Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Siapa are wattu ribokoanganna angngangka’mi Karaeng Ahasyweros sitau kapala pamarenta, iamintu niarenga Haman. Anjo Haman, ana’na Hamedata, turungang battu ri Agag.

² Naparentakammi karaenga sikontu pagawena sollanna napakala’biri’ anjo Haman siagang su’ju’ ri dallekanna. Sikontu pagawea naturuki anjo parentaya, pantaranganna Mordekhai.

³ Akkuta’nangi ri ia sikamma pagawe maraenga ri balla’ karaenga angkana angngapa natanaturukia parentana karaenga.

⁴ Allo-allona ke’nanga assuroa tojengi sollanna naturukimo, mingka tena naero’ appilangngeri. Nakana, "Inakke tu Yahudia’; takkullea’ nakke su’ju’ ri rupataua." Napabattumi ke’nanga anjo passalaka ri Haman, lanri eroki naasseng ke’nanga angkana apa lanagaukang Haman ri Mordekhai.

⁵ Teaimi sipato’ larrona Haman ri wattunna naasseng angkana taerokai Mordekhai assu’ju’ ri ia.

⁶ Na ri wattunna naasseng angkana tu Yahudi anjo Mordekhai, angngallemi kaputusang untu’ anghukkungi Mordekhai. Ba’lalo teai iaji bawang, mingka lanapa’la’busu’ tongi sikontu tu Yahudi niaka ri kakaraenganna Persia.

⁷ Ri makasampulona anrua taung ammarenta Karaeng Ahasyweros, ri bulang se’re, iamintu niarenga bulang Nisan, assuro cini’mi allo Haman, iamintu nasuro goccangi anjo nikanaya "purim," untu’ angngassengi angkanaya allo apa siagang bulang siapa nacoco’ nagaukang anjo pikkirang ja’dala’na. Nipattantumi angkana tanggala’ sampulo antallu, bulang sampulo anrua, iamintu niarenga bulang Adar.

⁸ Nampa nakanamo Haman ri karaenga, "O, karaeng, nia’ se’re bansa mara’-maraeng a’la’bang ri sikontu propinsia ri anne pa’rasanganga. Assisala sikali ada’-ada’na ke’nanga siagang bansa-bansa maraenga. Taerokai ke’nanga mannuruki ri sikamma atorang niaka ri anne kakaraenganga. Jari, teaki’ lappassangi ke’nanga a’gau’ situru’ ero’ kalenna ke’nanga.

⁹ Punna tenaja kikabattallangi, appasulu’ maki’ sura’ parenta untu’ amputtai ke’nanga. Siagang punna erokki’ antarimai panggappaku, akkullei anne atanta appantama’ la’bi ri 340.000 kilo battala’na doe’ pera’ ri pammoneang doetta karaeng."

¹⁰ Nalangngereki karaenga anjo, nabi’bu’mi cincinna battu ri karemenna, ia napake untu’ ansitempeleki sikamma sura’ nipa’la’bang assaya, nampa napassareang mae ri Haman. Anjo Haman, iami musu lompona tu Yahudia.

¹¹ Nakana karaenga ri ia, "Anjo bansaya siagang doe’na kupassareangi mae ri kau. Gaukammi apa nukanaya baji’ mae ri ke’nanga."

¹² Jari tanggala’ sampulo antallu bulang se’re, nakioki Haman sikamma juru tulisi’na karaenga. Nampa nasuro ke’nanga annulisi’ sura’ situru’ sikamma apa naparentakanga mae ri ke’nanga. Nampa nipalemba anjo bonena suraka antama’ ri sikontu bahasa niaka nipake ri anjo pa’rasanganga; siagang nitulisi’ tommi antama’ ri tulisang niaka nipake ri sikontu anjo pa’rasanganga. Anjo suraka nitulisiki lalang arenna Karaeng Ahasyweros nampa nisitempele’ siagang cincinna. Le’baki anjo nikirimmi linta’ mange ri sikamma tau anna’galaka koasa, guburnur, siagang tumalompoa ri sikontu daera propinsia. Ia bonena anjo suraka, iamintu angkanaya ri tanggala’ sampulo antallu bulang Adar, sikontu bansa Yahudi, baji’ natoa yareka rungka, baji’ nabaine yareka ana’-ana’, musti nibuno ngasengi, takkulleai nipammopporang. Nampa sikontu barang-baranna ke’nanga musti nirampasaki.

¹³ (3:12)

¹⁴ Anjo parentaya musti nipa’la’bangi mange ri sikontu daera propinsi, sollanna sikontu taua sadia baji’ ngasemmi ri anjo allo le’bakamo nipattantu.

¹⁵ Akkaro-karomi a’lampa sikamma tunisuroa a’lampa angngantaraki anjo sikamma suraka mange ri sikontu propinsi niaka ri anjo kakaraenganga. Lanri passurona karaenga, nipa’la’bang tommi anjo parentaya ri kota Susan, iamintu ibukotana Persia. Le’baki anjo ammempo-mempomi karaenga siagang Haman, angnginung anggoro’. Mingka a’jari gegere’ lompomi taua ri kota Susan passala’ anjo parentaya.

Ester

Video Ester 3

Ikuti Kami:

KONTAK | PARTISIPASI | DONASI