¹ Efesusk de Alap hon de etal gwesin zi hip, men zen Yesus onak tatem ezauk gwenanke, Paulus onakon. Alap mo dwam gwibin sin ki lwak, zep Kristus Yesus asa dam tasiki– zere hap de olsa dikim gol halada gwen hapye.
² Dawem! Nere mae mo Bian Alap ne Bian Kristus Yesus ne sa kwasang-kwasang zemka mamkam ebe mae hap ol gwizimdi. Hen nen zere nik mo taha terenak esa lowehe gwer.
³ Nen Bian Alapsa boltere tan, Bian Kristus Yesus mo Biansa, sap nen mese Kristus hun eraha-en gwek. Zen zep ngatan zi mo lang nakon nebe mae hap enho nakon dikim engatan gwen hap dena sul sonenkam gol gwizimnira.
⁴ Sap Zen mes auhu-kamana ansa de yang gulsun sremnak nesa anakan dam tasibirki, “An zen sa ere mo Tane naban de zeraha-en gwenkam ere mo nwenak edakastil hen enho kles gwesin sremkam lowehe gwer.”
⁵ Sap Zen nesa kwasang gwibiridaka, zep nonol lonesen nakon mes ki nesa anakan kalang gwibiridaka, “An zen sa ere mo Tanena Yesus mo syala kon ere mo hanan tabin walas hap eliwehe gwer.” Zen kitak zere mo hamal hap de kalang gwe gun sun ki lwak.
⁶ Zen in zep sa tingare zini zeno bosena teip nulsuk gweblal, sap Zen mes zere mo serkam de kwasang-kwasangna kirekam goltreizimki. Zere mo dang tininak de Walasna Kristus hun de zeraha-en gwenkam, Zen dekam kwasang-kwasangna insa nebe mae hap totoresa gol gwizimnira.
⁷ Sap nen de Kristus hun zeraha-en gwenkam, dekam nen ema okamanak de karek-karek nakon ehil gwe hana gwenan, hen neno mae mo kirekam-kirekam karekna man nep tap gulsuk gwizimnira. Sap Tane zik mo kala in dekam nesa ngan tasik gwibirida– men zen te-lidak son nakon wet soblakke. An kitak Alap zere mo serkam de kwasang-kwasang nakon ki kirekam lwak,
⁸ zep totoresa nebe mae hap kwasangna sabak gulzimki. Alap, eiwa, serkam de enlala blal tanganna hen kitak tame gul gwenda,
⁹ Zen in zep angkam zere mo hamal hap de kalang gwe gunnu insa goltreizimꞌira. Zen desa menkam man zi hip aning gul gwizimki. Hwena Zen hen orep mes anakan kalang gweka, “Kim de ano kalang gwen yaklanak zauꞌuk, dekam asa ere mo Tanena zer sonezim– zeno mae mo karek-kareksa dikim ngan gulsuzimdin hip. Zep Deban de zeraha-en gwen wenya, desa kitak aha-erenak asa siri gulsul– sap ngatan zi mo langnak de wenya hen okamanak de wenya. Kristus Zen sa kitak nol gwibiridala.”
¹⁰ (1:9)
¹¹ Mensa Alap kalang gwe guku, “Ëe asa kiresa ere mo walas hap golzim,” zen hwena kitak Kristus hun de zeraha-en gwenkam nebe mae hap hata gwizimnin. Sap Alap nonol lonesen nakon kirekam dep nesa kalang gwibiridaka, hen Zen kitak kirekam syal gwe-gwibiꞌira– dekam dikim zere mo dwam gwibin sin kitak jowen hap. Zeno dwam gwibinni, zen an zen:
¹² Nen an zene nonol Kristussu blol eblaꞌan, tingare zi de nesa hlauludankam, zen dekam sa hen Alap mo bosena teip nulsuk gweblal.
¹³ Zen in zep hendep Alap mo kalangna ebe mae hap kirekam lwak. Em kime eiwa de ol dawemna esane gwek, emsa de ngaya tabin hip dena, em dekam zebe Kristussu laibliblak. Zep in kime Kristus hun kirekam eraha-en gwek, Alap dekam zep eno mae mo enhonak aha-en aha-enkam anakan ale tabir-zimki, “Em an ano bi gweblanna.” Maekam ale tabir-zimki– zere mo Enhosa de ing ta sonezimdinkim, men kirekam sap orep gu-gubirida gwekake.
¹⁴ Alap Zen anakare gu-gubirida gun nuban zere mo Enhona nebe mae hap ing ta sonezimki, “Ëe asa lamkam ebe mae hap tingan sul sonezim– mensae ere mo bi gwibiridan walas hap kalang gwe gukye.” Zep Bian Alap kim de kawesin nikon tingan gwiswe soneꞌanka, zen dekam sa ki lwal. Dekam kitak Ngatan Zini Alap mo bose ensa esa teip ulsuk gweblal.
¹⁵ Zen in zep, ee kime emsa anakan salbiridak, “Zen man Bian Yesussu daibliblaꞌan, hen tingare Alap hon de etal gwesin wenya man kwasang neibirida gwenan,”
¹⁶ ee dekam zebe ebon mae onakon zausun sremkam Alapsa anakan gu sone gweblanan, “Em asa sam ta gwenda.” Zep ee home Alapsa de gu sone gweblankam emsa eititi gwibirida gwenan.
¹⁷ In zebe Ngatan Zini Bian Yesus mo Bian Alapsa anakan ebe mae hap abe ta tine gwenan, “Bian, ere mo Enho nakore enlala blala ing ta sone gwizim– hen Emsa dikim dawemkam tame tan hap denaye.
¹⁸ Hen Bian, dikire zeno mae mo enhona engatan gwizimk– dekakim anakan tame nul gwek, ‘Ëe kiresa asa Bian onakon hla kul– Zena men zep nesa kwang guludakaye.’ Hen Bian, Emki enho nakon anakan hleng sosubirida gwen, ‘Kirekam-kirekam dawemna mensa Ena ngatan zi mo langnak ere mo hlil irin zi hip hamal gulzimki, zen heꞌho gwibin tanganna.’ Zen dekam sa anakan hen tame nul, ‘Eiwa, nen esa lamkam ulin. Molye ulin srem gwek.’
¹⁹ Bian, dikire hen ere mo serkam de sosonna tame nul gwek– men desa Ena Yesussu de taibliblan wenya kip gol gwizimniraye. In eiwa.” Serkam de sosonna in Bian Alap mes nebe mae hap goltreizimki–
²⁰ in kim Kristussu tin nikon ngaya takake. Dekam zep hendep Desa gulkꞌnen tangan drene seka– zere mo dam taha san dekam.
²¹ Zep eiwa teipsin tanganna, Kristus Ze-en. Desa de kwe tanna hom tangan– tingare irik gin nikon, sap hen tingare teipsin-teipsin zi nikon, sap ngatan zi mo langnak de lowehe gwen wenya kon, sap hen angkam de okamana awe de lowehe gwen wenya kon, hen sap lamkam de okama esenak de wenya kon.
²² Zep Alap mes kitak Kristus mo tahanak kang gulku, in zep anakan gubluka, “Em an tingare Kristen zi mo nola Zen.
²³ Kitak de Kristen zini, Zen ere mo taha-tana mo kim sa okamanak lowehe gwer– san de ere mo timni kiye.” Zen in zep Kristus zere mo timni insa hendep tingare okama naban sul sone gwenda.