Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ibaba dilaki ndai ka aku ku gerbang si arah darat, julun pertapaken Rumah Pertoton e. Gerbang ndai sangana pintu,

² emaka nina TUHAN man bangku, "Gerbang enda tetap ipintu, janah ndigan pe la banci italangi. La lit manusia si banci bengket arah gerbang e, sabap Aku, TUHAN Dibata nu Israel, nggo bengket arah e. Emaka gerbang e arus tetap pintu.

³ Amin bage gia, raja si sangana erkuasa banci lawes ku lorong gerbang e man pangan si badia i adep-adepenKu. Ia arus bengket ras lawes nadingken lorong gerbang e arah ruang si mbelin si lit i je."

⁴ Kenca bage ibabai dilaki ndai ka aku ku lebe-lebe Rumah Pertoton e arah gerbang si lit i Utara. Sanga kunehen ku je, kuidah Rumah Pertoton TUHAN e dem alu sinalsal kemulian TUHAN. Minter aku langkem i babo taneh;

⁵ emaka nina TUHAN man bangku, "O manusia si ermasap-masap, perdiatekenlah kai si iidah ras ibegindu. AteKu nuriken man bandu peraturen ras Undang-undang kerna Rumah Pertoton e. Perdiateken tuhu-tuhu ise si banci bengket ku bas Rumah Pertoton e, janah ise ka si lang.

⁶ Kataken man bangsa Israel si pemberontak e, maka Aku, TUHAN si Erdolat, la ngasup ngidah perbahanenna si ciga ateKu.

⁷ Nggo iliamina Rumah PertotonKu erkitekan iberena bangsa si deban si la isunatken, bangsa si la ngikutken Aku, bengket ku bas Rumah Pertoton e, tupung tabeh-tabeh ras dareh rubia-rubia e ipersembahken man bangKu. Dage bangsangKu nggo ngelanggar perpadanenKu alu kerina perbahanen si ciga ateKu.

⁸ La ia saja si ngaturken lakon-lakon si badia i bas Rumah PertotonKu, tapi bangsa si deban isuruhna.

⁹ Aku, TUHAN si Erdolat ngatakenca, maka bangsa si deban si la isunatken, kalak si la ngikutken Aku, sada pe la banci bengket ku bas Rumah PertotonKu, aminna gia bangsa si deban e ringan i tengah-tengah bangsangKu Israel."

¹⁰ Nina TUHAN man bangKu, "Kuukum me kalak Lewi, si nggo ikut ras bangsa Israel si debanna, nadingken Aku janah isembahna berhala-berhala.

¹¹ Tapi banci ia erdahin guna Aku i bas Rumah Pertoton jadi si erjaga gerbang. Banci igelehna rubia-rubia si ipersembahken bangsa e jadi persembahen tutungen ras persembahen si deban, janah arus ia erdahin guna bangsa e.

¹² Tapi erkiteken nggo ibabaina bangsa Israel i bas lakon-lakon persembahen man berhala-berhala, janah alu bage ibabaina bangsa e erdosa, emaka ersumpah Aku, TUHAN si Erdolat, maka kalak Lewi la banci lang iukum.

¹³ La banci ia ndahiken dahinKu selaku imam tah ndeheri kasa kai si badia, tah pe bengket ku Ingan si Badiana kal. Enda me ukumen erkiteken perbahanenna si ciga ateKu.

¹⁴ Man bana genduari Kubereken dahin-dahin kelatihen i bas Rumah Pertoton e."

¹⁵ Nina TUHAN si Erdolat, "Tupung bangsa Israel nadingken aku, imam-imam Lewi kesusuren Sadok tetap patuh ndahiken dahinKu i bas Rumah Pertoton. Erdandanken si e, genduari ia me kerina si erdahin guna Aku janah banci ia reh ku adep-adepenKu mpersembahken tabeh-tabeh ras dareh asuh-asuhen si ipersembahken.

¹⁶ Ia ngenca banci bengket ku Rumah PertotonKu, bage pe ndahiken dahin i bas batar-batar, ras mabai kebaktin i bas Rumah Pertoton.

¹⁷ Adi bengket ia arah gerbang ku kesain si lit i bas Rumah Pertoton e, la banci lang ia make uis linen. Uis si ibahan i bas mbulu biri-biri nari la banci ipakena tupung ia ndalanken tugasna i bas kesain si arah bas tah pe i bas Rumah Pertoton.

¹⁸ Maka ula ia panasen, arus ia make bulang linen ras seluar luar linen, tapi la banci ergendit.

¹⁹ Ope denga ia ndarat ku kesain si arah darat ingan jelma si nterem pulung, arus itangtangina lebe paken si ipakena asum ia ndalanken dahinna i bas Rumah Pertoton, janah isimpanna i bas kamar-kamar si badia e. Ia arus make paken si deban gelah jelma si nterem e ula kena cilaka erkiteken paken si badia e.

²⁰ Imam-imam la banci takal tabu, janah la ka banci gedang bukna. Arus iperdiatekenna maka bukna payo pergedangna.

²¹ Imam-imam la banci sitik pe minem lau anggur ope denga bengket ku bas kesain Rumah Pertoton.

²² Imam-imam la banci ngempoi diberu si nggo mulih i bas perbulangenna nari; si banci iempoina eme si nguda-nguda kalak Israel tah pe ndehara imam si nggo mbalu.

²³ Imam-imam arus ngajari bangsangKu, apai si badia, apai si lang, apai si bersih rikutken aturen agama, apai si la bersih.

²⁴ Adi lit kalak si erpekara, imam-imam arus ndungi perkara e erpalasken Undang-undangKu. Wari raya agama arus iperdiateken maka irayaken sue ras peraturen-peraturen ras Undang-undangKu, janah la banci lang ipebadiakenna wari Sabat.

²⁵ Sekalak imam la banci njemak mait gelah ula ia la bersih rikutken aturen agama, pala mait ndai mait orang tuana, mait anakna, seninana, tah pe turangna si lenga tersereh.

²⁶ Adi la ia bersih erkiteken njemak mait arus itimaina lebe pitu wari janah kenca ia bersih ka mulihi,

²⁷ emaka bengket ia ku kesain si arah bas i bas Rumah Pertoton lako mereken persembahen guna mersihken dirina maka banci ia ndahiken dahinna i bas Rumah Pertoton. Aku, TUHAN si Erdolat nggo melasken katangKu.

²⁸ Imam-imam ngaloken jabaten imam, janah eme baginna i bas kai si Kubereken man Israel ersundut-sundut. La banci lit erta ras kebayakenna i Israel, sabap Aku kap kebayakenna.

²⁹ Persembahen buah gandum, persembahen pengalemi dosa ras persembahen ganti rugi, eme jadi nakan imam-imam e. Janah kasa kai si iserapken jadi sikerajangenKu i Israel, arus ibereken man imam-imam.

³⁰ Man imam-imam arus ibereken kerina ulih peranin si pemena ras si mehulina, bage pe kerina si debanna si ipersembahken man bangKu. Tep-tep kali bangsa Israel nasakken roti, maka roti sipemenana arus ibereken man imam jadi persembahen; emaka Kupasu-pasu rumah bangsa Israel.

³¹ Imam-imam la banci ipanna perik-perik tah pe rubia-rubia si deban si mate bana, tah pe mate ijerngem rubia-rubia si merawa."

Yehezkiel

Video Yehezkiel 44

Ikuti Kami:

KONTAK | PARTISIPASI | DONASI