Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E taon se kapeng tello’ pamarenta’anna Rato Belsiyazar, sengko’ nangale’e pangaton se nomer dhuwa’.

² E dhalem pangaton jareya sengko’ pangrasana badha e propinsi Elam, e Susan, ibu kotthana Persiya. Sengko’ manjeng e seddi’na Songay Ulai,

³ ban e penggir songay jareya badha settong dumba lake’ se atandhu’ lanjang dhadhuwa’, se settong alanjangan ban aanyaran dhari settonganna.

⁴ Sengko’ nangale’e dumba lake’ jareya nondhu’ addhep ka bara’, ka dhaja ban ka lao’. Tadha’ keban settonga se kowat ngadhebbi otaba se lopot dhari kobasana dumba jareya. Dumba jareya ngala’ sakarebba dibi’ sarta pas daddi sombong.

⁵ Sabatara sengko’ mandeng ka dumba jareya, pas badha embi’ lake’ ka’-berka’ dhari bara’ lebat e bume. Paberka’na ce’ santa’na sampe’ sokona ta’ nyedding ka tana. E antarana matana se dhadhuwa’ badha tandhu’na se ce’ katarana.

⁶ Embi’ lake’ jareya nyander ka seddi’na dumba lake’ se etangale’e sengko’ e penggir songay gella’, pas nyerbu ka dumba jareya ce’ galagga.

⁷ Sengko’ ngabassagi embi’ se nyerrang dumba lake’ jareya. Panyodhugga ce’ bangedda sampe’ dumba jareya tandhu’na se dhadhuwa’ potong. Dumba lake’ jareya ta’ bisa alaban, ngalto’ ka tana pas eda’-didda’; tadha’ oreng settonga se nolong.

⁸ Embi’ lake’ jareya sajan raja. Tape e bakto kakobasa’anna la ngo’bul ka cek-oncegga tandhu’na se raja jareya potong; e kennengnganna tandhu’ se potong jareya pas tombu tandhu’ se ce’ katarana pa’-empa’, addhebba kabbi ta’ padha.

⁹ Dhari tandhu’ se settong pas tombu tandhu’ laen se kene’, tandhu’ jareya pas daddi ce’ rajana ban kakobasa’anna atamba lebar ka lao’, ka temor ban ka tana se ce’ leburra.

¹⁰ Tandhu’ jareya sajan raja sampe’ cokop kakowadanna mon nyerranga tantarana sowarga, iya reya tang-bintang, la’-mala’ badha pan-barampan meggi’ se epelpallagi ka tana pas enyek-enyek.

¹¹ La’-mala’ embi’ jareya nangtang panglimana tantarana sowarga, maambu kurban tor-ator ren-aren se eatorragi ka panglima jareya, ban magujur bengko kennengnganna kabakteyan ka panglima jareya.

¹² Reng-oreng e jadhiya laju molae agabay dusa ban ta’ ngatorragi ban-kurban se ewajibbagi. Daddi kabakteyan se bendher ebuwang ka tana. Tandhu’ jareya ahasel e dhalem apa’a bai se elakone.

¹³ Saellana jareya sengko’ ngedhing malaekat padha saleng atanya, "Sampe’ bila sabarang se etangale e dhalem pangaton reya se ambuwa? Sampe’ bila dusa se raja reya agante kurban ren-aren? Sampe’ bila tantara sowarga ban kennengnganna kabakteyan enyek-enyek?"

¹⁴ Sengko’ ngedhing badha malaekat se nyaodi, "Jareya bakal terrosa sampe’ saebu saratos saeket are; saabidda jareya tadha’ oreng ngatorragi kurban gu-laggu ban kurban asar. Saellana jareya kennengnganna kabakteyan bakal abaliya ka asalla."

¹⁵ Teppa’na sengko’ ker-mekker apa artena pangaton jareya, o-tao badha se manjeng e adha’an sengko’ se akaton akantha manossa.

¹⁶ Sengko’ ngedhing badha sowara dhari penggir dhissa’na Songay Ulai, dhabuna, "Jibra’il, terrangngagi ka oreng jareya artena pangaton jareya."

¹⁷ Jibra’il se ngadek e adha’na sengko’ jareya pas nyander ka seddi’an sengko’. Sengko’ ce’ tako’na, sampe’ robbu ka tana. Dhabuna Jibra’il ka sengko’, "He manossa se ta’ langgeng, ba’na kodu tao ja’ pangaton jareya nyareta’agi parkara aher jaman."

¹⁸ Sabatara Jibra’il jareya abu-dhabu, sengko’ kalengnger. Tape malaekat Jibra’il neggu’i sengko’, sengko’ pas epamanjeng pole. Saellana pas adhabu,

¹⁹ "Bi’ sengko’ ba’na ebala’ana apa se kadaddiyana pagi’ polana Allah duka. Sabab pangaton jareya nerrangngagi aher jaman.

²⁰ Dumba lake’ se etangale’e ba’na jareya, se atandhu’ dhadhuwa’, menangka parompama’anna karaja’an Mediya ban Persiya.

²¹ Embi’ lake’ jareya menangka parompama’anna karaja’an Yunani, ban tandhu’ se ce’ katarana e antarana matana se dhadhuwa’ jareya ratona se dha’-adha’ kadibi’.

²² Tandhu’ pa’-empa’ se kalowar saellana tandhu’ se dha’-adha’na potong, artena karaja’an Yunani bakal pecca’a daddi karaja’an pa’-empa’, tape tadha’ settonga se kowadda padha ban karaja’an se dha’-adha’.

²³ E bakto karaja’an-karaja’an jareya la para’ napa’a ka aherra, mon kajahadan la napa’ ka cek-oncegga, bakal dhatengnga rato se cengkal, jahat ban dujan nepo.

²⁴ Rato jareya bakal daddiya ce’ kowadda, tape banne polana kakowadanna dibi’. Rato jareya bakal maancora sabarang se badha, sampe’ oreng padha marenges ban sabarang se elakone bakal ahasela. Reng-oreng se parjuga sarta ommadda Allah bakal epateyana.

²⁵ Sarrena rato jareya salenter, tepowanna bakal ahasela. Rato jareya nyombongngagiya aba’na ban ta’ kalaban abala kaadha’ bakal mateyana oreng sabannya’na. La’-mala’ rato jareya bangal alaban ka Rato Se Mahaagung. Tape aba’na bakal epaancora ta’ kalaban kakowadanna manossa.

²⁶ Pangaton parkara kurban asar ban gu-laggu se la eterrangngagi ka ba’na rowa, bakal kalakona onggu. Tape jareya gi’ kadaddiyana pagi’; daddi ja’ kabala ka sapa’a bai."

²⁷ Sengko’ pas laju lo’lo’ sarta pas sake’ sampe’ pan-barampan are abidda. Saellana jareya sengko’ pas jaga terros ngalakone sakabbinna tang lalakon kaagem rato. Tape sengko’ ngalengsang mekkere ton-pangatonan jareya ban ta’ bisa ngarte.

Daniel

Video Daniel 8

Ikuti Kami:

KONTAK | PARTISIPASI | DONASI