Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Badha pin-pamimpinna bangsa Isra’il entar ka Sengko’ atanya’a apa kasokanna PANGERAN.
2 PANGERAN laju adhabu ka sengko’,
3 "He, manossa se ta’ langgeng, reng-oreng reya massra’agi aba’na ka brahala sampe’ tabalusok ka dhalem dusa. Masa’ Sengko’ endha’a etanyae reng-oreng jareya?
4 Daddi kabala ka reng-oreng jareya ja’ Sengko’, GUSTE Allah Se Mahatenggi apessen kantha reya, ‘Saneyap oreng Isra’il se la parcaja ka brahala ban sampe’ tabalusok ka dhalem dusa, pas entar menta petodu ka nabbi, Sengko’ dibi’ se aberri’a jawaban se sapantessa etarema la-brahala jareya!
5 La-brahala jareya kabbi majau Tang ommat dhari Sengko’, tape kalaban Tang jawaban jareya moga-moga Tang ommat abaliya pole ka Sengko’.’
6 Kabala keya ka oreng Isra’il ja’ Sengko’, GUSTE Allah Se Mahatenggi ngoca’ kantha reya ka reng-oreng jareya, ‘Mara atobat dhari sa-dusana, onduri la-brahalana ba’na se majitjit ate jareya.’
7 Mon badha oreng Isra’il otabana oreng manca se badha e antarana oreng Isra’il, se ajauwi Sengko’ ban massra’agi aba’na ka brahala, sarta pas menta petodu ka nabbi, Sengko’ dibi’ se nyaodana.
8 Sengko’ se ngamosowa oreng jareya, me’ olle daddi conto ka reng-oreng laenna. Bi’ Sengko’ oreng jareya epanyeseya dhari masarakadda Tang ommat, daddi Tang ommat tao ja’ Sengko’ reya PANGERAN.
9 Mon badha nabbi se etepo sampe’ aberri’ jawaban se sala, jareya polana Sengko’ dibi’ se nepo nabbi jareya. Sengko’, Allah, PANGERAN Se Mahatenggi, manyeseya oreng jareya dhari reng-oreng Isra’il.
10 Nabbi jareya, bariya keya reng-oreng se menta petoduna, bi’ Sengko’ padha eokoma epapadha’a.
11 Sengko’ ajalannagi se kantha jareya kabbi sopaja oreng Isra’il ta’ ajauwi Sengko’ pole, ban ta’ manajjis aba’na ban dusa. Kalaban cara se kantha jareya reng-oreng jareya bakal daddiya Tang ommat, ban Sengko’ daddiya Allahna." Sengko’, GUSTE Allah Se Mahatenggi, la ngoca’.
12 PANGERAN adhabu ka sengko’, "He, manossa se ta’ langgeng,
13 mon badha nagara se dusa ban ta’ esto ka Sengko’, bi’ Sengko’ nagara jareya eokoma. Bi’ Sengko’ epaancora parsadhiya’anna kakanna, epadhatengngana laep; manossa ban kebanna bi’ Sengko’ padha epateyana.
14 Maske Ennoh, Danel ban Ayyub badha e kennengngan jareya, kabecce’anna oreng se katello jareya pera’ bisa masalamet odhi’na dibi’. Sengko’, GUSTE Allah Se Mahatenggi la ngoca’.
15 Olle daddi Sengko’ madhatengnga run-burun alas epanyeppa’a pandhudhu’na nagara jareya, sampe’ nagara jareya daddiya kennengngan se talebat babajana ban tadha’ oreng se bangala lebat e jadhiya.
16 Maske Ennoh, Danel ban Ayyub enneng e jadhiya, bit nyamana Sengko’, Allah se odhi’, GUSTE Allah Se Mahatenggi, reng-oreng se katello jareya ta’ kera bisa masalamet sapa’a bai, la’-mala’ maske ana’na dibi’ sakale ta’ bisa. Pera’ aba’na dibi’ se salamedda, dineng nagara jareya bakal daddiya ra-ara.
17 Olle daddi nagara jareya bi’ Sengko’ epadhatengngana paperrangan, Sengko’ madhatengnga ta-sanjata se mandi epamateyana manossa ban keban se badha e jadhiya.
18 Ban maskeya oreng se katello gella’ enneng e jadhiya, bit nyamana Sengko’, Allah se odhi’, GUSTE Allah Se Mahatenggi, se katello jareya ta’ kera bisa masalamet sapa’a bai, la’-mala’ maske ana’na dibi’ sakale ta’ bisa. Pera’ aba’na dibi’ se bisa’a salamet.
19 Olle daddi Sengko’ madhatengnga panyaket ka nagara jareya, ban peggella Tang ate bi’ Sengko’ eocola kabbi eteba’agiya ka nagara jareya sampe’ keban ban manossa bakal mateya kabbi.
20 Ban maske Ennoh, Danel ban Ayyub gi’ badha neng e jadhiya, bit nyamana Sengko’, Allah se odhi’, GUSTE Allah Se Mahatenggi, kabbi ta’ kera bisa masalamet sapa’a bai, maske ana’na dibi’ sakale ta’ bisa. Pera’ aba’na dibi’ se salamet polana kabecce’anna dibi’."
21 GUSTE Allah Se Mahatenggi adhabu, "Sengko’ neba’agiya Tang okoman se paleng berra’ se pa’-empa’ ka kottha Yerusalim kaangguy mamosna sakabbinna keban ban manossa. Okoman jareya iya reya: perrang, kalaparan burun alas ban panyaket.
22 Saompamana badha se ahasel lopot ban masalamet na’-ana’na, abassagi reng-oreng jareya mon entar ka ba’na. Abassagi saapa jahadda reng-oreng jareya, daddi ba’na bakal apangrasa’a ja’ Sengko’ reya bendher se la ngokom Yerusalim.
23 Ban ba’na bakal ngarteya ja’ sabarang se elakone Sengko’ reya badha sababba. Sengko’, GUSTE Allah Se Mahatenggi la ngoca’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA