1 Tungkuḷ intua, secara rohani mo'ikow minatoidon, sim binaradosadon bo doií dinumudui kom parentah mita i Allah.
2 Wakutu intua mo'ikow dinumudui kong kabiasa'an mita in dunia na'a; tua im mangalenya mo'ikow dinumudui kom mongongawasa kom baḷangon, tuata in roho inta masai na'a nongawasa kong gina in intau mita inta diaí motoindudui ko'i Allah.
3 Kolipod, kita komintan naí doman mosia tua; kita nobiag dinumudui doman kon tabiat in awak naton bo nogaid kon onu inta mokosanang kon awak bo raian naton. Wakutu intua kita na'a intaubií doman inta kinotugatan in toruí i Allah, naí doman mosia tua.
4 Ta'e moḷobendon totok in totabi i Allah! Naí domai tua in tabi-Nya ko'i naton,
5 sahingga kowakutu in rohani naton minatoipa, sin lantaran kita diaí dinumudui kon ibog i Allah, biniag-Nyadon bui ing kita noyotakin i Kristus. Tuamai tongaíbií lantaran kinopopia ing gina i Allah, daí pinosaḷamat-Nya im mo'ikow.
6 Lantaran kita ain notobatuí i Kristus, daí biniag bui i Allah ing kita noyotakin i Kristus simbaí kita momarentah doman moyotakin-Nya kon soroga.
7 Inaidan i Allah intua, simbaí kon singgai mo'iduduimai ko'ontongandon intau koḷoben in tabi i Allah. Tabi tatua pinonyata i Allah pinototoi kong kopopia ing gina-Nya ko'i naton inta pinotonsigad ko'i Kristus Yesus.
8 Ki Allah motabi ko'i monimu, tuamai pinosaḷamat-Nya im mo'ikow sin nopirisayadon ko'i Kristus im mo'ikow. Mo'ikow nosaḷamat de'emanbií lantaran ḷopií monimu tontanií. Tua in totabibií i Allah. Manangka intua diaíbií mota'au in tobatuímai intau dumodia kon soaáḷ tatua.
9 (2:8)
10 Ki Allahbií in nomia ko'i naton, bo pinongin i Kristus pinomia-Nya ing kita, simbaí kita mogaid kon soaáḷ mita inta mopia inta ain sinadia-Nya ko'i naton.
11 Utatku mita inta de'eman intau Yahudi! Toropkah ing ka'ada'an monimu kolipod: Mo'ikow sinangoi "intau diaí sinunat". Tua im pinonangoi intau Yahudi inta sinumangoi sinunat (makusudnya, ain noko'ulií kon tanda inta inaidan intau kon awak monia).
12 Kon wakutu intua mo'ikow diaípa notobatuí i Kristus, yo mo'ikow nion intaubií mita mokokiaíngoi inta diaí no'itakin kon umat inta pinilií i Allah. Bo mo'ikow in diaíbií doman no'ibonu kon dodandian inta inaidan i Allah takin umat-Nya. Mo'ikow nobiag kon dunia na'a takin diaí koharapan bo diaí doman ko Allah.
13 Ta'e masa in na'a, lantaran mo'ikow bo ain notobatuí i Kristus Yesus, daí mo'ikow inta noyayuk ing kolipod, aindon pinopodiug sing ki Kristus aim minatoi ko'i monimu.
14 Sin Siabií tua pangkoi in dodamean naton. Sia in nopotobatuí kon intau mita in Yahudi bo de'eman Yahudi. Mosia binaliídon tobangusa. Dinding sosaturuan inta nopoyotondií ko'i monia, irimumudon i Kristus takin cara nopomayakdon makow awak-Nya minatoi.
15 Hukum agama Yahudi takin parentah bo atorangea mita aindon pinopatan i Kristus, simbaí bangusa doyowa tatua mobaliídon tobangusa, bangusa in intau mobagu, inta motobatuí takin-Nya. Tua in cara i Kristus nopoyodame.
16 Ki Kristus minatoi sim mopotobatuí kom bangusa doyowa tatua, bo mopoyodame doman ko'i monia takin i Allah, sahingga mo'inggamaídon in sosaturuan tatua.
17 Manangka intua ki Kristus namangoi bo nopota'au in Habar Mopia soaáḷ dodamean tatua ko'i monimu; pinomayak mo'ikow intau inta de'eman Yahudi inta kolipod noyayuk ko'i Allah, ande intau mita in Yahudi inta nodiug ko'i Allah.
18 Pinotonsigad ko'i Kristus, kita komintan, intau Yahudi andeka de'eman intau Yahudi, takin totuḷung in Roho i Allah inta tobatuí tua, kita mota'au dimiug ko'i Amaí.
19 Daí tuamai, mo'ikow in de'eman bidon intau mokokiaíngoi andeka intau ḷuai. Ta'e mo'ikow in tumpaḷa bidon umat i Allah. Mo'ikow nion nobalií bidon anggota koluarga i Allah,
20 inta pinosindog kon tudu im pondasi inta inaidan in rasul mita bo nabi, bo ki Kristus Yesus in nobalií batu inta totok moponting.
21 Siabií tua in nogaid kom bayongan bangunan tatua nobalií Baḷoi i Allah inta sinontanií ko'i Tuhan.
22 Lantaran nobiag notobatuí i Kristus, daí mo'ikow doman ing koyogot posindogon moyotakin intau mita ibanea, mobalií tobatuí baḷoi untuk ko'i Allah; inta pogutunan in Roho-Nya.

Studi Alkitab lengkap, silahkan lihat Alkitab SABDA :: Efesus 2
Studi Alkitab mobile, silahkan lihat Alkitab Mobi :: Efesus 2

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke