Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia ngenca penampatku ras sikawalku.

² Janah kai si nandangi kuturiken man bandu enda, tuhu-tuhu kap." Nina malekat e, "Lit telu nari si ngerajai Persia, jenari reh ka si peempatken, si ndauh bayaken asangken kerina raja-raja si debanna. Kenca nggo seh kal belinna kuasana, janah kebayakenna pe nggo mbue kal, ilawanna me kerajan Junani.

³ Kenca bage keke me sekalak raja si mbisa. Ikuasaina sada kerajan si lanai kal lang-lang belinna, janah kai atena ibahanna, idalankenna bagi ate-atena.

⁴ Tapi tupung kuasana sangana belin kal, pecah me kerajanna jadi empat bagin. Si ngancihken ia jadi raja la lit sada pe kesusurenna, tapi kuasa raja-raja e la bagi kuasana mbarenda belinna.

⁵ Kuasa raja Mesir pe ertambah-tambah. Tapi sekalak i bas puanglima-puanglimana mbisan asa raja e, emaka kerajanna pe belinen ka pagi.

⁶ Kenca lepas piga-piga tahun ibahan raja Mesir me perpadanen ras raja Siria, janah iserahkenna anakna man raja Siria. Tapi perpadanen e la ndekah umurna, janah putri Mesir, bage pe perbulangenna, anakna, ras suruh-suruhenna si lawes ras ia, kerina ibunuh.

⁷ La ndekahsa kenca si e, sekalak i bas keluarga putri Mesir ndai nangkih jadi raja. Emaka iserangna tentera raja Siria, ibengketina bentengna, janah italukenna tentera Siria e.

⁸ Jenari ibabana mulih ku Mesir gana-gana dibata-dibatana, rikut ras perkakas-perkakas si ibahan i bas emas ras pirak nari si nggo ipersembahken man berhala-berhala e. Kenca dame piga-piga tahun dekahna,

⁹ reh me raja Siria nerang Mesir, tapi ia ipaksa mundur.

¹⁰ Kenca bage ersikap me anak-anak raja Siria guna erperang janah ipepulungna tentera nterem. Sekalak i bas anak-anakna e maju terus desken banjir si mbelin, janah iserangna terus ku bas benteng musuh.

¹¹ Perban nembehna ate raja Mesir, lawes ia erperang ngelawan raja Siria janah italukenna tentera raja Siria si seh teremna e.

¹² Emaka meganjang ukur raja Mesir erkiteken kemenangenna, tapi la lalap ia menang.

¹³ Kenca bage mulihken raja Siria, ipepulungna me tentera ndauh teremen asa si nggo-nggona. Kenca seh pagi paksa si payo, mulihi me ia erperang alu tentera si nterem lengkap senjatana.

¹⁴ Kenca bage nterem kalak berontak ngelawan raja Mesir. Janah piga-piga kalak si perampang i bas bangsandu nari pe, o Daniel, ikut ka mberontak erkiteken pengenehenen si iidahna, tapi talu me ia.

¹⁵ Dage ikepung raja Siria me kota si erbenteng janah italuken kota e. Tentera Mesir lanai iteruskenna erperang; tentera pilihenna pe la cukup gegehna.

¹⁶ Emaka tentera Siria si reh nerang e, rate-ate me pagi, alu la lit ise pe ngelawanca. Tedis ia i bas Taneh Perpadanen janah kerina ikuasaina.

¹⁷ Emaka irencanaken raja Siria sada serangen alu make kerina tenterana. Janah guna engkernepken kerajan musuhna, ibahanna sada perpadanen ras musuhna e, janah iserehkenna atena anakna man bana; tapi sura-surana e la banci seh.

¹⁸ Kenca si e iserangna bangsa-bangsa i lawit nari, janah melala bangsa italukenna. Tapi lit pagi sekalak peminpin bangsa si deban naluken ia, janah ipengadina keganjangen ukur raja e; tuhu, keganjangen ukur raja Siria iulihkenna man bana.

¹⁹ Mulih pagi raja Siria ku bas bentengna i negerina, tapi italuken me ia, janah eme pagi pengkeri-kerinna.

²⁰ Emaka lit pagi raja si deban nggantikenca. Isuruhna pagi perwira-perwira nindih rayat alu pajak si mberat lako nambahi kebayaken kerajanna. I bas paksa si gendek ibunuh kalak me raja e, la i tengah-tengah jelma si nterem, la i bas peperangen."

²¹ Nina malekat ndai tole, "Si nggancihkenca pagi jadi raja eme sekalak dilaki si jahat, si la lit hakna jadi raja, tapi reh me ia alu la niarap janah irebutna kuasa alu dalan tipu.

²² Kasa kalak si ngelawan ia, subuk Imam si Mbelin nu Dibata pe, isapuna dingen ilesapkenna.

²³ Alu erbahan perpadanen itipuna bangsa-bangsa si deban, janah reh gegehna ia lalap aminna gia kitik-kitik nge negeri kerajanna.

²⁴ Iserangna sada propinsi si bayak alu la isangka-sangka, janah kai si ilakokenna i je, lenga pernah pe ilakoken nini-ninina nai. Kenca bage ibagi-bagikenna ras pengikut-pengikutna barang-barang ras erta-erta si irampasna i bas perang. Irencanakenna nerang benteng-benteng, tapi lanai ndekahsa peltep me umur geluhna.

²⁵ Iperpang-pangna bana mpepulung tentera nterem lako nerang raja Mesir si nggo ersikap ngelawanca alu tentera si la tanggung teremna ras gegehna. Tapi tertipu me raja Mesir janah talu me ia.

²⁶ Temanna si ndeherna kal me si meneken ia. Nterem tenterana ibunuh dingen ikelayapken.

²⁷ Kenca bage ras-ras me duana raja e man, tapi perukurenna duana jahat, janah erguak ia sapih-sapih ia. Tapi labo seh kai si isurakenna, sabap paksana guna si e lenga seh.

²⁸ Kenca bage mulih me raja Siria ku kotana maba barang rampasen si idatca, janah nggo itetapkenna ukurna engkernepken agama bangsa Dibata. Ilakokenna bagi ate-atena janah kenca bage mulih ia ku negerina.

²⁹ I bas sada paksa si tertentu pagin, iserangna ka Mesir, tapi sekali enda lanai bali jadina ras si tangtangna.

³⁰ Tupung si e reh pagi kalak Roma tare kapal ngelawan ia, janah mbiar me raja Siria e. Kenca bage mulih ia dingen merawa kal atena janah icubakenna engkernepken agama bangsa Dibata. Iikutkenna nasehat sekalak si nggo murtad i bas agama e nari.

³¹ Rumah Pertoton e iliami tenterana. Ipengadina persembahen si tep-tep wari, janah ipajekkenna i je Gana-gana si Mejin.

³² Alu tipu datca penampat i bas kalak si nggo nadingken agamana, tapi kalak si ngikutken Dibata ngelawan ia.

³³ Kalak si pentar i bas bangsa e mereken nasehat man nterem kalak si deban. Tapi i bas paksa si kentisik deba ibunuh i bas perang, tah pe itutung seh mate, janah deba ka irampok ras itahan.

³⁴ Tupung pemunuhen e sangana erdalan, sitik ngenca pagi dat bangsa Dibata penampat, tapi si nampati ia e guna kepentingen dirina nge maka ia nggit nampati.

³⁵ Piga-piga kalak peminpin si pentar ibunuh, tapi erdandanken si e bangsa e ibersihken. Si e terus erdalan seh paksa pendungi, paksa si nggo itetapken Dibata.

³⁶ Raja Siria ngelakoken perbahanenna bagi ate-atena. Alu ukur meganjang ikatakenna maka ia belinen asangken kerina dibata, ganjangen pe asa Dibata si Meganjangna, ngasup ngelakoken si enda seh paksa ukumen si nggo itetapken Dibata man bana. Ilakoken Dibata me sue ras si nggo IrencanakenNa.

³⁷ Raja e la mperdiateken dibata si isembah nini-ninina, dibata si kekelengen diberu-diberu pe lang. Janah si tuhuna, dibata si apai pe labo diatena, sabap belinen akapna ia asangken kerina dibata-dibata e.

³⁸ Si ihamatina eme dibata si ngkawali benteng. Ipersembahkenna emas, pirak, permata, ras erta-erta si deban si meherga, man dibata si la pernah isembah nini-ninina.

³⁹ Guna mpertahanken benteng-bentengna, ipakena bangsa si nembah man dibata si deban. Ipehagana kal kalak si nggit ngaloken ia selaku raja, ibahanna pangkatna meganjang, janah iberekenna taneh jadi hadiahna.

⁴⁰ Kenca paksa pengkeri-kerin raja Siria nggo seh, reh me raja Mesir nerang ia, janah raja Siria pe ngelawan alu kerina gegeh si lit i bas ia, make gereta perang, kuda ras melala kapal. Iserangna melala negeri, bali ras lau banjir.

⁴¹ Taneh perpadanen e pe ikut iserangna janah ibunuhna erpuluh-puluh ribu kalak, tapi negeri Edom, Moap, janah iba-iba negeri Amon pulah i bas ia nari.

⁴² Tupung iserangna negeri-negeri e, Mesir pe la pulah ibanna.

⁴³ Kebayaken Mesir si terbuni iangkutna, eme emas, pirak, ras erta-erta si deban si terbuni. Libia ras Sudan pe italukenna.

⁴⁴ Kenca bage mbiar me ia megi berita si reh i Timur ras Utara nari, emaka erperang me ia alu merawa, munuhi nterem jelma.

⁴⁵ Kemah kerajanna si mbelin ipajekkenna kelang-kelang lawit ras deleng i bas ingan Rumah Pertoton. Tapi mate ia alu la ise pe i je si nampatisa."

Daniel

Video Daniel 11

Ikuti Kami:

KONTAK | PARTISIPASI | DONASI