Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo memang alloa napassareammi Karaeng Ahasyweros sikamma pa’barang-baranganna Haman mae ri Ester; Haman, musu lompona tu Yahudia. Napaumi Ester mae ri karaenga angkana accikali siagang Mordekhai. Jari appakkaramula anjo wattua nisaremi ha’ anjo Mordekhai untu’ battu andallekang ri karaenga manna tanisuro kio’ la’bi riolo.
2 Napasulu’mi cincinna karaenga, ia le’baka naalle ammotere’ battu ri Haman, nampa napassareang mae ri Mordekhai. Nampa niangka’mo Mordekhai ri Ester untu’ a’jari tukoasa ri pa’barang-barangngang battua ri Haman.
3 Le’baki anjo, andallekammi pole Ester ri karaenga. Su’juki nampa angngarru’ ampalaki ri karaenga sollanna napattaena anjo rancana ja’dala’ le’baka napare’ Haman mae ri tu Yahudia.
4 Napajonjomi takkang bulaenna karaenga mae ri Ester. Ambangummi Ester nanakana,
5 "Punna kikaerokangi karaeng, siagang kikamaseang anne atanta, appasulu’ laloki’ sura’ parenta, untu’ ambesoki ammotere’ sikamma sura’-sura’na Haman ia assuro bunoai sa’genna la’busu’ sikontu tu Yahudi niaka ri anne kakaraenganga.
6 Antekamma lakkulle naparrangngi atanta anciniki bansana siagang bija pammanakanna niputta?"
7 Nakanamo Karaeng Ahasyweros mae ri Ratu Ester siagang Mordekhai, "Memang, le’ba’mi kugentung Haman lanri ero’na naputta tu Yahudia. Siagang le’ba’ tommi kupassareang barang-baranna mae ri Ester.
8 Mingka anjo sura’ le’baka nitulisi’ siagang nisitempele’ lalang arenna karaenga, takkulleai nibeso’ ammotere’. Mingka kusare ngasengko ising untu’ annulisi’ sura’ ri passala’na bansa Yahudia, apa-apa mamo nukanaya baji’ ri panggappanu. Tulisi’mi anjo suraka lalang arengku, siagang saremi sitempele’na karaenga."
9 Anjo memang alloa, iamintu ri tanggala’ 23 bulang tallu, iamintu niarenga bulang Siwan, nakio’mi Mordekhai sikamma jurutulisi’na karaenga. Nampa naparentakang ke’nanga annulisi’ sura’ mange ri sikamma guburnur, bupati, siagang tumalompoa ri anjo 127 propinsi, appakkaramula battu ri India sa’genna mange ri Sudan. Anjo sura’-suraka ngaseng nitulisiki lalang bicara siagang tulisang niaka ri massing-massing propinsia. Nakiring tommi anjo suraka mange ri tu Yahudia, lalang bahasana siagang lalang tulisanna tu Yahudia.
10 Anjo sura’-suraka natekengi Mordekhai lalang arenna Karaeng Ahasyweros siagang nasaremi sitempele’ karaeng. Nampa nasuro Mordekhai siapa are jaina suro, untu’ angngantaraki anjo sura’-suraka mange ri sikontu propinsi niaka lalang ri kakaraenganga. Sangnging jarang lacciri’na karaenga napake ke’nanga.
11 Bonena anjo suraka iamintu angkanaya nisarei ising tu Yahudia ri sikontu kotaya untu’ ampasse’rei kalenna siagang najagai kalenna. Punna nibunduki ke’nanga ri tau niaka sanjatana, manna pole battu ri bansa kemae yareka manna pole battu ri propinsi kemae. Akkullei ke’nanga angngewa siagang ambunoi anjo tau battua ambunduki. Manna ana’na siagang bainenna ke’nanga akkullei nabuno. Akkullei nabuno ke’nanga anjo sikontu musunna sa’genna la’busu’ siagang akkullei narampasa’ pa’barang-baranganna.
12 Anjo parentaya musti nigaukangi ri sikontu kakaraenganna Persia, ri allo le’baka napattantu Haman untu’ ambunoi tu Yahudia, ri tanggala’ sampulo antallu bulang sampulo anrua, iamintu niarenga bulang Adar.
13 Anjo sura’ parentaya musti nipasuluki a’jari undang-undang, nampa nipa’la’bang mange ri sikontu tau niaka ri sikontu propinsia, sollanna sadia ngaseng tu Yahudia untu’ angngewai musunna punna battu anjo alloa.
14 A’lampami anjo sikamma tunisuroa, a’dongko’ jaranna karaenga. Kammayatompa ri Susan, ri ibukotana anjo pa’rasanganga, nibaca tommi anjo parentaya.
15 Le’baki anjo nabokoimi Mordekhai balla’na karaenga. Ammakei pakeang kalompoang gauka siagang keboka tanja’na, ammake juba lame butung battu ri kaeng lenang halusu’ tanja’na, kammayatompa ammakei songko’ bulaeng sannaka ga’gana. Akkiok-kio’mi taua ri kota Susan napakamma rannu.
16 Assauimi nyawana siagang sannammi pa’mai’na, sunggumi, kammayatompa lompomi nyawana tu Yahudia.
17 Kammayatompa ri sikamma kotaya siagang propinsia, kemae-kemae nibaca anjo sura’ parentana karaenga, rannu ngasemmi tu Yahudia, assannang-sannang siagang assua’-suara’mi ke’nanga. Ba’lalo jaimi battu ri panduduka antama’ a’jari bansa Yahudi, lanri malla’na ke’nanga ri anjo bansaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA