolom tarompit, pakon halak Levi, ginompar ni si Asap, marhasoman parugas, laho mamuji-muji Jahowa, romban hubani aturan, na binahen ni si Daud, raja ni Israel.
11 Jadi mandoding ma sidea marsibalos-balosan mamuji ampa mangkatahon tarima kasih hubani Jahowa, ai pardear layak do Ia, anjaha ronsi sadokah ni dokahni do idop ni uhur-Ni mangidah Israel. Jadi ipagogoh bangsa ai ma sorani, laho mamuji-muji Jahowa, halani na dob itibalhon batu onjolan ni rumah ni Jahowa ai.
12 Tapi buei do humbani malim pakon halak Levi ampa kopala ni mar sasaompung, halak partua-partua, na sampang mangidah rumah panumbahan na parlobei ondi, na tangis gogoh-gogoh, dob ididah sidea itibalhon batu onjolan ni rumah panumbahan ai; tapi buei do halak na pagogoh sorani marolob-olob humbani malas ni uhurni,
13 gabe seng tarsirang sora olob-olob, malas ni uhur humbani sora tangis-tangis ni bangsa ai, ai gogoh tumang do sora ni bangsa ai marolob-olob, pala tarbogei sora ai humbani na daoh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA