Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Laẽq side pade matẽ secare rohani lantaran pelanggaran-pelanggaran dait dose-dose side pade.

² Lẽq waktu nike side pade turut kebiasean-kebiasean dunie niki; artine side pade taat lẽq penguase-penguase saq araq lẽq awang-awang, nike roh saq mangkin nguasein atẽ dengan-dengan saq durhake.

³ Laẽq ite selapuq pade ẽndah kance ie pade; ite idup turut tabiat manusie dait ngelaksaneang napi saq nyenengang awak dait pikirante saq jahat. Lẽq waktu nike ẽndah ite jari dengan-dengan saq temurkeang siq Allah, pade maraq dengan-dengan lain.

⁴ Laguq Allah saq limpah siq rahmat, lantaran kasih-Ne saq belẽq, saq Ie limpahang tipaq ite,

⁵ sehingge lẽq waktu ite masih matẽ secare rohani lantaran pelanggaran-pelanggarante, Ie ngidupang ite malik bareng-bareng kance Almasih. Jari, cume lantaran rahmat Allah, side pade teselametang siq Allah.

⁶ Dait lẽq dalem Deside Isa Almasih, Allah ngidupang ite malik bareng kance Deside Isa, adẽq ite mrẽntah ngiring Ie lẽq sorge.

⁷ Allah ngelaksaneang nike adẽq lẽq jaman saq gen dateng, manusie bau serioq berembẽ belẽq rahmat-Ne saq tenyatayang tipaq ite langan kesolahan-Ne langan perantarean Deside Isa Almasih.

⁸ Sẽngaq lantaran rahmat Allah side pade teselametang langan iman; nike ndẽqne hasil usahende, laguq teicanin siq Allah,

⁹ nike ndẽqne hasil pegawẽande: Sampunang araq dengan saq nyombongang diriqne.

¹⁰ Sẽngaq ite niki ciptean Allah, dait langan Deside Isa Almasih, Allah miaq ite adẽq ite ngelaksaneang hal-hal saq solah saq sampun Ie siepang umaq ite.

¹¹ Semeton senamian saq ndẽq dengan Yahudi! Pade inget keadaande lẽq waktu saq laẽq: Side pade tesebut "dengan ndẽq besunat", siq dengan Yahudi saq ngaku diriqne tesunat (maksutne saq sampun mauq tande saq tepiaq siq manusie lẽq awak ie pade).

¹² Lẽq waktu nike side pade idup jaoq lẽman Almasih, side pade dengan pendateng saq ndẽq termasuk umat pilẽqan Allah, Israel. Side pade ndẽq termasuk lẽq dalem iketan perjanjian saq tepiaq siq Allah kance umat-Ne. Side pade idup lẽq dunie niki ndẽqne bedowẽ harepan dait ndẽqne bedowẽ Allah.

¹³ Laguq mangkin, lantaran side pade sampun lẽq dalem Deside Isa Almasih, side pade saq laẽq jaoq, sampun terapetang siq ninggalne Almasih.

¹⁴ Sẽngaq Almasih nike damẽ sejahterente, saq sampun pesopoq kedue pihak dait saq sampun ngerobohang tembok saq misahang, nike permusuhan.

¹⁵ Sẽngaq siq ninggal-Ne sebagẽ manusie Ie sampun batalang Hukum Taurat kance selapuq prẽntah dait ketentuanne, jari nyipteang keduene tejariang sopoq manusie baru lẽq dalem diriq-Ne, dait siq care nike ngaraqang damẽ sejahtere.

¹⁶ Siq ninggal-Ne lẽq kayuq salib, Almasih damẽang keduene kance Allah, sehingge ndẽq araq malik permusuhan.

¹⁷ Keranaq nike Almasih rauh dait beriteang damẽ sejahtere tipaq side; lẽq side pade dengan bangse-bangse lain saq laẽq jaoq lẽman Allah, dait tipaq dengan Yahudi saq rapet kance Allah.

¹⁸ Siq perantarean Almasih, ite selapuq -- dengan Yahudi atao dengan bangse-bangse lain -- lẽq dalem sopoq Roh, bau parek tipaq Bapa.

¹⁹ Keranaq nike, side pade ndẽq malik termasuk dengan pendateng atao dengan luah. Mangkin side pade bareng-bareng jari dengan-dengan saq tehususang bagi Allah. Side pade anggote-anggote keluarge Allah.

²⁰ Side pade ẽndah tepenganjeng lẽq atas dasar saq tetoloq siq rasul-rasul dait nabi-nabi, dait Deside Isa Almasih saq jari batu utame.

²¹ Ie saq nyusun selapuq bangunan nike jari Gedẽng Allah saq suci.

²² Lẽq dalem Almasih, side pade kenyeke tepenganjeng ẽndah bareng kance dengan-dengan lain jari taoq Allah meneng langan Roh-Ne.

Efesus

Video Efesus 2

Ikuti Kami:

KONTAK | PARTISIPASI | DONASI