Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ramotkon ma bulan Abib, anjaha marpesta paska ma ham bani Jahowa Naibatamu; ai bani bulan Abib do ham iarahkon Jahowa Naibatamu luar hun Masir, borngin-borngin.
2 Maningon sayatonmu do bani pesta Paskah lombu pakon biribiri bani Jahowa Naibatamu, bani ianan sipilihon ni Jahowa bahen ianan ni goran-Ni ijai.
3 Seng bulih panganonmu ruti na niigaran bani pesta Paskah ai; maningon pitu ari dokahni panganon nasiam ruti na so niigaran, ruti hasombuhon, ai tarolos do ham luar hun tanoh Masir; ase ipaingat-ingat uhurmu sadokah ham manggoluh ari pardaratmu hun tanoh Masir.
4 Halani ai seng bulih taridah bamu na migar bani sab nagorimu pitu ari dokahni, anjaha seng bulih marborngin humbani pinahan na sinayatmu bani bodari ni ari parlobei ronsi patarni ai.
5 Seng bulih sayatonmu Paskah ai ibagas sada huta, na sihol bereon ni Jahowa Naibatamu bamu.
6 Maningon bani ianan, na sihol pilihon ni Jahowa Naibatamu, bahen ianan ni goranni ijai, sayatonmu Paskah ai, bodari marayak manabad mata ni ari, bani panorang parluarmu hun tanoh Masir.
7 Maningon lompahonmu anjaha panganonmu do ai bani ianan, na sihol pilihon ni Jahowa Naibatamu Bani; patarni ai bulih do ham mulak hu lampolampomu hinan.
8 Maningon onom ari dokahni panganonmu ruti na so niigaran; anjaha bani ari papituhon partumpuan na majombut ma ai bani Jahowa Naibatamu; seng bulih horjahononmu barang aha pe ijai.
9 Maningon bilangonmu pitu minggu, pungkah ma mamilang na pitu minggu ai olat ni dob mamungkah madabuh sasabi hubani gandum.
10 Dob ai marpesta minggu ma ham bani Jahowa Naibatamu, marguru hubani sibere-bere, sibereonmu humbani rosuh ni uhurmu, romban hubani pasu-pasu ni Jahowa Naibatamu bamu.
11 Maningon marmalas ni uhur ma ham i lobei ni Jahowa Naibatamu, ham pakon anakmu pakon borumu, jabolonmu dalahi pakon jabolonmu naboru, halak Levi na ibagas hutamu, halak dagang, na tading maetek, pakon na mabalu na i tongah-tongahmu, bani ianan sipilihon ni Jahowa Naibatamu, bahen ianan ni goran-Ni ijai.
12 Maningon ingatonmu, jabolon do ham na ijia i Masir, maningon ramotanmu anjaha horjahononmu do aturan on.
13 Maningon marpesta lampolampo ham pitu ari dokahni, anggo domma ipatumpu ham buah ni pardogeianmu pakon pangilanganmu.
14 Maningon marmalas ni uhur ham bani pestamu ai, ham pakon anakmu pakon borumu, jabolonmu dalahi pakon jabolonmu naboru, halak Levi, halak dagang, na tading maetek, pakon na mabalu i tongah-tongahmu.
15 Maningon pitu ari dokahni ham marpesta bani Jahowa Naibatamu bani ianan sipilihon ni Jahowa; ai pasu-pasuon ni Jahowa Naibatamu ma ham bani haganup gogoh ni tanohmu, pakon bani haganup horja ni tanganmu, ase marmalas ni uhur tumang ma ham.
16 Maningon tolu hali ibagas satahun roh sagala dalahi na i tongah-tongah nasiam hu lobei ni Jahowa Naibatamu, bani ianan sipilihon ni Jahowa, ai ma bani pesta ruti na so niigaran, bani Pesta Minggu, pakon bani Pesta Parlampolampoan. Seng bulih marambung tangan roh barang ise hu lobei ni Jahowa,
17 ganup tene mambere marguru hubani na tarbere tanganni, romban hubani pasu-pasu, na binere ni Jahowa Naibatamu bamu.
18 Maningon pabangkitonmu do panguhum pakon panuturi bani haganup hutamu, na binere ni Jahowa Naibatamu bamu, mangihutkon margamu; sidea ma na manguhumi bangsa in ibagas hasintongan.
19 Seng bulih papeolonmu uhum; seng bulih ham martonggor jumbak; seng bulih jaloonmu sisip, ai sisip do papitung mata ni paruhur anjaha mamutor hata ni halak parpintor.
20 Maningon hapintoron, pitah hapintoron do parayakonmu, ase manggoluh ham anjaha teanonmu tanoh, na sihol bereon ni Jahowa Naibatamu bamu.
21 Seng bulih suanonmu tiang sisombahon atap hayu aha pe, usihan ni sisombahon Asera, dohor hu anjapanjap ni Jahowa Naibatamu, na sihol sipaulionmu ai.
22 Seng bulih homa pajongjongonmu bamu tugu sisombahon, na hinagigihon ni Jahowa Naibatamu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA