Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto jareya la tanggal tello bellas bulan Adar, iya areya are se eteptebbagi kaangguy ajalannagi papakonna rato, kaangguy bangsa Yahudi. Are jareya ete’-nante’ bi’ so-mosona bangsa Yahudi kaangguy matompes bangsa jareya. Tape nyatana reng-oreng jareya dibi’ se epakala bi’ reng-oreng Yahudi.
2 E saneyap kottha, reng-oreng Yahudi akompol nyerranga reng-oreng se aneyat juba’ ka aba’na. Sa-bangsa e man-dhimman padha katako’en, daddi tadha’ se bangala ngadhebbi bangsa Yahudi jareya.
3 La’-mala’ sakabbinna kaom oreng agungnga propinsi, para gubennor, bupati ban kaom oreng agungnga karaja’an padha nyokong oreng Yahudi polana kabbi padha tako’ ka Mordekhai.
4 Reng-oreng sanagara padha tao ja’ Mordekhai ce’ rajana pangarona e karaton ban sajan raja kakobasa’anna.
5 Daddi oreng Yahudi nyerrang mosona sakarebba, mate’e mosona ngangguy peddhang.
6 E Susan, ibu kotthana nagara, oreng Yahudi mate’e oreng lema ratos.
7 E antarana se epate’e jareya tamaso’ ana’ lalake’anna Haman ana’na Hamedata, moso rajana oreng Yahudi, bannya’na kasapolo, iya areya: Parsandata, Dalfon, Aspata, Porata, Adaliya, Aridata, Parmasta, Arisai, Aridai ban Waizata. Tape oreng Yahudi ta’ arampas dhi’-andhi’na reng-oreng jareya.
8 (9:7)
9 (9:7)
10 (9:7)
11 E are jareya keya bannya’na oreng se epate’e e Susan ereppottagi ka rato.
12 Dhabuna rato ka Ester, "E Susan bai oreng se epate’e oreng Yahudi badha lema ratos oreng, tamaso’ na’-ana’na Haman se sapolo. Apa pole e si-propinsi! Ba’ baramma kabadha’anna e dhissa’ sengko’ ta’ tao! Sateya, apa pole se epenta’a ba’na? Mara ngoca’, tanto bi’ sengko’ etorodi kabbi!"
13 Atorra Ester, "Manabi junandalem kasokan, reng-oreng Yahudi se badha e Susan ka’dhinto lagguepon parenge edi ngolange pole pa-ponapa se ampon ejalannagi e are mangken. Sarengngan pole, mayyidda na’-ana’na Haman pakon gantong e ga-cangga pagantongan."
14 Rato laju apareng parenta norodi parnyo’onanna Ester; sorat parenta epakalowar e Susan, ban mayyidda ana’na Haman se sapolo oreng gella’ egantong.
15 Daddi, e tanggal pa’ bellas bulan Adar, reng-oreng Yahudi e Susan akompol pole, laju mate’e pole oreng e kottha jareya bannya’na tello ratos oreng. Ban e bakto jareya reng-oreng Yahudi buru ta’ arampas rang-barangnga oreng keya.
16 Reng-oreng Yahudi se badha e si-propinsi padha akompol keya ban abillai odhi’na. So-mosona se baji’ ka oreng Yahudi epate’e, bannya’na se epate’e pettong polo lema’ ebu. Tape reng-oreng jareya padha ta’ arampas barang dhi’-andhi’na oreng.
17 Kadaddiyan jareya kalakon e tanggal tello bellas bulan Adar. Kalagguwanna, e tanggal pa’ bellas, reng-oreng Yahudi jareya ta’ mate’e oreng pole, tape neng-sennengngan araya’agi are jareya.
18 Tape oreng Yahudi se badha e Susan ngala’ tanggal lema bellas se eraya’agi menangka are raja, sabab reng-oreng jareya mate’e so-mosona e tanggal tello bellas ban pa’ bellas, pas ambu e tanggal lema bellas.
19 Daddi, reng-oreng Yahudi se badha e tha-kottha kene’ araya’agi tanggal pa’ bellas bulan Adar menangka are gumbira ban are pesta sambi saleng berri’ kakanan.
20 Saellana jareya Mordekhai nyathet sakabbinna kadaddiyan jareya, pas ngerem sorat ka sakabbinna oreng Yahudi e saantero karaja’an Persiya, se jau ban bariya keya se semma’.
21 Essena sorat jareya marenta’agi sopaja oreng Yahudi araya’agi tanggal pa’ bellas ban tanggal lema bellas bulan Adar sabban taon.
22 Sabab e are jareya oreng Yahudi makala so-mosona, sampe’ kasossa’an ban karekonganna aoba daddi kagumbira’an ban kasennengngan. Daddi reng-oreng Yahudi kodu araya’agi re-are jareya sambi mabadha pesta ban dhadha’aran, sarta saleng aberri’ kakanan ban magi sandhekka ka reng-oreng mesken.
23 Oreng Yahudi atoro’ ka parentana Mordekhai jareya; daddi paraya’an jareya laju daddi adad kabiyasa’an sabban taon.
24 Haman ana’na Hamedata, toronanna Agag, moso rajana oreng Yahudi, ajumbu’ ellot se enyamae keya "purim" kaangguy neptebbagi are se ajagala reng-oreng Yahudi; rancanana matompessa oreng Yahudi.
25 Tape Ester ngadhep ka rato, ban rato apareng parenta se etoles, se andaddiyagi rancana juba’na Haman jareya ngenneng ka badanna dibi’, sampe’ aba’na ban na’-ana’na egantong e cangga pagantongan.
26 Jareya sababba, arapa re-are raja jareya me’ enyamae Purim, asalla dhari oca’ pur. Soradda Mordekhai ban sabarang se ealame oreng Yahudi jareya,
27 daddi lantaranna oreng Yahudi agabay atoran kaangguy aba’na dibi’ ban toronanna, ban sakabbinna oreng se daddiya warga bangsa Yahudi. Atoran jareya nyebbuttagi ja’ sabban taon oreng Yahudi wajib araya’agi are se dhadhuwa’ jareya, se la eteptebbagi bi’ Mordekhai.
28 Eteptebbagi keya ja’ salanjangnga re-are Purim jareya kodu ekaenga’e ban eraya’agi bi’ saneyap kalowarga Yahudi dhari saneyap angkadan, e saneyap propinsi ban e saneyap kottha.
29 Laen dhari jareya, Dinaju Rato Ester, pottrana Abihail, abadhi sorat se nomer dhuwa’na, se ngowadi essena soradda Mordekhai, parkara Purim jareya.
30 Sorat jareya epakerem ka sakabbinna oreng Yahudi, ban toronanna epakerem ka saratos petto lekor propinsi e karaja’an Persiya. Sorat jareya etoro’e du’a parnyo’onan sopaja bangsa Yahudi terrosa taremtem ban aman.
31 Sorat jareya ngajak keya sopaja oreng Yahudi ban toronanna padha’a araya’agi ban marengeddi re-are Purim teppa’ baktona, akantha mon marengeddi masa powasa ban masa sossa. Kantha jareya essena soradda Mordekhai ban Dinaju Rato Ester.
32 Parenta se epakalowar Ester se neptebbagi sakabbinna atoranna Purim, ecathet e dhalem ketab.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA