Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tonna jolona susi kamu' tomate, te'da miampui katuoan baru jio mai Puang Allataala, natumang kedo gaja'mi sola dosami.

² Ia joo wattu ia to panggaukanmi susi bang to panggaukanna tolino to tangnturu' Puang, ammituru' Ballisi' jao langi' to mparenta sininna setang. Iamo tatta' ngkuasaii to totangmatappa' lako Puang Allataala.

³ Ia joo wattu susimiki' tuu lako tau sola ngasan. Nturu' bangki' kamadoangan penawanta', antapugauk bangngi to gaja'na la mpesannangngi penawanta'. Iamo joo sipato' kumua nakagalliki' Puang Allataala anna la mpabalahhiki' susi tolaen.

⁴ Apa mamase na mangpakamoja' to Puang Allataala te'da susinna.

⁵ Iamo joo ia tontasusi unapa tomate natumang dosata', napatuo pole'miki' sola Almaseh. Napasalama'ki', nasaba' kameloan penawan-Na.

⁶ Napatuo pole'miki' sola Almaseh, napacadokkoki' jao cadokkoan mala'bih sola Almaseh jao suruga antamangparenta sola, nasaba' memmesa'miki' sola Almaseh.

⁷ Napugaukki susi joo dikua anna pangpekitanni lako tolino to tuo lan wattu la dioloi lako kumua tangdikulle mpikkiri'i to pangpakamoja'-Na sola kameloan penawan-Na lako kita', nasaba' ia to napugauk Puang Isa Almaseh.

⁸ Dipasalama' kamu', nasaba' kameloan penawan-Na Puang Allataala, sanga matappa' kamu' lako Puang Isa. Na ia joo tangngia kamu' nnangahhi, apa barakka'-Nara Puang Allataala.

⁹ Te'da midipasalama' nasaba' panggaukanmi. Iamo joo tangsipato' ke denni tau matampo nasaba' kasalamatanna.

¹⁰ Tangsipato'ki' susi joo, sanga Puang Allataalara mbenki' katuoan baru, nasaba' memmesa'miki' sola Puang Isa Almaseh. Nabenmiki' katuoan baru antapugauk kameloan, to napasadia jolomo la tapugauk.

¹¹ Ee, kamu' to tangngia to-Yahudi! Ingaranni torroanmi tonna jolona. Nasanga kamu' to-Yahudi kumua totangdisunna', nasaba' te'da tanda sunna' jio kalemi. Napaui to-Yahudi kumua ia joo tanda sunna', tandana kumua umma'-Nami Puang Allataala to to-Yahudi, apa taura ssunna' tau.

¹² La miingaran kumua ia joo wattu te'dapa mimemmesa' sola Almaseh. Te'dapa midireken tonapilei Puang Allataala. Te'dapa nabasse kamu' Puang Allataala susi to pura nabasse lako umma'-Na to-Yahudi. Lan tee lino te'dapa rannummi la dipasalama', na te'da toopa miissen Puang Allataala.

¹³ Apa ia tee too te'damo misusi joo, nasaba' memmesa'mo kamu' sola Puang Isa Almaseh. Ia to kamu' jolona to te'da miissen Puang Allataala, miissenmi, nasaba' kamatean-Na Almaseh jao kaju sitamben.

¹⁴ Napasikalinomi Almaseh to to-Yahudi sola bangsa tangngia to-Yahudi. Ia to kamatean-Na mpamesa'ki'. Iamo mangka nta'dei to tasialla'i jolona, iamo to kasiewalian.

¹⁵ Nata'dei to atoran agama to-Yahudi sola parentana, dikua anna mpupenjaji mesa'ki' bangsa baru to memmesa' sola Ia. Susimi joo carana mpasikalinoi to to-Yahudi na bangsa tangngia to-Yahudi.

¹⁶ Ia to kamatean-Na jao kaju sitamben mpasikalino toomi to-Yahudi sola bangsa tangngia to-Yahudi na Puang Allataala. Ia to kamatean-Na nta'dei kasiewalian.

¹⁷ Ratui Almaseh la mpangpeissenan kasikalinoan, la lako bangsa tangngia to-Yahudi to tangnnissenpa Puang Allataala, la lako to-Yahudi to nnissenmo Puang Allataala,

¹⁸ anna la to-Yahudi, la totang-Yahudi wa'dingngi nasolan Roh Allataala lako Ambe', nasaba' Almaseh.

¹⁹ Iamo joo ia to kamu' bangsa tangngia to-Yahudi, tangngiamo kamu' tosaleanan ba'tu totangnabasse Puang Allataala. Apa pada-padamo kamu' umma'-Na Puang Allataala sola to-Yahudi to matappa'mo, na direkenmo kamu' pangrapuan-Na Puang.

²⁰ Susimo kamu' bola to dipajenjen jao pangrante mangka narantei rasulu' sola nabi, na Puang Isa Almasehmo to batu aririnna.

²¹ Almaseh mpasikalakki sininna pangkajuanna joo bola dipajenjen sanggenna mangka namenjaji mesa' bola ballo-Na Puang Allataala.

²² Napake too kamu' Almaseh mpajenjenni joo bola sola tomatappa' laen, nasaba' memmesa'mo kamu' sola Ia, anna menjaji ngenan nanii torro Roh Allataala.

Efesus

Video Efesus 2

Ikuti Kami:

KONTAK | PARTISIPASI | DONASI