Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E are jareya keya Rato Ahasyweros marengngagi ka Dinaju Rato Ester sabarang dhi’-andhi’na Haman, moso rajana bangsa Yahudi. Ester ngatore oneng ka rato ja’ Mordekhai jareya sapopona, daddi molae dhari bakto jareya Mordekhai eparenge ha’ ngadhep ka rato ta’ kalaban edikane kaadha’.
2 Rato mokka’ sesserra se la epondhut pole dhari Haman, pas eparengngagi ka Mordekhai. Bi’ Ester Mordekhai jareya eangkat epadaddi pangobasana dhi’-andhi’na Haman.
3 Saellana jareya Ester ngadhep ka rato pole, asojud sambi molar, nyo’on sopaja rato nyabut rancana jahadda Haman ka oreng Yahudi.
4 Rato nodingngagi tekken emmassa ka Ester, daddi Ester laju ngadek e ajunanna rato, pas mator,
5 "Manabi junandalem kasokan, sareng bellas ka abdidalem, ngereng junandalem makalowar sorat parenta, pakon nyabut rat-soradda Haman se aesse parenta mateyana sadajana oreng Yahudi e karaja’an ka’dhinto.
6 Kadi ponapa abdidalem se tega’a nengale bangsa abdidalem sareng la-bala abdidalem ejagal sadaja?"
7 Daddi Rato Ahasyweros adhabu ka Dinaju Rato Ester, ban ka Mordekhai, "Pajat bendher Haman bi’ sengko’ la egantong polana mateyana reng-oreng Yahudi kabbi; dhi’-andhi’na bi’ sengko’ la ebagi ka Ester kabbi.
8 Tape sorat se etoles kalaban asmana rato ban la epobuwi eccabba sello’na rato ta’ ekenneng cabut pole. Maske bariya, bi’ sengko’ ba’na eedinana noles sorat parkara bangsa Yahudi, apa bai se eanggep becce’ bi’ ba’na. Toles sorat jareya ngangguy tang nyama, bi’ sengko’ pas epasangana eccabba karaja’an."
9 E are jareya keya, iya areya e tanggal tello lekor bulan tello’, bulan Siwan, Mordekhai makompol para sekettarissa rato, pas eparenta’agi noles sorat ka para gubennor, para bupati ban om-kaom oreng agung e si-propinsi se bannya’na saratos petto lekor, dhari India sampe’ ka Sudan. Rat-sorat jareya etoles ngangguy basa ban tolesan se eangguy e propinsi jareya bang-sebang. Laen dhari jareya ekeremmagi keya sorat ka bangsa Yahudi ngangguy basa ban tolesan Yahudi.
10 Rat-sorat jareya eteken bi’ Mordekhai, kalaban asmana Rato Ahasyweros, sarta epasange eccabba karaja’an. Mordekhai laju nyoro para otosan ngaterragi rat-sorat jareya ka si-propinsi e karaja’an jareya. Para otosan jareya nompa’ ran-jaran se ceppet kaagunganna rato.
11 Rat-sorat jareya essena anyata’agi ja’ rato ngedine oreng Yahudi e saneyap kottha akompol abillai nyabana. Mon eserrang bi’ reng-oreng se asanjata dhari bangsa ban propinsi dhimma’a bai, oreng Yahudi olle alaban ban mate’e reng-oreng se nyerrang jareya, tamaso’ binena ban na’-ana’na; oreng Yahudi olle ajagal mosona sampe’ tadha’ karena, ban arampas dhi’-andhi’na.
12 Parenta jareya kodu ejalannagi e saantero karaja’an Persiya teppa’ e are se bi’ Haman etantowagi kaangguy mate’e reng-oreng Yahudi, iya areya e tanggal tello bellas bulan dhubellas, bulan Adar.
13 Sorat parenta jareya kodu eomommagi menangka dhang-ondhang ka sakabbinna oreng e sakabbinna propinsi sopaja bangsa Yahudi mon la napa’ ka are jareya padha’a asadhiya kaangguy alaban ka mosona.
14 Daddi para otosan jareya pas padha mangkat nompa’ jaranna rato. Parenta jareya ebaca’agi keya e Susan.
15 Saellana jareya Mordekhai mangkat dhari karaton ngangguy pangangguy kabessaran se barnana bungo ban pote, juba bungo terrong dhari linen alos ban makotha emmas se ce’ bagussa. Oreng sakottha Susan padha rak-soragan kaperagen.
16 Oreng Yahudi padha arassa legga ban senneng atena, sarta ce’ gumbirana.
17 Bariya keya e saneyap kottha ban propinsi, e dhimma’a bai sorat parentana rato jareya ebaca’agi, reng-oreng Yahudi anga-bunga, neng-sennengngan ban apesta. La’-mala’ bannya’ e antarana ra’yat se laju maso’ daddi bangsa Yahudi polana padha tako’ ka bangsa jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA