Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas tahun si peteluken kenca Belsasar jadi raja, kuidah pengenehenen si peduaken.

² I bas pengenehenen e rempet aku ringan i bas kota Susan si erbenteng i propinsi Elam. Aku tedis i tepi Lau Ulai,

³ janah i tepi lau e kuidah sada bajar biri-biri. Tanduk biri-biri e gedang duana, tapi sada gedangen asa si debanna, janah lebih mbaru pe.

⁴ Kuidah bajar biri-biri e ngegas alu tandukna ku kenjahe, ku Utara ras ku Selatan. La lit sada pe rubia-rubia si ngasup ngambatisa, la lit si banci pulah i bas kuasana nari. Ilakokenna bagi ate-atena, janah dungna meganjang ukurna.

⁵ Tupung mamang-mamang denga ateku kai enda ertina, reh sada kambing kiam i kenjahe nari, janah perban pedasna, nahena lanai ndedeh taneh. I bas kelang-kelang matana lit tandukna si gandil kal.

⁶ Reh ia ndahi bajar biri-biri si kuidah i tepi lau ndai, janah ientamna asa gegehna.

⁷ Kuidah ia ngegas bajar biri-biri e. Perban bage rawana isepahna bajar biri-biri e, janah mesepak ibahanna tandukna duana. Biri-biri e lanai lit gegehna nahankenca. Itendengna, emaka minter ampar i babo taneh. Iperjaki kambing e ia, janah lanai lit ise pe si ngasup nampatisa.

⁸ Reh dekahna reh ganjangna ukur kambing e, tapi tupung paksa kuasana nggo seh kal ganjangna, penggel me tandukna ndai. I bas inganna ndai turah empat tanduk si deban, nuju ku empat dampar.

⁹ I bas sada tanduk, turah ka sada tanduk si kitik, si erkuasa seh ku Selatan ras ku kenjulu bage pe ku Taneh Perpadanen.

¹⁰ Tanduk e turah jadi megegeh, seh maka ia ngasup ngelawan tentera Surga, bintang-bintang pe, janah piga-piga naktak ibahanna ku taneh jenari iperjakina.

¹¹ Puanglima tentera Surga pe ilawanna, janah ipengadina persembahen si tep-tep wari si ipersembahken bana. Rumah Pertoton pe imelketina.

¹² Labo persembahen si tep-tep wari si ipersembahken kalak i je, tapi dosa nge si ibahan kalak i bas Rumah Pertoton e. Agama si tuhu-tuhu nggo isampetken ku taneh. Kai si isura-suraken tanduk e, seh kerina.

¹³ Kenca bage kubegi sada malekat nungkun man malekat si deban nina, "Kasa kai nari dekahna kejadin si teridah i bas pengenehenen e terus erdalan? Kasa kai nari dekahna dosa si mejin nggantiken persembahen si tep-tep wari? Kasa kai nari dekahna tentera Surga ras Rumah Pertoton i perjaki?"

¹⁴ Kubegi malekat ndai njabapsa nina, "Si e terus erdalan kidekah 1.150 wari; janah kidekah si e persembahen karaben ras erpagi-pagi la ipersembahken. Kenca si e ilakoken ka kai si bujur i bas Rumah Pertoton e."

¹⁵ Tupung kucubaken ngertiken kai antusenna pengenehenen e, rempet lit kalak tedis i lebe-lebengku.

¹⁶ Jenari kubegi sora erlebuh i babo Lau Ulai nina, "O Gabriel, turiken man bana kai antusen si niidahna e."

¹⁷ Reh Gabriel tedis arah durungku; emaka mbiar kal aku seh maka guling aku ku taneh. Nina Gabriel bangku, "O manusia si ermasap-masap, ertikenlah antusenna. Pengenehenen e, eme kerna pendungi doni enda."

¹⁸ Sangana ia ngerana denga guling aku ku taneh, pingsan. Tapi itangkapna aku, jenari ipetedisna.

¹⁹ Nina man bangku, "Ateku ncidahken man bandu kuga pagi dungna, erkiteken pernembeh ate Dibata, sabap pengenehenen eme kerna paksa pendungi.

²⁰ Bajar biri-biri si iidahndu e si ertanduk dua, nggambarken kerajan Medi ras Persia.

²¹ Kambing e nggambarken kerajan Junani, janah tanduk si gandil e si lit i bas kelang-kelang matana, eme rajana si pemena.

²² Tanduk si empat e, si turah kenca tanduk si pemena ndai penggel, e nggambarken empat kerajan, sabap e bangsa terpecah empat pagi, janah gegehna la lit asa gegeh kerajan si pemena.

²³ Adi paksa pengkeri-kerin kerajan-kerajan e nggo ndeher, i ja ia nggo jahat kal, seh maka arus iukum, tupung e lit pagi sekalak raja si la meteh mela, ganas, dingen penipu.

²⁴ Kuasana ertambah-tambah, tapi labo arah gegehna. Erkiteken ia jadi me kecedan si mejin, janah kai si idahina jadi kerina. Ibabana kecedan man kalak si erkuasa bage pe man bangsa Dibata.

²⁵ Perban pantasna, tetap ia rulih i bas penipunna. Megah kal akapna kerna dirina, janah nterem kalak ikernepkenna alu la erbeteh. I babo si e, Raja si Mbelin ilawanna, tapi ikernepken me ia, la arah gegeh manusia.

²⁶ Pengenehenen kerna persembahen si karaben ras persembahen si erpagi-pagi si nggo iterangken man bandu, tuhu-tuhu me pagi jadi. Tapi rahasiakenlah e genduari, sabap ndekah denga maka jadi."

²⁷ Ceda kal ateku, janah sakit aku piga-piga wari dekahna. Kenca bage keke aku, jenari mulihi ka ndahiken dahin si nggo iendesken raja man bangku, tapi nungkun-nungkun ukurku ibahan pengenehenen e, janah la kuantusi.

Daniel

Video Daniel 8

Ikuti Kami:

KONTAK | PARTISIPASI | DONASI