Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mikha’el jareya se eotos kaangguy nolonge ban abilla sengko’ e taon se kapeng settong pamarenta’anna Darius oreng Mediya rowa.
2 Ban apa se ekoca’agi sengko’ ka ba’na sabendherra." Malaekat jareya adhabu, "Badha rato laen katello se bakal marenta’a Persiya, esambung bi’ rato se nomer empa’ se bakal lebbiya sogi dhari se laen. E bakto kakobasa’an ban kasogiyanna napa’ ka cek-oncegga, rato jareya bakal akekeda ban karaja’an Yunani.
3 Saellana jareya pas bakal dhatengnga rato se parjuga. Rato jareya bakal marenta’a karaja’anna se talebat rajana ban bakal ngala’a karebba dibi’.
4 Tape e bakto kajaja’anna napa’ ka cek-oncegga, karaja’anna bakal pecca’a daddi pa’ bagiyan. To-rato se banne katoronanna bakal marenta’a daddi gantena, ban to-rato jareya kowadda ta’ saapa mon ebandhing bi’ rato se nomer settong gella’.
5 Rato nagara lao’ bakal kowada. Tape sala settong dhari ma-panglimana bakal lebbiya kowat dhari aba’na, ban bakal marenta’a karaja’an se araja’an pole.
6 Pan-barampan taon saellana jareya rato nagara lao’ bakal mabadha’a parsakutuwan ban rato nagara dhaja ban pottrena bakal eparakae rato nagara dhaja jareya. Tape parsakutuwan jareya ta’ abit, pottre jareya bakal epateyana, bariya keya lakena ban ana’na sarta la-kabulana se ngaterragi.
7 Ta’ abit saellana jareya, badha balana pottre jareya se daddiya rato. Oreng jareya nyerranga tantarana nagara dhaja, nyerranga bintengnga ban makala’a nagara jareya.
8 E bakto abali ka Messer, oreng jareya bakal ngeba’a arcana dibana mosona ban pakakas emmas ban salaka se la eatorragi ka diba jareya. Pan-barampan taon abidda oreng jareya ta’ merrangana rato nagara dhaja.
9 Saellana jareya rato nagara dhaja bakal nyerranga rato nagara lao’, tape bakal epakala’a sampe’ nyorot abali ka nagarana dibi’.
10 Tra-pottrana rato nagara dhaja bakal aya’-sadhiya’a aperranga ban makompola tantara se raja. Se settong dhari tra-pottrana jareya bakal majuwa akantha banjir ban e dhalem serrangan se kapeng dhuwa’na pottrana rato jareya nyerrang bintengnga moso.
11 Daddi rato lao’ laju duka, pas bakal majuwa ka medan perrang ngadhebbana rato nagara dhaja. Rato lao’ jareya bakal ahasela makala tantara se raja se epamangkat bi’ rato dhaja.
12 Saellana jareya rato lao’ bakal gumbira’a polana kamennanganna ban polana se la mate’e moso sabannya’na, tape rato jareya ta’ kera terrosa kobasa.
13 Rato nagara dhaja bakal makompola tantara se raja kadhukaleyanna, la’-mala’ araja’an dhari se dha’-adha’. Mon la napa’ baktona, rato jareya bakal majuwa ban tantarana se raja sarta genna’ parlengkabanna.
14 Daddi pas bannya’ oreng bakal aberonta’a ka rato nagara lao’. Ban badha reng-oreng se kejjem dhari bangsana ba’na, Daniyel, se bakal aberonta’a keya polana la nangale’e pangaton. Tape reng-oreng jareya ta’ kera ahasel.
15 Saellana jareya rato dhari nagara dhaja bakal ngepponga settong kottha se abinteng sarta arebbu’ nagara jareya. Tantarana nagara lao’ bakal ta’ kellara aperrang terros, la’-mala’ pasukan peleyanna ta’ bisa alaban keya.
16 Rato nagara dhaja jareya bakal ngala’a karebba dibi’ tape tadha’ oreng se alabana. Tana se lebur bakal ekennengngana ban ekobasae kabbi.
17 Saellana jareya rato nagara dhaja bakal nyadhiya’agiya sakabbinna tantarana nyerranga nagara lao’. Saellana jareya kalaban maksot ngobasa’ana sakabbinna nagarana mosona, rato nagara dhaja jareya bakal mabadha’a parsatujuwan ban rato nagara lao’ sarta malake’e pottrena ban rato Messer jareya; tape sajjana jareya bakal ta’ ahasela.
18 Saellana jareya rato nagara dhaja jareya bakal nyerranga sa-bangsa e penggir sagara, ban bannya’ se epakala. Tape pas badha pamimpinna nagara manca se bakal maambuwa rato jareya ya-nyeya sa-bangsa laenna se kantha jareya; la’-mala’ pamimpinna nagara manca jareya bakal malessa lalakonna rato nagara dhaja se ya-nyeya ra-nagara laen jareya.
19 Rato nagara dhaja jareya bakal abaliya ka teng-bintengnga nagarana dibi’, tape bakal epakala’a ban tadha’ kabarra pole.
20 Rato jareya bakal eganteya rato laen se bakal nyorowa ponggabana se kejjem makompol pajek kalaban maksa kaangguy nambai kasogiyanna karaja’anna. Ta’ abit saellana jareya rato buru bakal epateyana, se epate’e ta’ rang-terrangan, bariya keya banne e dhalem paperrangan."
21 Malaekat jareya adhabu pole, "Rato se marenta’a nagara dhaja saellana jareya kaetong oreng se nespa se ta’ pantes daddi rato, tape bakal dhatengnga ta’ kalaban eka-sangka ban arebbu’ kadhudhuganna rato kalaban cara tepowan.
22 Sakabbinna tantarana se ta’ atoro’ ka aba’na, la’-mala’ Imam Agung keya, bakal epamosna’a kabbi.
23 Rato jareya ta’ neptebbi parjanjiyan-parjanjiyanna se gi’ buru ebadha’agi ban sa-bangsa laen; kakowadanna sajan atamba’a, maske se eparenta coma nagara kene’.
24 Ra-dhaera laen se landhu bakal eserranga kalaban cara se salenter e bakto pandhudhu’na arassa aman odhi’na. Sabarang se gi’ ta’ tao elakone bangatowana bakal elakonana rato jareya. Sakabbinna barang rampasan ollena dhari paperrangan bakal egi-bagiya ka pandhudhu’na. Rato jareya bakal nyareya akkal carana se nyerranga sakabbinna kennengngan se abinteng, tape baktona bakal ceppedda tadha’.
25 Saellana jareya rato jareya kalaban bangalla mabadha tantara se raja kaangguy nyerrang rato nagara lao’ se la aya-sadhiya keya alabana ban tantarana se kowat ban ce’ rajana. Tape rato nagara lao’ ta’ kowat alaban sabab badha se akiyanat.
26 Hat-panasehadda se paleng semma’ ban salerana bakal magaggara salerana. Bannya’ parjuridda se bakal ekennenga pate’e, ban tantarana bakal tompessa.
27 Saellana jareya rato se kadhuwa jareya bakal alenggiya sameja ban adha’ar abareng, tape padha andhi’ maksot jahat, ban padha salenga lecegan. Tape sajjana se kadhuwa jareya ta’ ahasel sabab gi’ ta’ napa’ baktona.
28 Rato nagara dhaja pas bakal gubara ka nagarana abakta’a sakabbinna barang se ollena arampas. Rato jareya la nekat ngancora agama se eanot ommadda Allah; ngala’a sakarebba pas abaliya ka nagarana dibi’.
29 Ta’ abit saellana jareya rato dhaja jareya bakal nyerranga nagara lao’ pole, tape hasella ta’ padha ban serrangan se dha’-adha’na.
30 Sabab reng-oreng Roma ban pal-kapalla bakal dhatengnga dhari Siprus merrangana rato dhaja sampe’ rato jareya katako’an. Rato nagara dhaja jareya pas bakal gubara kalaban panggaliyan se ce’ peggella ban aehteyar ngancora agamana ommadda Allah, sarta atoro’ ka babala’anna reng-oreng se la mortad dhari agamana jareya.
31 Saellana jareya rato buru pas ngerem kan-pasukan se manajjis Padalemman Socce. Reng-oreng jareya bakal matadha’a kurban ren-aren sarta mabadha kadaddiyan se talebat nako’e, iya reya se enyamae Kajahadan se maancor.
32 Rato jareya nepo, nyaca’ana reng-oreng se la mortad dhari agamana sopaja endha’a nolonge aba’na. Tape reng-oreng se ta’at ka Allah bakal bangala alaban ka rato jareya.
33 Reng-oreng bicaksana se mimpin ra’yat bakal mala’ana ra’yat jareya sopaja ngarteya. Tape abak abit keya, badha e antarana reng-oreng se bicaksana jareya se bakal mateya e dhalem paperrangan otabana katonon, ban badha pole se bakal padha’a erampok otabana etawan.
34 Sabatara gi’ terros badha bai oreng se epate’e, ommadda Allah bakal narema’a bantowan sakone’, tape bannya’ oreng se nolonge pera’ kaangguy kaparlowanna dibi’.
35 Sabagiyan dhari pin-pamimpin se bicaksana jareya bakal epateyana, tape jareya menangka ojiyan ka ommadda Allah sampe’ padha daddi morne. Parkara se kantha jareya bakal terrosa sampe’ aher jaman, iya reya jaman se la eteptebbagi bi’ Allah.
36 Rato nagara dhaja bakal ngala’a sakarebba dibi’. Bakal ngoca’a sambi noduwagi kasombonganna ja’ aba’na araja’an dhari diba se kemma’a bai, la’-mala’ araja’an dhari Allah Se Mahatenggi. Se kantha jareya bakal terrosa sampe’ Allah madhateng okoman. Sabab apa se la eteptebbagi bi’ Allah kodu kalakon gallu.
37 Rato jareya bakal ta’ marduliya diba se kemma’a bai se esemba bangatowana, tamaso’ diba pojja’anna babine’an. Rato jareya ta’ parduli ka ba-diba jareya polana nganggep aba’na araja’an dhari ba-diba jareya.
38 Sabaligga diba se gi’ ta’ tao esemba bangatowana bakal ehormadana, iya reya diba se ajaga teng-binteng. Tor-ator se aropa emmas, salaka, mamatan ban tor-ator laenna se rang-larang bakal eatorragi ka ba-diba se ta’ tao esemba bangatowana jareya.
39 Rato jareya bakal meleya reng-oreng se nyemba diba manca, epanyerranga teng-binteng se koko. Pa’-sapa’a se ngakone diba jareya bakal eberri’ana kahormadan se raja ban pangkadda se tenggi sarta tana menangka opana.
40 Mon aherra kakobasa’anna rato nagara dhaja la para’ napa’a, rato nagara lao’ bakal nyerranga. Rato nagara dhaja pas bakal malessa serrangan jareya ngettokkagi kakowadanna. Rato jareya bakal makalowara kareta perrang, jaran ban kapal sabannya’na, sarta bakal nyerbuwa akantha banjir, sarta pas ngobasane nagara sabannya’na.
41 La’-mala’ tana se lebur eserbuwa keya, ban apolowan ebu oreng epateyana. Tape karaja’an Edom, Mo’ab ban yan-bagiyan se paleng penting dhari karaja’an Amon bakal salamedda.
42 E bakto rato jareya arebbu’ karaja’an-karaja’an jareya, karaja’an Messer bakal ta’ lopoda keya.
43 Dhi’-andhi’na karaja’an Messer se aropa emmas ban salaka sarta rang-barang laenna se aji bakal erampasa. Rato nagara dhaja jareya bakal ebantowa bi’ oreng Libiya ban Sudan.
44 Saellana jareya pas bakal badha’a kabar dhari temor ban dhaja se bakal matakerjada atena, sampe’ rato jareya pas aperrang ngettokkagi kakowadanna ban mate’e oreng sabannya’na.
45 La’-mala’ rato jareya bakal masanga kemahna karaja’anna e antarana sagara ban gunong kennengnganna Padalemman Socce. Tape saellana jareya rato jareya bakal mateya ban tadha’ oreng se endha’a nolong aba’na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA