Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are Nebukadnezar abadhi arca emmas tenggina petto lekor meter ban lebarra para’ tello meter. Arca jareya epaddek e Tana Lapang Dura e propinsi Babil.

² Saellana jareya rato ngonjang sakabbinna rato dhaera, para gubennor, bupati, panasehadda nagara, bendahara, hakim, ahli hokom ban sakabbinna kapala dhaera kaangguy hadir e dhalem opacara paresmeyanna arca se la epaddek jareya.

³ Saellana kabbi la dhateng ban manjeng e adha’na arca jareya,

⁴ ajudanna rato aera’ epakaja, "Tan-taretan dhari sadajana bangsa, dhari sadajana suku sareng basa! Peyarsa’agi dhabuna rato paneka:

⁵ Manabi tarompet amonye, etoro’e monyena soleng, calempong, rebab, gambus, serdam sareng pakakas mosik laenna, sampeyan kodu padha asojud nyemba ka arca emmas se ampon epaddek Rato Nebukadnezar.

⁶ Ra’-pasera’a se ta’ atoro’ ka dhabuna rato gapaneka, bakal eontallagiya e bakto gapaneka jugan ka dhalem apoy se rabbang."

⁷ Daddi e bakto ngedhing kas-pakakas mosik jareya epamonye, reng-oreng dhari sakabbinna bangsa, suku ban basa jareya pas padha asojud ban nyemba ka arca emmas jareya.

⁸ Badha reng-oreng Babil se ngala’ kasempadan jareya kaangguy macalaka’ oreng Yahudi.

⁹ Atorra reng-oreng jareya ka Nebukadnezar, "Moga-moga junandalem eparengngana molja salanjangnga!

¹⁰ Junandalem dibi’ apareng dhabu ja’ manabi kas-pakakas mosik ampon epamonye, sadajaepon oreng kodu asojud nyemba ka arca emmas ka’dhinto,

¹¹ ban pasera se ta’ atoro’ ka dhabu gapaneka badhi eontallagiya ka apoy se rabbang.

¹² Namong badha reng-oreng Yahudi se sareng junandalem epassrae pamarenta’an e propinsi Babil ta’ marduli dhabuepon junandalem gapaneka. Reng-oreng gapaneka enggi ka’dhinto Sadrakh, Mesakh sareng Abednego. Reng-oreng gapaneka ta’ poron nyemba ka ba-dibaepon junandalem sarengngan pole ta’ poron nyemba ka arca emmas se epaddek junandalem."

¹³ Meyarsa jareya rato ce’ dukana, pas makon se katello jareya epangadhep ka salerana.

¹⁴ Rato mareksane ka se katello jareya, "Sadrakh, Mesakh ban Abednego! Ba’ bendherra ba’na ta’ endha’ nyemba ka tang ba-diba ban ta’ endha’ asojud ka tang arca emmas se epaddek sengko’ rowa?

¹⁵ Sateya, apa ba’na endha’ asojud nyemba ka arca jareya mon mosik amonye? Mon ba’na ta’ endha’, bi’ sengko’ ba’na eontallagiya ka dhalem apoy se rabbang e bakto jareya keya. Ban diba se kemma se bisa’a masalamet ba’na?"

¹⁶ Sadrakh, Mesakh ban Abednego nyaot, "Guste se molja, abdidalem ta’ alabana kaangguy abillai aba’.

¹⁷ Manabi Allah se esemba abdidalem sadaja sanggup masalamet abdidalem sadaja dhari apoy se rabbang gapaneka ban dhari kobasaepon junandalem, tanto Salerana alampa’agi gapaneka.

¹⁸ Namong, saompamaepon Salerana ta’ alampa’agi sapaneka, moga junandalem ngagaliya ja’ abdidalem sadaja ta’ poron nyemba ka dibaepon junandalem jugan ta’ poron nyemba’a ka arca emmas se epaddek junandalem gapaneka."

¹⁹ Rato Nebukadnezar ce’ dukana ka Sadrakh, Mesakh ban Abednego, sampe’ raena mera ngadarbang. Salerana laju makon sopaja apoy eparaja pettong kalena se biyasana.

²⁰ Saellana jareya salerana makon reng-oreng se talebat kowat dhari tantarana nale’e Sadrakh, Mesakh ban Abednego, ban ngontallagi se katello jareya ka dhalem apoy se rabbang gella’.

²¹ Oreng se katello jareya duli etale’e epaserret e dhalem kabadha’an akalambi genna’, iya reya kameja, juba, songko’ ban angguy laenna, pas eontallagi ka dhalem apoy se rabbang gella’.

²² Sarrena papakonna rato jareya ce’ kerrassa, apoy jareya la epace’panassa sampe’ reng-oreng se ngangka’ Sadrakh, Mesakh ban Abednego ka seddi’na apoy jareya ekello’ sampe’ mate.

²³ Daddi oreng katello se etale’e epaserret jareya gaggar ka dhalem apoy se rabbang jareya.

²⁴ O-tao Nebukadnezar ce’ takerjadda. Salerana ngadek duliyan pas aera’ ka ba-ponggabana, "Se etale’e ban eontallagi ka apoy gella’ gu ta’ katello, ta’ iya?" Saodda reng-oreng jareya, "Lerres, guste."

²⁵ Dhabuna rato, "Tape arapa sengko’ me’ nangale’e oreng kaempa lan-jalanan e dhalem apoy rowa? Kabbi padha ta’ etale’e ban padha ta’ apa-rapa. Ban oreng se nomer empa’ rowa robana akantha diba."

²⁶ Nebukadnezar laju nyemma’e labangnga kennengnganna apoy gella’ pas aera’, "Sadrakh, Mesakh ban Abednego, para abdina Allah Se Mahatenggi! Mara kalowar dhari apoy jareya!" Se katello jareya pas kalowar.

²⁷ Sakabbinna bakkella rato, para gubennor, bupati ban ba-ponggaba laenna agaribbung e sakalenglengnga oreng se katello jareya ban kabbi padha nangale’e ja’ se katello jareya ta’ ekenneng apoy sakale. Obu’na ta’ katonon, kalambina ta’ potthon, la’-mala’ ta’ bau okos balakka’.

²⁸ Rato laju adhabu, "Molja’agi Allah se esemba Sadrakh, Mesakh ban Abednego. Salerana la ngotos malaekadda kaangguy masalamet abdina se katello se parcaja ka Salerana. Reng-oreng jareya alaban ka tang parenta ban asoka’an mate etembang nyemba diba se kemma’a bai kajabana Allahna dibi’.

²⁹ Daddi sengko’ marenta’agi ja’ sepat oreng dhari bangsa, suku bangsa otaba basa apa’a bai, se ca’-ngoca’e ya-nyeya Allah se esemba Sadrakh, Mesakh ban Abednego, bi’ sengko’ ethok-ketthoga ban bengkona epagujura epadaddiya tombuganna jur-gujuran. Sabab tadha’ diba se bisa ngalakone apa se la elampa’agi Allah jareya."

³⁰ Saellana jareya rato maongga pangkadda Sadrakh, Mesakh ban Abednego, sampe’ se katello jareya daddi ja-pangraja tenggi e propinsi Babil.

Daniel

Video Daniel 3

Ikuti Kami:

KONTAK | PARTISIPASI | DONASI