Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Bani panorang ai jongjong ma si Mikael, kopala ni malekat na banggal ai, sijagai bangsamu. Jadi masa ma panorang hasosakan, na so ongga masa humbani dob dong bangsa-bangsa das bani panorang ai; tapi bani panorang ai maluah ma bangsamu, sagala na tarsurat goranni bani buku ai.
2 Anjaha buei do halak na dob modom ibagas orbuk ni tanoh in puho magira, deba hu hagoluhan sisadokah ni dokahni, deba huhabadoron ampa hadorsaon sisadokah ni dokahni.
3 Halak siparuhur marsinondang do songon sondang ni langit, anjaha sidea na manogu-nogu buei halak hu hapintoron marsinondang do songon bintang ronsi sadokah ni dokahni.
4 Tapi anggo ho ale Daniel, ponopkon ma hata in, anjaha bahen ma sap bani pustaha in, paima dapot panorang parujungan ai; buei do halak na manangkasi hata ai, gabe tambah ma habotohon.”
5 Jadi mangkawah ma ahu, si Daniel, anjaha tonggor ma, jongjong do dua halak nari malekat, sada hampit dipar on, na sada nari hampit dipar ni bah ai,
6 anjaha ihatahon sahalak humbani sidea ma hubani dalahi na marpakeian linnen ai, na jongjong i atas ni bah mardalan ai, nini ma, “Andigan pe masa panorang parujungan, na gok halongangan ai?”
7 Ia dalahi na marpakeian linnen ai, na jongjong i atas ni bah mardalan ai, ipagostong ma tanganni siamun pakon sambilou dompak nagori atas, anjaha marbulawan ma ia hubani Na Manggoluh ai ronsi sadokah ni dokahni: Maningon salpu do lobei sada panorang, dua panorang pakon satongah panorang; anggo marujung ma kuasa ni siparseda bangsa na mapansing in, ai pe ase saud haganupan ai.
8 Hubogei do namin hata ai, tapi seng huarusi, gabe ningku ma, “Ham Tuanku, sonaha do ujungni ai?”
9 Jadi nini ma, “Laho ma ho, ale Daniel, ai maningon ponop do anjaha hona sap do hata ai das bani panorang parujungan.
10 Buei do halak na pauraskon dirini, na paborsihkon anjaha na papitahkon dirini; tapi anggo halak parjahat sai inunut do manjahati; seng dong halak parjahat ai na marpangarusion, tapi anggo halak na maruhur iartihon do in.
11 Humbani panorang iparontihon galangan ari-ari ai anjaha ipajongjong gana-gana hagigi na majangin ai, ai ma saribu dua ratus siah puluh ari do.
12 Martuah ma halak na tahan ronsi saribu tolu ratus tolu puluh lima ari.
13 Tapi anggo ho, tuju ma ujungni ai, marsaran ma ho; puho do ho use laho manjalo rupeimu bani ujung ni panorang.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA