Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ia ginompar ni si Ruben pakon si Gad parpinahan na buei tumang do; ididah sidea ma tanoh Jaeser pakon tanoh Gilead, anjaha tonggor ma, ianan na dear do ai bani halak parpinahan.
2 Dob ai roh ma ginompar ni si Gad pakon si Ruben, nini sidea ma hubani si Musa, hubani Malim Eleasar pakon hubani kopala ni kuria ai,
3 “Ia Atarot, Dibon, Jaeser, Nimra, Hesbon, Eleale, Sebam, Nebo pakon Beon,
4 ai ma tanoh, na dob ipatunduk Jahowa i lobei ni kuria Israel, tanoh na dear do ai bani halak parpinahan; anjaha parpinahan do jabolonmu.
5 Ambah ni ai nini sidea ma, Anggo dapotan idop ni uhur do hanami i lobeimu, nabere ma namin tanoh on bani jabolonmu bahen parbagiananni; ulang ma pala mandipar hanami hu dipar ni Bah Jordan.”
6 Tapi nini si Musa ma hubani ginompar ni si Gad pakon hubani ginompar ni si Ruben, “Mintor talup ma sanina nasiam laho hu parporangan, tapi nasiam tading ijon marsonang-sonang?
7 Mase ma pasangsi-sangsion nasiam uhur ni halak Israel, laho mandipar hu tanoh na dob binere ni Jahowa hubani sidea?
8 Usih sonai do pambahen ni bapa nasiam, sanggah na husuruh sidea hu Kades-Barnea laho mangkahapi tanoh ai.”
9 Ai dob tangkog sidea das hu habungan Eskol anjaha ikahapi tanoh ai, gabe ipasangsi-sangsi sidea do uhur ni halak Israel, laho masuk hu tanoh, na dob binere ni Jahowa hubani sidea.
10 Pala gajag ringis ni Jahowa bani ari na sasada ai, anjaha nini marbija,
11 “Seng bulih be dalahi sagala na hubobahon tangkog hun tanoh Masir singgan ni na marumur dua puluh tahun pakon lobih hunjai mangidah tanoh na dob hubijahon hubani si Abraham, si Isak pakon si Jakob, ai lang marsijoloman sidea mangirikkon Ahu;
12 sada pe lang sobali si Kaleb, anak ni si Jepunne, halak Kenisi ai, pakon si Josua, anak ni si Nun, halani marsijoloman do uhur ni sidea mangirikkon Jahowa.”
13 Jadi gajag ma ringis ni Jahowa mangidah Israel, gabe mawat-awat sidea ibahen i halimisan ompat puluh tahun dokahni paima bois ganup na sasundut ai, na mangkorjahon hajahaton i lobei ni Jahowa.
14 Anjaha tonggor ma, nasiam do use bangkit gantih ni bapa nasiam, sada tumpuan ni ginompar ni pardousa, laho mangambahi pargajag ni ringis ni Jahowa mangidah halak Israel.
15 Anggo marbalik use nasiam hun bani, hundokah ope bangsa on paturutonni i halimisan on, anjaha magou ma bangsa on ganup bahenon nasiam.
16 Dob ai ipadohor sidea ma hu bani, anjaha nini ma, “Sihol pajongjong sopo-sopo do hanami bani pinahannami pakon huta bani anaknami,
17 tapi gopas pe hanami mambobahon halak Israel paima das sidea iboan hanami hubani iananni, tapi maningon marianan do anaknami ibagas huta na marbatar-batar dompak pangisi ni tanoh on hinan.
18 Seng sihol mulak hanami hu rumahnami, anggo lape isoluk halak Israel ganup parbagiananni bei.
19 Ai seng sihol saparbagianan hanami pakon sidea i dipar ni Bah Jordan pakon hujainkonni ai, anggo domma ondos parbagianannami i dipar ni Jordan on hampit hapoltakan.”
20 Dob ai nini si Musa ma hubani sidea, “Anggo ibahen nasiam sonai, anjaha gopas nasiam i lobei ni Jahowa laho hu parporangan,
21 anjaha ganupan nasiam na gopas marsinjata, mandipari Jordan i lobei ni Jahowa paima iusir munsuhni hun lobeini,
22 anjaha dob tunduk tanoh ai i lobei ni Jahowa, ai pe ase mulak nasiam, gabe lang marpipot be nasiam i lobei ni Jahowa pakon Israel; anjaha gabe parbagianan nasiam ma tanoh on i lobei ni Jahowa.
23 Tapi anggo lang ibahen nasiam sonai, tonggor ma, mardousa ma nasiam dompak Jahowa, anjaha botoh nasiam ma, maningon manginsonoh hubani nasiam do dousa nasiam ai.
24 Antong pungkah nasiam ma huta bani anak nasiam pakon sopo-sopo bani biribiri nasiam; tapi bahen nasiam homa na binagahkon nasiam ai.”
25 Dob ai nini ginompar ni si Gad pakon ginompar ni si Ruben ma hubani si Musa, “Maningon bahenon ni jabolonmu on do songon na hinatahon ni tuannami in.
26 Anaknami, parinangonnami, ugas-ugasnami pakon pinahannami maningon tading do ijon ibagas huta ni Gilead;
27 tapi anggo hanami jabolonmu maningon mandipar do sagala na gopas marsinjata hu parporangan i lobei ni Jahowa, songon na dob hinatahon ni tuannami.”
28 Jadi roh ma tonah ni si Musa pasal sidea hubani Malim Eleasar pakon hubani si Josua, anak ni si Nun, pakon hubani ganup kopala ni halak Israel mar sasamarga.
29 Nini si Musa ma hubani sidea, “Anggo mandipar ginompar ni si Gad pakon ginompar ni si Ruben rap pakon nasiam hu dipar ni Jordan, sagala na gopas hu parporangan i lobei ni Jahowa, anjaha tunduk tanoh ai bani nasiam, maningon bereon nasiam do hubani sidea tanoh Gilead bahen parbagianan ni sidea.
30 Tapi anggo lang mandipar halak na gopas marsinjata rap pakon nasiam, maningon i tongah-tongah nasiam sidea marbagian i tanoh Kanaan.
31 Jadi roh ma balos ni ginompar ni si Gad pakon ginompar ni si Ruben mangkatahon, “Barang aha na hinatahon ni Jahowa hubani jabolonmu on, maningon sonai do bahenonnami.
32 Maningon gopas bei hanami marsinjata mandipar i lobei ni Jahowa hu tanoh Kanaan, anjaha totap bennami parbagianannami i dipar ni Jordan.”
33 Jadi ibere si Musa ma hubani ginompar ni si Gad, hubani ginompar ni si Ruben pakon hubani satongah marga Manase, anak ni si Josep, harajaon ni si Sihon, raja ni halak Amori, pakon harajaon ni si Og, raja ni Basan, tanoh ai ampa huta-hutani rap pakon talunni inggot.
34 Dob ai ipauli ginompar ni si Gad ma huta Dibon, Atarot pakon Aroer,
35 Aterot-Sofan, Jaeser, Jogbeha,
36 Bet-Nimra pakon Bet-Haran, sagala huta na marbatar-batar pakon sopo-sopo ni biribiri.
37 Anjaha ginompar ni si Ruben paulihon Hesbon, Eleale, Kiriataim,
38 Nebo pakon Baal-Meon, na pinaubah goranni ampa Sibmah; anjaha ipaubah sidea ma goran ni huta sagala na pinaulini ai.
39 Dob ai laho ma anak ni si Makir, anak ni si Manase hu Gilead, lanjar ipatunduk ma ai, anjaha iusir halak Amori na ijai ai.
40 Ibere si Musa ma Gilead hubani si Makir, anak ni si Manase, lanjar marianan ma ia ijai.
41 Tapi anggo si Jair, anak ni si Manase, laho ma ia patundukkon dusun-dusun ni sidea, lanjar ibahen ma goranni dusun ni si Jair.
42 Laho ma homa si Nobah, anjaha ipatunduk ma Kenat rap pakon sagala dusun-dusunni, anjaha igoran ma ai Nobah mangihutkon goranni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA