Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Genduari nggo kupepilihken man bandu, pasu-pasu ntah sumpah. Adi nggo jadi enda kerina man bandu, janah kam sangana nggeluh i tengah-tengah bangsa ku ja kam ikerapken TUHAN Dibatandu, ingetndu me pilihen si nggo kubereken man bandu.
2 Adi kam ras sinursurndu mulihken ku TUHAN, janah alu bulat ukurndu ikutkenndu perentah-PerentahNa si kubereken man bandu wari enda,
3 emaka mekuah ate TUHAN Dibatandu man bandu. I tengah-tengah bangsa-bangsa inganndu IpemerapNa e nari IbabaNa kam mulih, janah IberekenNa ka kesangapen man bandu.
4 Aminna pe nggo kam merap seh ku tampuk doni, ipepulung ras ilegi TUHAN Dibatandu kam mulihken,
5 gelah banci ka man bandu mulihken negeri ingan ninindu mbarenda tading. Kesangapenndu ras teremna beliganndu ndauh belinen asang si penah ibereken TUHAN man nini-ninindu nai.
6 TUHAN Dibatandu mereken pusuh si patuh man bandu ras man sinursurndu, maka ikelengindu Ia alu bulat ukurndu gelah kam terus nggeluh i negeri e.
7 IpindahkenNa kerina sumpah enda man musuh-musuhndu si rate nembeh ras ndehken kam,
8 emaka iikutkenndu Ia ras icikepndu ka kerina perentah-perentah si kubereken man bandu wari enda.
9 TUHAN erbanca maka kam sangap i bas kerina si idahikenndu; ertuah kam, merih asuh-asuhenndu, ras mbuah sinuan-sinuanndu. Bagi megahna iakap TUHAN mereken kesangapen man nini-ninindu bage me pe megahna AkapNa mereken kesangapen bandu.
10 Tapi arus maka iikutkenndu Ia ras icikepndu kerina undang-UndangNa si isuratken i bas kitap PengajarenNa enda. Arus maka jera kam ku Ia alu bulat ukurndu.
11 Perentah si kubereken bandu wari enda, labo meserasa, ntah la terjakandu.
12 Labo i langit cibalna. Emaka labo perlu kam nungkun, 'Ise nge ndia nangkih ngelegi undang-undang e man kami, maka banci ibegiken ras iikutken kami?'
13 Labo i kepar lawit. Emaka labo perlu kam nungkun, 'Ise nge ndia lawes ngepari lawit ngelegi undang-undang e man kami, maka banci ibegiken ras iikutken kami?'
14 Lang! Undang-undang e lit kap bas kam i jenda. Ietehndu e, banci ibelaskenndu, emaka genduari ikutken dage.
15 Sendah kupepilihken man bandu, si mehuli ntah si jahat, kegeluhen ntah kematen.
16 Adi iikutkenndu perentah-perentah TUHAN Dibatandu, si kubereken man bandu wari enda, adi keleng atendu Ia, iikutkendu Ia, janah icikepndu kerina undang-UndangNa, emaka sangap kam, janah kam jadi bangsa si nterem. TUHAN Dibatandu masu-masu kam i negeri si nandangi iinganindu e.
17 Tapi adi la iikutkenndu ras la ibegikenndu, tapi nggit kam ibabai kalak papak gelah nembah man dibata-dibata si deban,
18 kernep me kam. Emaka kupersingeti kam genduari i jenda: la kam ndekah nggeluh i bas negeri si i kepar Lau Jordan si nandangi iinganindu e.
19 Kupepilihken man bandu, siapai atendu: kegeluhen ntah kematen, pasu-pasu Dibata ntah sumpah Dibata; kulebuh langit ras doni jadi saksi kerna pilihenndu e. Emaka pilihlah kegeluhen maka kam ras kesusurenndu nggeluh.
20 Kelengilah TUHAN Dibatandu, ikutken lah Ia, ras setia lah man BaNa, emaka umurndu ras umur sinursurndu ipegedang i bas negeri si nggo ipadanken TUHAN Dibatandu merekenca man nini-ninindu Abraham, Isak ras Jakup."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA