Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas wari sepuludua, bulan sipesepuluhken, tahun si pesepuluhken sanga kami i bas pembuangen, seh kata TUHAN man bangku nina,
2 "O manusia si ermasap-masap, sumpahilah raja Mesir. Turiken man bana uga ia ras negerina i ukum.
3 Kataken man bana maka enda me katangKu, Aku TUHAN si Erdolat, man raja Mesir: Aku kap musuhndu, o naga raksasa, si gempang i bas lau belin. Ikatakenndu maka Lau Nil kam empuna, janah nindu kam erbahanca.
4 Kutamaken me kawil si galang i bas isangndu, janah Kubahan maka nurung si lit i bas lau belinndu e leket ku dagingndu. Kenca bage kurintak me kam i bas Lau Nil e nari, rikut ras kerina nurung si leket i bas dagingndu.
5 Emaka Kusampetken kam ras kerina nurung e ku gurun pasir. Badanndu ndabuh ku taneh, janah ikuburken, jenari Kubereken man pangan perik-perik ras rubia-rubia kerangen.
6 Kenca bage kerina kalak Mesir meteh maka Aku kap TUHAN." Nina TUHAN, "O kalak Mesir! Kalak Israel ernalem man penampatndu, tapi kam la lebih asangken ciken si medate.
7 Adi icikenken kam, minter kam penggel, tercucuk kikikna ibahanndu, janah tersiher awakna.
8 Dage, genduari Aku TUHAN si Erdolat, ngatakenca man banndu maka Kusuruh me tentera lako nerang kam alu pedang, janah ibunuhna rayatndu, ras asuh-asuhenndu.
9 Mesir nandangi salih me jadi negeri si lume dingen terulang. Kenca bage itehndu maka Aku kap TUHAN. Perban ikatakenndu maka Lau Nil kam empuna dingen kam si mahanca:
10 emaka Aku kap musuhndu ras musuh Lau Nilndu e. Kubahan Mesir jadi negeri si lume dingen terulang, mulai kota i Mikdol nari seh ku kota Aswan i Selatan terus ku perbalengen Sudan.
11 La lit manusia tah rubia-rubia si ndalani negeri e. Empat puluh tahun dekahna la lit kai pe si nggeluh i je.
12 I bas kerina negeri-negeri si melungen, Mesir ngenca Kubahan negeri si melungunna. Empat puluh tahun dekahna kota-kota Mesir runtuh, janah i bas kerina kuta si nggo runtuh, kota-kota Mesir ngenca si mesangatna. Kalak Mesir Kubahan jadi pengungsi. Merap ia ku kerina negeri, jenari ringan i tengah-tengah bangsa si deban."
13 Nina TUHAN si Erdolat, "Kenca lepas empat puluh tahun kalak Mesir Kubaba mulih i bas negeri-negeri si deban nari inganna Kukerapken,
14 janah Kubere ia ringan i Mesir selatan, ingan pengulihenna. I bas ingan e, ia jadi kerajan si la megegeh,
15 janah eme si la megegehna i tengah-tengah kerina kerajan. Ngayak ndigan pe lanai ia erkuasa nandangi bangsa si deban. La sitik pe ia Kubahan meherga seh maka la ia ngasup maksaken sura-surana man bangsa apai pe.
16 Ngayak ndigan pe Israel lanai ernalem kempak penampat Mesir. Mara si nggo jadi man Mesir mereken pertenget man Israel maka lepakken tuhu-tuhu ernalem man Mesir. Kenca bage ieteh Israel me maka Aku kap TUHAN si Erdolat."
17 I bas wari si pemena, bulan si pemena, tahun si peduapuluh pituken sanga kami i bas pembuangen, kata TUHAN seh man bangku nina,
18 "O manusia si ermasap-masap, mbarenda Raja Nebukadnesar mahan serangen nandangi Tirus, Isuruhna tenterana maba baban si mberat seh maka takal tentera e megusgus jadi melinang janah barana meculaken. Tapi subuk raja e bage pe tenterana la rulih sitik i bas kerina kelatihenna e.
19 Dage genduari enda me katangKu, Aku TUHAN si Erdolat: Kubereken me negeri Mesir man Raja Nebukadnesar. Irampok ras irampasna me kerina kebayaken Mesir jadi upah tenterana.
20 Taneh Mesir Kubereken jadi ulih latihna, erkiteken tenterana erdahin guna Aku. Bagenda me nina TUHAN si Erdolat.
21 Kenca jadi pagi si e, Kubahan bangsa Israel jadi megegeh, janah erdandanken si e o, Esekiel Kubere kam ngerana i ja kerina kalak banci megiken kam, maka itehna Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA