Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai marhusor ma hita anjaha mardalan hu halimisan mandompakkon Laut Sigerger, songon na dob ipatugah Jahowa hu bangku, gabe hundokah iinggoti hita pardologan Seir.
2 Dob ai roh ma hata ni Jahowa hu bangku sonon,
3 “Domma sungkup dokahni hanima manginggoti pardologan on, marhusor ma hanima dompak utara.
4 Anjaha patugah ma hubani bangsa on, bontasonnima ma nuan parbalogan ni abangnima, ai ma ginompar ni si Esau, na marianan i Seir; jadi mabiar ma sidea mangidah hanima, halani ai ramotkon hanima ma dirinima,
5 seng bulih mambahen sindir hanima laho marmunsuh pakon sidea, ai anggo humbani tanoh ni sidea ai seng anjai bereon-Ku bennima age santopap, ai domma Hubere pardologan Seir hubani ginompar ni si Esau bahen parbagiananni.
6 Maningon bolionnima do sipanganon humbani sidea, ase bulih hanima mangan; bah pe maningon bolionnima do humbani sidea ase bulih hanima minum.
7 Ai domma ipasu-pasu Jahowa Naibatamu ham bani haganup horja ni tanganmu. Ia do manarihon ham sadokah mardalan i halimisan na bolag on, domma pala ompat puluh tahun dokahni, sai ihasomani Jahowa Naibatamu do ham, seng hurangan ham age bani aha.”
8 Jadi dob salpu ibontas hita tanoh ni saninanta ai, ai ma ginompar ni si Esau, na marianan i Seir, bani dalan na manadingkon Arabah, Elat pakon Ezion-Geber, mangegot ma use hita mandompakkon halimisan Moab.
9 Dob ai roh ma hata ni Jahowa hu bangku, “Seng bulih sosakonmu Moab, anjaha seng bulih mambahen sigiuti hanima laho marporang dompak sidea, ai anggo humbani tanohni ai seng adong bereon-Ku bahen parbagianan bennima, ai domma Hubere Ar hubani ginompar ni si Lot bahen parbagiananni.”
10 Bani na basaia halak Emi do marianan ijai, ai ma sada bangsa na bolon, na buei anjaha na ganjang songon halak Enak.
11 Tarhira sidea homa hubani halak Refaim, usih songon halak Enak, jadi igoran halak Moab do sidea halak Emi.
12 I Seir marianan do na ijia halak Hori, gabe roh ginompar ni si Esau manoluk tanoh ai, anjaha siap sidea ibahen, lanjar marianan ijai gantih ni sidea, usih songon na binahen ni halak Israel hu tanoh parbagiananni, na binere ni Jahowa hubani sidea.
13 “Sonari pe bingkat ma nasiam anjaha dipari nasiam ma Bah Sared.” Jadi idipari hita ma Bah Sared ai.
14 Tapi anggo dokahni hita mardalan hun Kades-Barnea das ronsi na mandipari Bah Sared hita, tolu puluh ualuh tahun do, paima bois ganup sundut parmunsuh hun tongah-tongah ni parlampolampoan in, songon na dob binulawankon ni Naibata hinan hubani sidea.
15 Ai tangan ni Jahowa do na mangimbang sidea, laho maniapkon sidea hun tongah-tongah ni parsaranan in, paima bois sidea haganup.
16 Jadi dob bois ganup halak parmunsuh, matei hun tongah-tongah ni bangsa in,
17 nini Jahowa ma hu bangku,
18 “Maningon bontasonmu sadari on parbalogan ni Moab dohorhon Ar;
19 dob ai padohor ma ho pakon halak Amon. Seng bulih sosakonmu sidea, ai anggo humbani tanoh ni halak Amon seng dong bereon-Ku bam bahen parbagiananmu; ai domma Hubere tanoh ai hubani ginompar ni si Lot bahen parbagiananni.”
20 Age nagori ai tarhira do ai hubani halak Refaim, halani halak Refaim marianan ijai na ijia, jadi igoran halak Amon ma sidea halak Samsumi,
21 ai ma sada bangsa na bolon, na buei anjaha na ganjang usih songon halak Enak, tapi isasapkon Jahowa do sidea i lobei ni sidea; jadi isoluk halak Amon ma tanoh ni sidea ai, lanjar sidea marianan ijai gantih ni sidea,
22 usih songon na binahen ni Jahowa hubani ginompar ni si Esau, na marianan i Seir, sanggah na siniapkon-Ni halak Hori ai i lobei ni sidea, ase sidea manoluk tanoh ai, anjaha marianan ijai gantih ni sidea das ronsi sadari on.
23 Sonai homa halak Awi, na marianan i dusun-dusun das hu Gaza, gabe roh halak Kaftor maniapkon sidea, anjaha lanjar marianan ijai gantih ni sidea.
24 “Bingkat ma hanima, mardalan ma, anjaha dipari hanima ma Bah Arnon. Tonggor ma, domma Huondoskon hubagas tanganmu si Sihon, raja hun Hesbon, halak Amori ai, rap pakon tanohni, pungkah hanima ma manoluk tanoh ai anjaha marmunsuh dompaksi.
25 Bani na sadari on ma Ahu mamungkah mambere uhur hagobiron pakon biar mangidah ho, hubani bangsa na i toruh ni ganup langit, ase hitir anjaha gobir mangidah ho, anggo ibogei sidea baritamu.”
26 Dob ai husuruh ma suruhan hun halimisan Kedemot marayak si Sihon, raja hun Hesbon, mangkatahon hata hadameion sonon,
27 “Lopas ma ahu mamontas hun tanohmu, dalan na bolon in pe irik-irikonku, lang pe manirpang ahu hu siamun barang hu sambilou.
28 Sipanganon maningon marboli do ai jualonmu bangku ase boi hanami mangan, bah pe sonai do maningon marboli do bereonmu hu bangku ase adong inumonnami, pitah lopas ham ma ahu mardalan nahei hun tanohmu,
29 usih songon na binahen ni ginompar ni si Esau bangku, ai ma na marianan i Seir, age halak Moab na marianan i Ar, paima salpu hudipari Bah Jordan das hu tanoh na dob nilayak-layakkon ni Jahowa Naibatanami bennami.”
30 Tapi lang ra si Sihon, raja hun Hesbon, manlopas hita mamontas hun tanohni ai, ai domma ipatendel Jahowa Naibatamu tonduyni anjaha ipahengkeng uhurni, halani sihol ondoskonon-Ni do ia hubagas tanganmu, songon na dob talar masa sadari on.
31 Dob ai roh ma hata ni Jahowa hu bangku, “Tonggor ma, domma Hupungkah mangondoskon si Sihon rap pakon tanohni ai i lobeimu, halani ai pungkah hanima ma manoluk tanohni ai bahen parbagianannima.”
32 Dob ai luar ma si Sihon manjumpahkon hita hu Jahas, ia pakon ganup bangsani, sihol marmunsuh.
33 Tapi iondoskon Jahowa, Naibatanta in ma i lobeita, gabe italuhon hita ma ia, pakon anakni ampa haganup bangsani.
34 Jadi tunduk ma ibahen hita ijia ganup hutani, anjaha siap ibahen hita ganup huta, dalahi, naboru pakon dakdanak; sada pe lang ilopas hita tading;
35 pitah pinahan ai iayob hita banta ronsi taban-taban hun huta na ipatundukta ai.
36 Singgan ni Aroer na i topi ni Bah Arnon, pakon singgan ni huta, na i topi ni bah ai das hu Gilead, seng dong huta na so tunduk ibahen hita, haganup do iondoskon Jahowa Naibatanta in hubagas tanganta.
37 Pitah hu tanoh ni halak Amon seng idohori ham, ai ma, hu topi ni Bah Jabok, hu huta na i pardologan ronsi ganup na dob pinandang ni Jahowa, Naibatanta in hinan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA