Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai roh ma hata ni Jahowa hu bangku, mangkatahon,

² “Ale anak ni jolma, manjahai ma ho hatahon ma: Sonon do hata ni Tuhan Jahowa: Doruhkon ma! Aih, jangin ni ari ai!

³ Tongon, dohor ma ari ai, dohor ma ari ni Jahowa ai, ari na golap do ai, panorang pambalason bani bangsa-bangsa!

⁴ Roh do podang hu Masir, jadi masa ma hagobiron i Etiopia, anggo rasei halak tarbunuh i Masir; iusung halak habayakonni, anjaha iparseda palas-palasni.

⁵ Halak Etiopia pe, Put, Lud, bangsa panginsolat haganup, Libia ampa bangsa siparpadan pakon sidea, maningon rasei do bahenon ni podang.

⁶ Sonon do hata ni Tuhan Jahowa: Maningon rasei do halak na manungkoli Masir, anjaha marumbak do kuasani na timbul in, hun Migdol das hu Siene rasei do sidea ijai ibahen podang, nini Tuhan Jahowa.

⁷ Maseda do ia i tongah-tongah ni nagori-nagori na dob maseda; anjaha huta-hutani pe i tongah-tongah ni huta-huta na dob mareong.

⁸ Jadi tandaon ni sidea ma, Ahu do Jahowa, anggo Hupagara ma apuy i Masir anjaha maropuk ma haganup na mangurupisi.

⁹ Bani ari ai misir ma mangolos suruhan hun lobei marayak Etiopia laho manonggoti ia; hagobiron do sogop bani sidea bani ari parmagou ni Masir. Tonggor ma, roh do ai!

¹⁰ Sonon do hata ni Tuhan Jahowa: Parontihonon-Ku do hariahon ni Masir marhitei tangan ni si Nebukadnesar, raja ni Babel.

¹¹ Ia rap pakon balani, ai ma sibisangan ai humbani bangsa-bangsa, iparoh do hujai parsedahon tanoh ai; sintakon ni sidea do podangni dompak Masir, anjaha gokan ni sidea do tanoh ai bani halak na tarbunuh.

¹² Pahorahon-Ku do Bah Nil ai, anjaha jualon-Ku tanoh ai hu tangan ni halak parjahat; parohon-Ku do hasedaon bani tanoh ai ampa bani haganup na adong ijai, marhitei tangan ni halak sileban; Ahu, Jahowa do na mansahapkon in.

¹³ Sonon do hata ni Tuhan Jahowa: Parsedaon-Ku do sagala gana-gana, anjaha boiskonon sisombah-sombahon hun Wop, seng anjai dong be raja-raja i Masir; pasogopon-Ku do biar i tanoh Masir.

¹⁴ Parsedaon-Ku do Patros, pagaraon-Ku do apuy i Soan, anjaha dabuhon-Ku do uhum i No.

¹⁵ Useihononku do ringisku bani Sin, benteng ni Masir ai, anjaha raseihononku halak simbuei na i No.

¹⁶ Pagaraonku do apuy i Masir, rusak anjaha gobir ma Sin; runtas do tembok ni No, iparreong do tembok ni Nob.

¹⁷ Raseihonon ni podang do garama ni On ampa Pibeset, anjaha tarbuang do anak boru.

¹⁸ Manggolapi do ari i Tahpanhes, anggo Huponggolhon ma ijai tungkot harajaon ni Masir, anjaha marujung kuasani na timbul ai; rungkubon ni hagolapan ma huta ai, anjaha tarbuang pangisi ni dusun-dusunni.

¹⁹ Sonai ma dalankonon-Ku uhum bani Masir, ase itanda sidea, Ahu do Jahowa.

²⁰ Pasapuluhsada-tahunkon, bani ari pitu bulan sada, roh ma hata ni Jahowa hu bangku, mangkatahon,

²¹ Ale anak ni jolma, domma huponggolhon tangan ni Parao, raja ni Masir, anjaha tonggor ma, seng ibaluti ai, seng itambari, seng ililit, ase margogoh namin use manjolom podang.

²² Halani ai sonon do hata ni Tuhan Jahowa: Tonggor ma, imbang-Ku do Parao, raja ni Masir, ponggolhonon-Ku do tanganni haduasi, na margogoh ai ampa na dob maponggol ai, anjaha dabuhkonon-Ku do podang ai humbani tanganni.

²³ Erapon-Ku do halak Masir hu tongah-tongah ni bangsa-bangsa, anjaha mambur do sidea hu nagori-nagori ai bahenon-Ku.

²⁴ Pargogohon-Ku do tangan ni raja Babel, anjaha nahkonon-Ku podang-Ku hubagas tanganni, tapi ponggolhonon-Ku do tangan ni Parao, gabe doruh-doruh ma ia i lobei-Hu, songon halak na ugahan parah.

²⁵ Tongon, pargogohon-Ku do tangan ni raja Babel, tapi galek ma anggo tangan ni Parao; jadi tandaonni ma, Ahu do Jahowa. Berehonon-Ku do podang-Ku hubagas tangan ni raja Babel, tampulhononni do ai dompak tanoh Masir.

²⁶ Erapon-Ku do halak Masir hutongah-tongah ni bangsa-bangsa, anjaha mambur do sidea bahenon-Ku hu nagori-nagori ai; ase itanda sidea, Ahu do Jahowa.”

Yehezkiel

Video Yehezkiel 30

Ikuti Kami:

KONTAK | PARTISIPASI | DONASI