Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng tello’ pamarenta’anna Rato Kores e Persiya badha pessen se enyata’agi ka Daniyel se ajuluk Beltsazar. Pessen jareya ongguwan, tape ce’ malaradda ka Daniyel se ngarteya. E bakto Daniyel mekkere pessen jareya sopaja ngarteya, laju narema katerrangan artena pessen jareya e dhalem settong pangaton.
2 E bakto jareya sengko’ teppa’na atapa tello menggu abidda.
3 Saabidda jareya sengko’ ta’ ngakan kakanan se nyaman ban ta’ ngakan daging; sengko’ ta’ ngenom anggur, ban ta’ asoroy.
4 E tanggal pa’ lekor bulan settong taon jareya, sengko’ teppa’na manjeng e penggirra Songay Tigris se raja rowa.
5 Sengko’ adhanga, pas nangale’e oreng arasogan dhari linen ban panyengsedda dhari emmas morne.
6 Badanna mancorong akantha mamatan, raena akantha dhap-keddhap, socana rabbang akantha apoy. Lengngen ban padana agalirap akantha dimbaga se eossowe, sowarana akantha sowarana oreng sabannya’na.
7 Pera’ sengko’ kadibi’ se nangale’e pangaton jareya. Reng-oreng se abareng sengko’ ta’ nangale’e, tape padha tako’ sampe’ padha buru ban ngetek.
8 Sengko’ edina’agi kadibi’an e jadhiya, sambi ngabassagi pangaton se matakerjat ate jareya. Sengko’ ta’ andhi’ kakowadan ban tang mowa pote olay.
9 E bakto sengko’ ngedhing sowarana, sengko’ kalengnger tajarungngep ka tana.
10 Tape pas badha tanang se nyedding ka sengko’, sengko’ epajaga asandhadhut ka tanang ban ka to’ot.
11 Malaekat jareya adhabu ka sengko’, "Daniyel, ba’na ekataresnae Allah. Mara manjeng, pas edhingngagi tang oca’ pateppa’. Sengko’ eotos ka ba’na." E bakto malaekat jareya adhabu kantha jareya, sengko’ manjeng sambi ngetter.
12 Malaekat jareya adhabu pole ka sengko’, "Ella ja’ tako’, Daniyel. Allah la meyarsa du’ana ba’na molae dhari are e bakto ba’na dha’-adha’na motossagi marendha’a aba’ sopaja olleya kabicaksana’an. Sengko’ dhateng ngeba jawabanna du’ana ba’na.
13 Malaekat se ajaga karaja’an Persiya amoso ka sengko’ salekor are abidda. Mikha’el, sala settong dhari pamimpinna para malaekat, pas nyander nolonge sengko’. Bi’ sengko’ Mikha’el edina e Persiya jareya.
14 Sengko’ dhateng mala’ana ba’na sopaja ba’na ngarteya apa se kadaddiyana ka bangsana ba’na pagi’. Pangaton reya parkara se kadaddiyana pagi’."
15 E bakto malaekat jareya adhabu parkara jareya, sengko’ dhu’-nondhu’ ta’ bisa acaca.
16 Saellana jareya malaekat se akantha manossa jareya laju adulit tang bibir. Sengko’ pas ngoca’, "Guste, pangaton ka’dhinto andaddiyagi abdina ta’ gadhuwan kakowadan kantos ngetter.
17 Abdina akadi dunor se manjeng e ajunanna lorana. Kadi ponapa abdina se tor-matora ka panjennengngan? Kakowadan abdina elang ban nyaba abdina seksek."
18 Malaekat jareya nyedding sengko’ sakaleyan aggi’, sengko’ laju arassa tang kakowadan atamba.
19 Malaekat jareya adhabu, "Pangeran neser ka ba’na, daddi ba’na ta’ osa kobater otabana tako’, daddi mara sateya ba’na daddi kowat!" Sabatara malaekat jareya adhabu kantha jareya, sengko’ sajan atamba kowat pole, laju mator, "Ngereng adhabu, guste. Panjennengngan ampon nambai kakowadan abdina."
20 Malaekat jareya laju ajawab, "Ba’ taowa ba’na arapa sengko’ me’ entar ka ba’na? Maksodda mala’ana ba’na apa se etoles e dhalem Ketab Parkara Se Bendher. Sateya sengko’ kodu abali aperranga ban malaekat panjagana Persiya. Saellana jareya malaekat panjagana Yunani bakal dhatengnga. Tadha’ se nolongana sengko’ kajabana Mikha’el, malaekat panjagana Isra’il, nagarana ba’na.
21 (10:20)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA