Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sug nosa, kaba, yen yaimo lusud gedig Bilis oiharaga len se cinogo gin aud sesar dara meren geicara gecgu gin toua namcir. Dara yen yesogwa deisa merna mog mog meren mougt mera medam en mohotimei mohw an men geicara gecgu toua terimda. Anai en edag leng lohoiya Allah en mer gini len laugwan meren mougt mera medam touohob. Dangga hang, se lona ingga, kaba, yen meijina dag agau naugb yen yaimo areg Mena Gogoufu arautut yen aud gin touwero. Doba yen yedag yomom dau gin namcir, anai yen yaiga Allah men hancob dara yen yebesesar an en toua terimdohob.
2 (2:1)
3 Dara yeng Krisden dau yeng yugmahara, kaba, yen yemeicara dangga sug nosa dousero. Doba emeng Krisden dau emeng Yahudi, kaba, emen emaugwan toua emaimo leng lohoiya Allah en mer gini aud meren geicara gecgu gini. Anai emen toua emaimo areg emen emdoc etrij icira gin toua terimdohob. Hang emen ememebehnehino emenin emaga dara emen gauwamara dougwo areg gecgu touwero. Doba emen emaimo emen emaga dara emen gauwamara aud areg len larautut emen aud gin dous. Dangga sug maman maimo leng lohoiya Allah en mer gini len laugwan aud areg gecgu dag gin terimda, kaba, en medoc esrougb an maman dau acgunog, aninim dag en medoc esrougb an len gus laugwan dau acgunog touohob.
4 Doba Allah medoc eineg an maman medam gougwa. Dara en medoc gororougb maman beiseisaugb terimda toua namcirohob.
5 Dangga hang, en emamsoho maman deb touwero. Doba en eigdoc maman dau sesar men gogom aud maireseb menau geb huhugb. Aninim dag en eigdoumesa Krisdus dau gomom aud maireseb menau geb huhugb sug nosa touohob. Anai sug nosa, kaba, maman mamaimo areg Mena Gogoufu arougb maman aud touwero. Doba maman mahoiya en mer terimda. Hang eic dag maman mamom dau en ogdoc maman sesar gin toua namcirohob.
6 Doba sug maman madag hom dara Krisdus dag ginohob, kaba, Allah eigdoumesa maman dau gomom aud maireseb menau geb huhugb. Dauntoba se lona daiyamo gacin, kaba, maman maigtou desij Krisdus se bogo dag mougt mera medam naugb maman masedougwo lusud dara malaikad len laugwan toua namcir. Anai sug Krisdus en omom sug nosa, kaba, en emomom terimdero. Doba Allah eigdoumesa en dau gomom aud maireseb menau geb huhugb ginohob.
7 Allah eicara dag gini dou maman dauntoba sug lusud dara malaikad len leiya dag en medoc gororougb maman beiseisaugb bedreg dag ginohob, kaba, len lecinaga beb huhugb terimda dag en medoc gini. Doba edreg dau areg len lecic augwan toua namcirohob. Dara len lecinaga dag en medoc gororougb maman beiseisaugb gin, kaba, dag augwougb touwero. Doba en eicara dangga dou maman, aimo dau sug maman mamdoc dag hom dara Krisdus Yesus ginohob.
8 Anai Allah emeigdoc maman dau sesar men gogom aud maireseb menau geb huhugb ogdoc mamanin maman geicara touwero. Doba en eigdoc maman dau augwan gini dau sug enin medoc gororougb maman dous. Hang maireseb menau geb huhugb gin, kaba, emeb naugb maman ogdoc sug maman maic mamuwemougb esesa se ara ara gin touwero. Doba Allah eic augwan gini dag mogud dou maman, anai maman mamdoc dag hom dara Krisdusohob.
9 Allah eicara dag gini, dauntoba sud hom ingma, kaba, en emeimiman enin moho an maireseb menau geb huhugb gini ogdoc men geicara deseino Allah touwero. Doba len laugwan larges dau namcir.
10 Anai maman mamesinsin mamanin mamdoc mes dara maman mamu menenau ogdoc maman geicara ginero. Doba sug maman madag hom dara Krisdus Yesus dag ginohob, kaba, Allah enin eng esinsin maman mamdoc dara maman mamu menau dou maman dous. Dauntoba maman mamaimo areg mohon toua deitero. Doba maman maimo areg gedag beim dara geigouhw gedig Allah en esedeb dau acgunog naugb mamanohob gin toua terimda.
11 Dara yeng Krisden dau yugmahara, kaba, yen meigdoc moc dougwo areg mohon touwero, doba yen yeiseisan terimda. Anai se lona ingga, kaba, yen yemeigtou desij Krisdus touebma. Doba dau lona sug yen meijim ouwadan yen, kaba, yen yedag lugmaharohob. Hanoba yen yemedag hom dara emen meijouhuda Israel. Dara Allah misen men gomnomna areg en os dou emen sug nosa, kaba, augwan emeb naugb yen touwero, doba eb naugb emeng Yahudi emen dous. Sug areg graga augwan emeb naugb yen namcirero, kaba, Allah misen gini en emedag meijen Allah. Dara yen yemod meijina debsa en an areg geigouhw naugb en eic dou yen se lona daiyamo gacin touwero. Doba yen yeigtou augwougb dag gin terimda.
12 Dangga hang, emeng Yahudi, kaba, emen emesbes an yen dag lusud gedig len lemec merus dauwero toua namcir. Anai areg graga augwan, kaba, eb naugb emen. Hang emen emec emen emus gansins debin gin. Dara emen emeigdoumesa emenin emoho dag lusud gedig len lec merus dauwohob gin toua terimda. Doba yen, kaba, areg graga augwan emeb naugb yenero. Hang yen yemec yen meijus dau touwero. Doba inggaida, anai areg emen emec dau gin, kaba, emen emec se emen emaga dara emen emsira gin dous.
13 Doba iteitogin, kaba, yen meigdoc dag hom dara Krisdus Yesus touohob. Dangga hang, yen yemeb aigusi dau Allah misen gin toua deitero. Doba sug Krisdus eic en mogwihi bauwaharo dou Allah naugb meijen sesar dag ginohob, kaba, men geicara gini eic dag yen yeigtou desij Allah, aninim dag emeng Yahudi gin touohob.
14 Anai sug nosa, kaba, Allah men gomnomna dara areg en arougb emen an, kaba, edag sogo maga bagod dougwo yen namcir. Hang maman madag hom touwero. Doba maman madag moc naugb mabemocedoum terimda. Doba sug Krisdus eic enin maga bomom taiba sogo salib naugb mamanohob, kaba, en egrij sogo maga geb dougwo maman gini. Dauntoba emen emedag leng Yahudi dara yen yemedag lugmahara toua deitero. Doba sug maman madag hom dara enohob, kaba, en eic maman daihim dag meijouhuda menau hom se en toua. Dangga hang iteitogin, kaba, maman mabemocedoum toua deitero. Doba men geicara gin, kaba, eic dag maman mamdoc edag hom namcirohob.
15 (2:14)
16 Dauwohob, kaba, en ahwan maman dou Allah naugb en eic gesgigouhwesa dou maman maugwan ucugb toua. Anai sug en omom taiba sogo salib dag ginohob, kaba, en egrij sogo maga geb dougwo maman gini, dauntoba maman mabemocedoum deitero. Doba maman madag meijouhuda hom se en ogdoc men geicara taiba sogo salib gin terimda.
17 Hang en emen naugb en esai Mer Geigouhw dau areg graga augwan dou yeng yugmahara gedig yen yeigtou aigusi dau Allah sug nosa dara emeng Yahudi gedig emen emeigtou deinyor Allah maman maugwan toua. Dauntoba sug maman macinaga dau Mer Geigouhw ginohob, kaba, maman mabemocedoum toua deitero. Doba eic dag maman daihim naugb sug maman maic gesgigouhwesem ucugb. Dara arautut maman naugb sug maman man aud Allah, dauntoba en eic gesgigouhwesa dou maman ucugb ogdoc Mer Geigouhw gin toua.
18 Anai sug Krisdus en omom taiba sogo salib naugb maman sesar dag ginohob, kaba, maman mamahau naugb sug maman madebeij maman Mamina Allah toua deitero. Doba ogdoc Krisdus men geicara gin, hang yeng yugmahara dara emeng Yahudi maman maugwan maic mamus naugb sug maman macuncum dou en dara masijaresa en. Anai Mena Gogoufu hom gin, kaba, en einesa maman maugwan mamdoc mesohob. Hang en emarautut maman naugb sug maman man aud maman Mamina Allah gin toua terimda.
19 Dangga hang, sug yen yedag hom dara emenohob, kaba, yen yemedag lugmahara dara leng medigo dau emen toua deitero. Doba maman maugwan madag Allah men meijouhuda hom. Hanoba maman maugwan madag men logodeh gedig len leigtou desij en se men tu touohob.
20 Sug yen yeigtou desij Allah se en men tu dag ginohob, kaba, en ohud yen toua dag en men tu icira leng lesai Allah moro sug nosa dara leng lesai Mer Geigouhw eisaugb Krisdus, aninim dara emeng Yahudi gin touohob. Anai meren geicara gin, kaba, edag buc gototo naugb yen. Doba Krisdus Yesus enin eng edag buc mandeij naugb augwan toua.
21 Dangga hang, enin eng edag sud hom gesedougwo tu gini dara men goubesa. Dauntoba tu gini emaic baisoboro touwero, doba ebsugeb. Hanoba en ohud bauloulo dag maman Adehsud men tu gecabeci gin toua namcir.
22 Dara en emohud emeng Yahudi gin dousero. Doba en ohud yeng yugmahara gin toua. Dauntoba yeni dara leng gus maman maugwan madag Allah men tu naugb sug en eigtousa ogdoc Mena Gogoufu gin toua terimda, anai yen toua yedag hom dara Krisdus Yesus ginohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA