Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bulan petto’ reng-oreng Isra’il la padha enneng e kotthana bang-sebang. E tanggal settong bulan jareya keya reng-oreng jareya la akompol kabbi e Yerusalim,

² Yusak ana’na Yozadak ban mam-imam kancana sarta Zerubabil ana’na Seyaltiyel ban la-balana laju padha molae maddek pole mezbana Allahna Isra’il. Kalaban cara se kantha jareya reng-oreng jareya bisa ngobbar kurban e mezba jareya, menorot petodu se badha e dhalem ketab Hokomma Mosa, abdina Allah.

³ Sanajjan reng-oreng jareya tako’ ka pandhudhu’na nagara jareya, tape mezba jareya epaddek keya e kennengnganna se asal. Saellana jareya reng-oreng jareya pas molae ngatorragi pole kurban obbaran gi’ laggu lem-malem.

⁴ Reng-oreng jareya araya’agi keya Are Raja Ranggun Dhaun, menorot atoranna; ban sabban are ngatorragi kurban se la etantowagi kaangguy are jareya.

⁵ Laen dhari jareya reng-oreng jareya sacara tartep ngatorragi kurban obbaran ban kurban e bakto Are Raja Bulan Anyar, ban e bakto sakabbinna are raja laenna se ebadha’agi kaangguy abakte ka PANGERAN. Reng-oreng jareya ngatorragi keya tor-ator sokalella ka PANGERAN.

⁶ Sanajjan Padalemman Socce jareya gi’ ta’ molae epaddek, tape e tanggal settong bulan petto’ ra’yat la molae ngobbar kurban kaangguy PANGERAN.

⁷ Ra’yat aberri’ sombangan pesse se ekabajara opana tokang bato ban tokang kaju. Badha se ngeremmagi kakanan, nom-enoman otaba mennya’ jaitun ka tha-kottha Tirus ban Sidon, eporoba ban kaju comara Libanon dhari tha-kottha jareya. Kaju jareya egiba ka Yafo lebat tase’. Jareya kabbi ejalannagi ra’yat kalaban edina Kores, rato Persiya.

⁸ Daddi e bulan dhuwa’, e taon se kapeng dhuwa’ saellana ommat Isra’il abali ka Yerusalim, Padalemman Socce jareya molae epaddek pole. Zerubabil, Yusak ban ca-kancana se sabangsa, para imam ban oreng Lewi, pandha’na sakabbinna oreng bekkas buwangan dhari Babil, noro’ alako. Reng-oreng Lewi se aomor dhu polo taon ka attas epassrae epangawase lalakon se maddek Padalemman Socce jareya.

⁹ Daddi Yesuwa, oreng Lewi rowa, ban na’-ana’na sarta la-balana, bariya keya Kadmiyel ban na’-ana’na (kaom Hodawya) padha noro’ ngawase lalakon maddek Padalemman Socce jareya. Reng-oreng jareya etolonge oreng Lewi dhari kaomma Henadad.

¹⁰ E baktona reng-oreng se alako jareya molae masang dhasarra Padalemman Socce jareya, mam-imam se ngangguy juba sambi neggu’ tarompet nyare kennengngan bang-sebang. Reng-oreng Lewi dhari kaomma Asaf manjeng e jadhiya sambi neggu’ gung-eggung kene’. Reng-oreng jareya ji-moji PANGERAN noro’ atoran se la eteptebbagi molae jamanna Rato Daud.

¹¹ Ra’yat jareya anyanye gu-lagu se ji-moji PANGERAN sambi li-baliyan ngolange bagiyanna se dhi-budhi, se monyena kantha reya, "PANGERAN reya sae; ban kataresna’anna ka Isra’il tadha’ obana." Ra’yat jareya kabbi padha asorak ban ji-moji PANGERAN, sabab dhasarra Padalemman Socce jareya la epasang.

¹² Bannya’ e antarana mam-imam, reng-oreng Lewi ban la-kapalana kaom se la towa omorra tao nangale’e Padalemman Socce se lamba’. E baktona reng-oreng jareya nangale’e dhasarra Padalemman Socce se anyar jareya epasang, kabbi padha nanges epakaja. Tape reng-oreng laenna se badha e jadhiya raksoragan kaperagen,

¹³ sampe’ta’ ekenneng bida’agi se kemma sowarana tanges ban se kemma sowarana soragga oreng se kaperagen, sabab sowarana ce’ kajana ban ce’ rammena sampe’ ekaedhing ka jauna.

Ezra

Video Ezra 3

Ikuti Kami:

KONTAK | PARTISIPASI | DONASI