Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 (I bas tahun si peteluken kenca Kores jadi raja Persia, ipetangkas sada berita man Daniel, si igelari ka pe Beltasar. Berita e, eme berita si tuhu-tuhu, kerna sada peperangen si mbelin. Si e ituriken man bana i bas sada pengenehenen.)
2 I bas paksa e aku erceda ate telu minggu dekahna.
3 La sitik pe kupan pangan si ntabeh tah daging, lau anggur pe la kuinem, janah la aku ersuri seh nggo lepas si telu minggu e.
4 I bas wari dua pulu empat, bulan si pemena i bas tahun e, aku tedis i tepi Lau Tigris si mbelin.
5 Kutare ku das janah kuidah sekalak si erpaken uis linen dingen ergenditken gendit emas tulen.
6 Dagingna ersinalsal desken permata si meherga. Ayona erndilap desken kilap si erkinar, janah matana bali ras api si gurlah. Tanna ras nahena desken tembaga si ipelas, janah sorana pinger desken pernderkuh jelma nterem.
7 Aku ngenca sisada ngidah pengenehenen e. Kalak si ras aku tupung si e la idahna kai pe, tapi mbiar kal ia kerina, emaka kiam ia, janah cebuni.
8 Tading aku i je sisada, ngenen pengenehenen si mejin e. Aku lanai sitik pe ergegeh, janah sambar kal ayongku seh maka ise pe lanai nandai aku.
9 Tupung kubegi sorana, guling aku ku taneh, pingsan, janah langkem aku i bas taneh.
10 Kenca bage lit sada tan nangkap aku, jenari ipekekena aku; kucikenken tanku dingenku erjimpuh, janah kerina dagingku nggirgir denga.
11 Nina malekat e man bangku, "O Daniel, keleng kal ate Dibata man bandu. Tedisken, jenari begikenlah alu mehuli kai si kukataken man bandu. Aku isuruh njumpai kam." Kenca ikatakenna si enda, minter aku tedis, tapi nggirgir denga aku.
12 Emaka nina, "O Daniel, ula kam mbiar. Dibata nggo megiken pertotonndu mulai i bas wari si pemena nari kam netapken ukur lako mpeteruk dirindu gelah ndatken pengertin. Kerehenku erdandanken pertotondu.
13 Malekat pengawal kerajan Persia ngelawan aku dua pulu sada wari dekahna. Kenca bage Mikhael, eme sekalak i bas pengulu-pengulu malekat, reh nampati aku, emaka kutadingken ia i je ras malekat kerajan Persia.
14 Aku reh ku jenda gelah banci iertindu kai si nandangi jadi man bangsandu i bas paksa si reh. Enda me pengenehenen kerna paksa si reh e."
15 Kenca ikatakenna si enda minter aku tungkuk, lanai aku ngasup ngerana.
16 Kenca bage, malekat ndai, si tempasna bagi manusia, dudurken tanna, jenari ikuitna biberku. Ningku man bana, "O tuan, kote kal aku ibahan pengenehenen enda, seh maka la erngadi-ngadi aku nggirgir.
17 Aku bali ras sekalak budak tedis i lebe-lebe tuanna. Kuga banci aku ngerana man bandu? Gegehku lanai lit, kesahku pe nggo keri."
18 Ijemakna ka aku sekali nari, emaka nggo ergegehna aku.
19 Nina, "Dibata erkeleng ate man bandu, emaka ula kam mbiar, ula atendu aru." Kenca ikatakenna si enda, reh gegehna kuakap bangku, emaka ningku, "Tuan, katakenlah kai si man katankenndu, sabap nggo reh gegehna aku ibahanndu."
20 Nina, "Ietehndu kin ngkai maka aku reh ndahi kam? Kerehenku mpetangkas kai si tersurat i bas Kitap Ketuhutuhun. Genduari aku arus mulih maka kulawan malekat pengawal Persia. Kenca bage, reh ka malekat pengawal Junani. La lit ise pe si nampati aku seakatan Mikhael, malekat pengawal Israel.
21 (Dan 10:20)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA