Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ipauli sidea ma pakean tohonan, sipakeion marugas bani ianan na pansing ai humbani bonang na mahonda, na gerger pakon na gerger sahalian; ipauli homa ma pakean na pansing sipakeion ni si Aron songon na tinonahkon ni Jahowa hubani si Musa.
2 Anjaha ipauli ma baju epod ai humbani omas pakon humbani bonang na mahonda, na gerger anjaha na gerger sahalian pakon humbani hiou silopak na alus na niangkup.
3 Itopa sidea ma omas ai marlambar-lambar na nipis, iiris ma ai gabe purada, sitonunonkon saor ni bonang na mahonda, na gerger ampa na gerger sahalian ai, pakon saor ni hiou silopak na alus na niangkup ai, sada tonunan na alus.
4 Ibahen sidea ma hubani baju epod ai dua tutup abara, na pinadomu bani tampakanni na dua ai.
5 Gondit ni epod na i atas ni ai pe, na gabe panangkut ni ai, dos do pulunganni pakon pardearni, humbani omas, humbani bonang na mahonda, na gerger, na gerger sahalian pakon humbani hiou silopak na alus na niangkup, songon na tinonahkon ni Jahowa hubani si Musa.
6 Itukangi ma batu intan unam ai, ililit ma bani tali omas anjaha iuhirhon ma hujai, goran-goran ni anak ni Israel na sapuluh dua ai, songon na manguhir tintin tokan.
7 Inahkon ma ai hubani na dua tutup abara ni baju epod ai, gabe batu pardingatan bani anak ni Israel, songon na tinonahkon ni Jahowa hubani si Musa.
8 Ipauli ma tutup tonton ai, ai ma sada horja na alus, dos songon na padearhon baju epod ai, humbani bonang na mahonda, na gerger, na gerger sahalian pakon hiou silopak na alus na niangkup.
9 Marompat suhi do ai ibahen anjaha dua lapis, sanjongkal ganjangni anjaha sanjongkal bolagni, dua lapis ibahen.
10 Anjaha itatahkon sidea ma hujai ompat ristei batu intan. Bani ristei na parlobei: Batu intan sardis, topasion pakon samarah;
11 bani ristei na paduahon: batu intan rubin, sapir pakon diamant;
12 bani ristei na patoluhon: batu intan opal, achat pakon ametis;
13 bani ristei na paompatkon: batu intan korisolit, unam pakon jaspis; anjaha marlilit omas ibahen ristei na tinatahkon ai inggot.
14 Adong do ijai sapuluh dua batu margoran bei mangihutkon goran-goran ni anak ni Israel, songon tintin tokan ma ai bani Israel na sapuluh dua marga ai, goran ni sidea bei iuhirhon hujai.
15 Anjaha ibahen sidea ma hubani tutup tonton ai rantei songon tali na niangkup humbani omas pitah;
16 ibahen sidea ma homa dua rantei-rantei omas pakon dua tintin omas, anjaha inahkon sidea ma na dua tintin ai hubani na dua tampakan ni tutup tonton ai.
17 Anjaha inahkon sidea do na dua tali omas ai hubagas tintin na dua ai, na i tampakan ni tutup tonton ai.
18 Tapi haduasi ujung ni tali omas na dua ai ihaitkon sidea do hubani rantei-rantei na dua ai, anjaha inahkon ma ai hubani tutup abara ni baju epod ai hampit lobei.
19 Ibahen sidea ma use dua tintin omas, inahkon ma ai bani na dua tampakan ni tutup tonton ai bani topini hampit bagas na padompak pakon baju epod ai.
20 Ibahen use ope dua tintin omas, anjaha inahkon ma ai hubani na dua tutup abara ni baju epod ai, hampit toruh dompak lobei, sangkan pardomuanni, i atas ni gondit ni baju epod ai.
21 Anjaha isangkutkon sidea ma tutup tonton ai rap pakon tintinni hubani tintin ni baju epod ai marhitei bonang na mahonda, ase longkot ai i atas ni gondit ni baju epod ai, songon na tinonahkon ni Jahowa hubani si Musa.
22 Ipauli ma homa baju pardarat ni epod ai, humbani bonang na mahonda do ganupan ai itonun.
23 I tongah-tongahni do parborgokanni, martopi na tinonun inggot songon topi ni baju partohonan, ase ulang marigat.
24 Ibahen sidea do hubani rambu ni baju pardarat ai buah ni dalima humbani bonang na mahonda, na gerger, na gerger sahalian pakon humbani hiou silopak na alus na niangkup.
25 Ibahen sidea ope homa giring-giring humbani omas pitah, inahkon ma ai hu holangkolang ni buah ni dalima ai inggot bani rambu ni baju pardarat ai;
26 giring-giring omas sada dob ai buah dalima, giring-giring omas sada dob ai buah dalima, sonai ma inggot bani rambu ni baju pardarat ai, sipakeion marugas songon na tinonahkon ni Jahowa hubani si Musa.
27 Ibahen sidea ma homa baju parbagas, itonun humbani hiou silopak na alus, hubani si Aron pakon anakni ai,
28 pakon tangkuluk humbani hiou silopak na alus, pakon gotong-gotong humbani hiou silopak na alus, pakon saluar humbani hiou silopak na alus na niangkup,
29 pakon gondit humbani hiou silopak na alus na niangkup, ampa humbani bonang na mahonda, na gerger pakon na gerger sahalian, sada tonunan sampurborna songon na tinonahkon ni Jahowa hubani si Musa.
30 Ibahen sidea do homa sada tutup pardompakan na pansing humbani omas pitah, anjaha iuhirhon hujai songon panguhiron bani tintin tokan: Pinapansing bani Jahowa.
31 Ilongkotkon sidea ma hujai tali bonang na mahonda, laho padomuhon ai bani tangkuluk ai i babou, songon na tinonahkon ni Jahowa hubani si Musa.
32 Sonai ma pardob ni ganup horja paulihon ianan na pansing, lampolampo partumpuan ai; ibahen halak Israel do ganup hombar hubani na hinatahon ni Jahowa hubani si Musa, sonai do ibahen sidea.
33 Iboban sidea ma ianan na pansing ai hubani si Musa, lampolampo ai pakon ganup parugasni, hait-kaitni, papanni, ransang-ransangni, tiangni pakon onjolanni;
34 langit-langitni na humbani bobak ni biribiri tunggal na sinolop, langit-langitni humbani bobak ni hambing ampa tirei panutupni,
35 poti hasaksian ai pakon lanja-lanjani ampa langkob pardearan ai,
36 meja ai rap pakon haganup parugasni ampa ruti sigalangonkon;
37 parsuluhan na humbani omas pitah ai pakon suluhni rap pakon tampeianni ronsi haganup parugasni ampa minak hubani parsuluhan ai,
38 anjapanjap omas ai, minak pamminaki ai, dahupa na misbou ai pakon tirei tutup ni labah ni lampolampo ai,
39 anjapanjap tombaga ai pakon hondor-hondor tombagani, lanja-lanjani rap pakon ganup parugasni, tong parburihan ai rap pakon onjolanni,
40 tirei ni horbangan ni alaman ai, talini pakon pakuni, ampa haganup parugas sipakeion bani haganup horja ibagas ianan na pansing ai, ai ma lampolampo partumpuan ai;
41 pakean tohonan marugas ibagas ianan na pansing ai, pakean na pansing bani Malim Aron pakon pakean bani anakni ai laho mangkorjahon hamalimon ai.
42 Hombar hubani na tinonahkon ni Jahowa hubani si Musa, sonai do idobkon halak Israel haganup horja ai.
43 Jadi itorih si Musa ma haganup horja ai, anjaha tonggor ma, domma dob ibahen sidea; songon na tinonahkon ni Jahowa hubani si Musa, lanjar sonai do ibahen sidea. Dob ai ipasu-pasu si Musa ma sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA