Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu pole ka sengko’, dhabuna,
2 "He, manossa se ta’ langgeng, kabala ka bangsana ba’na ja’ mon Sengko’ madhateng perrang ka settong nagara, bakal kadaddiyana kantha reya. Pandhudhu’na nagara jareya bakal meleya oreng e antarana reng-oreng sanagarana se epadaddiya panjaga.
3 Mon panjaga jareya nangale’e badha moso dhateng, laju mamonye tandha babaja, sopaja reng-oreng te-ngate kabbi.
4 Pa’-sapa’a se ngedhing tandha babaja jareya tape ta’ marduli, ban moso pas dhateng sarta mate’e panjaga jareya, oreng jareya mate polana salana dibi’. Saompamana panjaga jareya agateyagi tandha babaja gella’, tanto salamet.
5 (33:4)
6 Tape mon panjaga gella’ nangale’e moso dhateng ban ta’ mamonye tandha babaja, ban moso pas dhateng mate’e reng-oreng se dusa jareya, panjaga jareya se kodu nanggung okoman polana matena reng-oreng buru.
7 He, manossa se ta’ langgeng, bi’ Sengko’ ba’na eangkada epadaddiya panjagana bangsa Isra’il. Kabala ka reng-oreng jareya parengeddan dhari Sengko’ reya:
8 Mon Sengko’ abala ja’ oreng se jahat bakal mateya, tape ba’na ta’ maenga’ oreng jareya sopaja ngoba tengkana me’ olle salamet, oreng jareya bakal mateya gi’ ngeba dusana. Tape ba’na se kodu nanggung okoman polana matena oreng jareya.
9 Mon ba’na maenga’ oreng se jahat jareya tape oreng jareya ta’ endha’ ambu atengka jahat, oreng jareya bakal mateya ngeba dusana, tape ba’na dibi’ bakal salamedda."
10 PANGERAN adhabu ka sengko’, "He, manossa se ta’ langgeng, olange ka oreng Isra’il apa se tao ekoca’agi reng-oreng jareya, ‘Sengko’ kabbi padha nyangsara polana nanggung dusa ban kajahadan. Baramma sengko’ reya se bisa’a odhi’?’
11 Kabala ka reng-oreng jareya, ja’ bit nyamana Sengko’, Allah se odhi’, GUSTE Allah Se Mahatenggi, Sengko’ ta’ senneng mon oreng jahat mate; sabaligga Sengko’ terro sopaja reng-oreng jareya ambu dhari lalakonna se dusa me’ olle paggun odhi’. He, bangsa Isra’il, ambu ja’ atengka jahat. Arapa ba’na me’ terro mateya?
12 Daddi, manossa se ta’ langgeng, kabala ka oreng Isra’il ja’ mon oreng becce’ agabay dusa, kabecce’anna se ba’-lamba’na ta’ bisa nolong aba’na. Mon oreng jahat ambu alako dusa, ta’ eokoma, ban mon oreng becce’ alako dusa ta’ epasalamedda.
13 Olle daddi Sengko’ la ajanji masalamedda oreng becce’, tape mon oreng jareya molae agabay dusa sarta ngarep aba’na epasalamedda polana kabecce’anna se ba’-lamba’na, oreng jareya kalero. Sengko’ ta’ ngenga’ana pole kabecce’an se tao elakone aba’na, ban oreng jareya bakal mateya polana sa-dusana.
14 Olle daddi Sengko’ tao maenga’ oreng jahat ja’ aba’na bakal mateya. Tape mon oreng jareya ambu se alako jahat ban molae alako becce’ ban bendher, ompamana oreng jareya mabali barang gagadhinna oreng, otaba barang se ekeco’ aba’na ban ta’at ka kom-hokom se madhateng odhi’, oreng jareya ta’ kera mate.
15 (33:14)
16 Sengko’ ta’ ngenga’ana pole sa-dusana se tao elakone, ban oreng jareya bakal odhi’a polana ngalakone apa se bendher ban becce’.
17 Tape bangsa jareya ngoca’ ja’ okoman se eteba’agi Sengko’ ta’ adil! Mangkana aba’na dibi’ se ta’ adil.
18 Sengko’ ngoca’a sakaleyan aggi’, ja’ mon oreng becce’ molae alako jahat, oreng jareya bakal mateya polana kajahadanna jareya.
19 Mon oreng jahat ambu alako dusa, ban molae ngalakone pa-apa se becce’ ban teppa’, oreng jareya bakal odhi’a polana kabecce’anna jareya.
20 Maske kantha jareya bangsa Isra’il ngoca’ ja’ se ejalannagi Sengko’ ta’ adil. Onggu, Sengko’ ahakimana reng-oreng jareya bang-sebang menorot lalakonna."
21 E tanggal lema’ bulan sapolo e dhalem taon se kapeng dhu bellas bakto sengko’ ban tang bangsa badha e pambuwangan, badha oreng se salamet buru dhari Yerusalim, entar ka sengko’, malae ja’ Yerusalim la gaggar.
22 E baja malem sabellunna oreng jareya dhateng, sengko’ la arassa badhana kobasana PANGERAN. Daddi e bakto oreng jareya tatemmo ban sengko’, sengko’ la bisa acaca, ta’ buwi pole.
23 PANGERAN adhabu ka sengko’,
24 "He, manossa se ta’ langgeng, reng-oreng se enneng e jur-gujuranna tha-kottha e tana Isra’il rowa ngoca’ kantha reya, ‘Ibrahim olle sakabbinna tana reya, mangkana pera’ kadibi’an. Sengko’ ban ba’na reya bannya’, daddi tana reya andhi’na sengko’ ban ba’na.’"
25 Daddi GUSTE Allah Se Mahatenggi ngotos sengko’ manapa’ dhabuna reya ka reng-oreng jareya, "Ba’na ngakan daging se gi’ badha dharana; ba’na nyemba brahala ban mate’e oreng. Me’ ce’ bangalla ba’na ngako tana reya andhi’na ba’na.
26 Ba’na ngandellagi peddhangnga. Tengkana ba’na majitjit. Ba’na kabbi padha azina. Apa ba’na bangal ngako tana reya andhi’na ba’na?
27 Bit Tang nyama dibi’, Allah se odhi’, GUSTE Allah Se Mahatenggi, reng-oreng se enneng e jur-gujuranna tha-kottha jareya bakal epateyana oreng. Se enneng e lon-talon bakal ekakana burun alas galak. Se ngetek e nong-gunong ban e wa-guwa bakal mateya polana wabah panyaket.
28 Nagara jareya bi’ Sengko’ epadaddiya ra-ara se seppe, ban kakobasa’anna se edir-edirragi bakal napa’a ka aherra. Nong-gunong e Isra’il bakal seppeya sampe’ tadha’ oreng se bangala lebat e jadhiya.
29 E bakto Sengko’ ngokom sa-bangsa jareya polana sa-dusana ban ngoba nagarana epadaddi seppe, reng-oreng jareya tao ja’ Sengko’ PANGERAN."
30 PANGERAN adhabu, "He, manossa se ta’ langgeng, ba’na daddi rarasanna oreng sabangsana e bakto reng-oreng jareya akompol e seddi’na dhung-geddhungnga kottha otabana e seddi’na bang-labangnga bengko. Reng-oreng jareya saleng ngoca’ kantha reya, ‘Mara ja’ ngedhingngagiya dhabuna PANGERAN are teya.’
31 Reng-oreng jareya dhateng anyo-ronyo, ban menangka Tang ommat reng-oreng jareya toju’ ngedhingngagi cacana ba’na, tape pa-apa se eparenta’agi ba’na ta’ etoro’. Bibirra acaca parkara kataresna’an, tape atena pera’ mekkere kaontongan.
32 Ba’na eanggep oreng se lakona anyanye nyanyeyan kasmaran se sowarana tenne ban penter amaen calempong. Reng-oreng jareya pajat ngedhing pa-apa se ekoca’agi ba’na, tape ta’ atoro’.
33 Sabarang se ekoca’agi ba’na jareya bakal kadaddiyana, ban mon bakto jareya la napa’, reng-oreng jareya bakal taowa ja’ tao badha nabbi e nga’-tengnga’anna reng-oreng jareya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA