Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 La dekah kenca si e, iangkat Raja Ahasweros Haman jadi perdana menteri. Haman anak Hamedeta, kesusuren Agag.
2 Nggo iperentahken raja man kerina pegawaina maka arus ihamatina Haman alu erjimpuh i lebe-lebena.
3 Nungkun pegawai-pegawai raja si deban man Mordekai ngkai maka la ipatuhina perentah raja e;
4 tep-tep wari iendik-endik kalak ndai gelah ia nggit nembah Haman, tapi la ibegikenna cakap kalak e. "Aku kalak Jahudi; aku la banci nembah man manusia," nina Mordekai. Emaka ituriken kalak ndai si enda man Haman, sabap merincuh ia metehsa kuga kari ibahan Haman man Mordekai.
5 Lanai tanggung nembehna ate Haman kenca ietehna maka Mordekai la nggit nembah erjimpuh man bana.
6 Terlebih-lebih kenca ietehna maka Mordekai eme kalak Jahudi, iputuskenna maka labo Mordekai saja ngenca atena ibunuhna, tapi kerina kalak Jahudi si lit i bas kerajan Persia pe.
7 I bas tahun si pesepuluduaken pemerentahen Raja Ahasweros, bulan si pemena, eme bulan Nisan, iperentahken Haman erbahan tikam tanduk, si igelari "purim" lako meteh wari si apai ras bulan si apai maka payo nehken sura-surana si la mehuli e. Emaka idatca me keputusen: wari sepulu telu, bulan si pesepuluduaken, eme bulan Adar.
8 Dage ituriken Haman man raja nina, "Lit sada suku bangsa nggeluh serap-serap i tengah-tengah rayatndu, janah ia ringan i bas tiap propinsi kerajanndu. Adatna la bali ras bangsa-bangsa si deban. Tambah si e, la ia patuh man undang-undang kerajan. Dage labo lit sitik pe untungna man bandu adi kalak enda ipediat saja.
9 Emaka adi mehuli iakapndu, bahandulah surat perentah gelah kerina ia ibunuh. Adi e idalanken, pang aku njaminsa maka ngasup aku mereken lebih 340.000 kilo pirak man bendahara kerajan."
10 Megi si e ibuat raja cincin setempel i bas jari-jarina nari, jenari iberekenna man Haman anak Hamedata, kesusuren Agag, musuh kalak Jahudi e.
11 Nina raja man Haman, "Bangsa e ras duitna kuendesken bandu; bahanlah bagi atendu."
12 Emaka i bas wari sepulu telu bulan si pemena, idilo Haman me sekretaris-sekretaris raja, janah isuruhna erbahan surat perentah jenari iterjemahken ku tep-tep cakap ras tulisen si lit i bas kerajan e, gelah ikiremken man kerina gubernur, bupati ras pembesar-pembesar kerajan. Surat perentah e ibahan i bas gelar Raja Ahasweros,
13 jenari pedas ikiremken ku kerina propinsi. I bas surat e iperentahken maka i bas sada wari si nggo itetapken, eme wari sepulu telu, bulan Adar, kerina kalak Jahudi, subuk nguda tah metua, diberu tah danak-danak, arus ibunuh. Kerina arus ikernepken janah erta-ertana pe irampas.
14 Isi surat perentah e arus imomoken man jelma si nterem i bas tep-tep propinsi, gelah kerina sikap i bas wari si nggo itetapken e.
15 Arah perentah raja, peraturen e imomoken i bas ibukota Susan, janah pertenahen pedas-pedas maba berita e ku kerina propinsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA